ଦୁବାଇ ସୁପର ସିରିଜ୍ ବ୍ୟାଡ୍ମିଣ୍ଟନ ସେମିରେ ସିନ୍ଧୁ
ଦ୍ୱିତୀୟ ପରାଜୟ ସହ ଶ୍ରୀକାନ୍ତ ସେମିରୁ ବାଦ୍
ଦୁବାଇ: ବୁଧବାରଠୁ ଆରମ୍ଭ ହୋଇଥିବା ଦୁବାଇ ସୁପର ସିରିଜ୍ ବ୍ୟାଡ୍ମିଣ୍ଟନ ପ୍ରତିଯୋଗିତାର କ୍ରମାଗତ ଦ୍ୱିତୀୟ ବିଜୟ ସହ ଭାରତୀୟ ଲଳନା ପିଭି ସିନ୍ଧୁ ସେମିଫାଇନାଲ୍ରେ ସ୍ଥାନ ପକ୍କା କରିଛନ୍ତି। ଚଳିତ ବର୍ଷ ଇଣ୍ଡିଆ ଓପନ୍ ଓ କୋରିଆ ଓପନ୍ ଜିତିବା ବ୍ୟତୀତ ଗ୍ଲାସ୍ଗୋ ବିଶ୍ୱ ପ୍ରତିଯୋଗିତାରେ ରୌପ୍ୟ ଏବଂ ହଂକଂ ଓପନ୍ରେ ଉପବିଜୟିନୀ ହୋଇଥିବା ବିଶ୍ୱ ମାନ୍ୟତାର ତୃତୀୟ ସିନ୍ଧୁ ଏଠାରେ ମହିଳା ଏକକ ଗ୍ରୁପ୍-ଏରେ ବୁଧବାର ନିଜର ପ୍ରଥମ ମୁକାବିଲାରେ ବିଶ୍ୱ ମାନ୍ୟତାର ନବମ ଚୀନ୍ ଲଳନା ହି ବିଙ୍ଗ୍ଜିଆଓଙ୍କୁ ୨୧-୧୧, ୧୬-୨୧ ଓ ୨୧-୧୮ରେ ପରାସ୍ତ କରିଥିଲେ। ଏହାପରେ ଗୁରୁବାର ସିନ୍ଧୁ ଖେଳିଥିବା ଦ୍ୱିତୀୟ ମ୍ୟାଚ୍ରେ ଜାପାନର ସାୟାକା ସାଟୋଙ୍କୁ ୨-୦ (୨୧-୧୩ ଓ ୨୧-୧୨)ରେ ପରାସ୍ତ କରି ସେମିଫାଇନାଲ୍ ସ୍ଥାନ ସୁରକ୍ଷିତ କରିନେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ତେବେ ଭାରତୀୟ ତାରକା କିଦାମ୍ବି ଶ୍ରୀକାନ୍ତ ନିରାଶ କରିଛନ୍ତି। ବିଶ୍ୱ ମାନ୍ୟତାର ଚତୁର୍ଥ ଶ୍ରୀକାନ୍ତ ଏକମାତ୍ର ଭାରତୀୟ ତଥା ବିଶ୍ୱର ଚତୁର୍ଥ ଖେଳାଳି ଭାବେ ଗୋଟିଏ ବର୍ଷ ୪ ସୁପର ସିରିଜ୍ (ଇଣ୍ଡୋନେସିଆ ଓପନ୍, ଅଷ୍ଟ୍ରେଲିଆ ଓପନ୍, ଡେନ୍ମାର୍କ ଓପନ୍ ଓ ଫ୍ରେଞ୍ଚ୍ ଓପନ୍) ଟ୍ରଫି ଜିତିବାର ବିରଳ କୀର୍ତିମାନ ନିଜ ନାମରେ କରିଥିଲା ବେଳେ ଏଠାରେ କ୍ରମାଗତ ଦ୍ୱିତୀୟ ପରାଜୟ ବରଣ କରିଛନ୍ତି। ବୁଧବାର ପ୍ରଥମ ଦିନ ପୁରୁଷ ବର୍ଗ ଗ୍ରୁପ୍-ବିରେ ବିଶ୍ୱ ମାନ୍ୟତାର ଶୀର୍ଷ ତଥା ପୂର୍ବ ବିଜେତା ଭିକ୍ଟର ଆକ୍ସଲେସେନ୍ଙ୍କ ନିକଟରୁ ୧୩-୨୧ ଓ ୧୭-୨୧ ସିଧାସଳଖ ଗେମ୍ରେ ହାରି ଯାଇଥିଲା ବେଳେ ଗୁରୁବାର ଦ୍ୱିତୀୟ ଦିନ ମଧ୍ୟ ପରାଜୟ ଧାରା ଜାରି ରଖିଥିଲେ। ଗୁରୁବାର ଶ୍ରୀକାନ୍ତ ମଧ୍ୟ ସମାନ ୦-୨ (୧୮-୨୧, ୧୮-୨୧) ବ୍ୟବଧାନରେ ଚାଇନିଜ୍ ତାଇପେର ଚୋଉ ତିନ୍ ଚେନ୍ଙ୍କ ନିକଟରୁ ପରାସ୍ତ ହୋଇଛନ୍ତି। ୪ ଜଣିଆ ଗ୍ରୁପ୍ରେ ଦୁଇ ଦିନରେ ଦୁଇଟି ପରାଜୟ ଯୋଗୁଁ ଶ୍ରୀକାନ୍ତ ମଧ୍ୟ ସେମିଫାଇନାଲ୍ ଦୌଡରୁ ବାଦ୍ ପଡ଼ିଛନ୍ତି। ପ୍ରତି ଗ୍ରୁପ୍ର ଶ୍ରେଷ୍ଠ ୨ ଜଣ ଲେଖାଏଁ ସେମିଫାଇନାଲ୍ ଯୋଗତା ହାସଲ କରିବେ।