ଦିଲ୍ଲୀ, ମୁମ୍ବାଇ, ବାଙ୍ଗାଲୋର ଓ ହାଇଦ୍ରାବାଦ ବିମାନବନ୍ଦରର ଅଂଶଧନକୁ ବିକ୍ରି କରିପାରନ୍ତି ସରକାର
ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଧୀନରେ ଥିବା କିଛି ବିମାନବନ୍ଦରର ଅଂଶଧନକୁ ବିକ୍ରି କରିବାକୁ ବିଚାର କରୁଛନ୍ତି ସରକାର | ବାଙ୍ଗାଲୋର, ହାଇଦ୍ରାବାଦ ଏବଂ ଦିଲ୍ଲୀ ବିମାନବନ୍ଦରରେ ଥିବା ସରକାରୀ ଅଂଶଧନକୁ କେନ୍ଦ୍ର ସରକାର ବିକ୍ରି କରିପାରନ୍ତି | ସୂଚନା ମୁତାବକ ଆସେଟ ମୋନୀଟାଇଜେସନ ବା ସମ୍ପତ୍ତିର ନିଜୀକରଣ ଜରିଆରେ ସରକାର ୨.୫ ଲକ୍ଷ କୋଟି ଟଙ୍କା ସଂଗ୍ରହ କରିବାକୁ ଲକ୍ଷ୍ୟ ରଖିଛନ୍ତି | ଗଣମାଧ୍ୟମର ରିପୋର୍ଟ ଅନୁଯାୟୀ, ବାଙ୍ଗାଲୋର, ହାଇଦ୍ରାବାଦ ଏବଂ ଦିଲ୍ଲୀ ବିମାନବନ୍ଦର ବ୍ୟତୀତ ସରକାର ଆହୁରି ୧୩ଟି ବିମାନବନ୍ଦର ଚିହ୍ନଟ କରିଛନ୍ତି। ଯାହାକୁ ୨୦୨୧-୨୨ ଆର୍ଥିକ ବର୍ଷରେ ଘରୋଇକରଣ କରିବେ | ସୂଚନାନୁସାରେ, ଘରୋଇକରଣ ପାଇଁ ୧୩ଟି ବିମାନବନ୍ଦର ମଧ୍ୟରୁ ଉଭୟ ଲାଭଜନକ ଏବଂ ଅଣ-ଲାଭକାରୀ ବିମାନବନ୍ଦର ଅନ୍ତର୍ଭୁକ୍ତ ହେବ।
Sambad is now on WhatsApp
Join and get latest news updates delivered to you via WhatsApp
ମୋଦୀ ସରକାରରେ ବ୍ୟକ୍ତିଗତକରଣର ପ୍ରଥମ ରାଉଣ୍ଡରେ ଆଦାନୀ ଗ୍ରୁପ୍ ୬ଟି ବିମାନବନ୍ଦର ପାଇଥିଲା | ଯେଉଁଥିରେ ଲଖନଉ, ଅହମ୍ମଦାବାଦ, ଜୟପୁର, ମାଙ୍ଗଲୁରୁ, ଥିରୁବନନ୍ତପୁରମ୍ ଏବଂ ଗୁଆହାଟି ବିମାନବନ୍ଦର ଥିଲା | ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଅଧୀନରେ ଥିବା ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆ ଦେଶର ୧୦୦ ରୁ ଅଧିକ ବିମାନବନ୍ଦର ପରିଚାଳନା କରିବାର ଦାୟିତ୍ୱ ନେଇଥିବାବେଳେ ମୁମ୍ବାଇ ବିମାନବନ୍ଦରରେ ଆଦାନୀର ୪୬ ପ୍ରତିଶତ ଅଂଶଧନ ଥିବାବେଳେ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆ ୫୬ ପ୍ରତିଶତ ଅଂଶଧନ ରଖିଛି |
ସେହିଭଳି ଦିଲ୍ଲୀର ଅନ୍ତର୍ଜାତୀୟ ବିମାନବନ୍ଦରରେ ଜିଏମଆର ଗ୍ରୁପ ର ୫୪ ପ୍ରତିଶତ ଅଂଶଧନ ଥିବାବେଳେ ବିମାନବନ୍ଦର କର୍ତ୍ତୃପକ୍ଷଙ୍କର ୨୬ ପ୍ରତିଶତ ଅଂଶଧନ ରହିଛି | ସେହିପରି ହାଇଦ୍ରାବାଦ ଅନ୍ତର୍ଜାତୀୟ ବିମାନବନ୍ଦରରେ ଆନ୍ଧ୍ରପ୍ରଦେଶ ସରକାରଙ୍କ ସହ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆର ୨୬% ଅଂଶଧନ ଅଛି | ସେହିଭଳି ବାଙ୍ଗାଲୋର ବିମାନବନ୍ଦରରେ କର୍ଣ୍ଣାଟକ ସରକାରଙ୍କର ସହ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆର ୨୬% ଅଂଶଧନ ଅଛି | ଆଉ ଏହି ସବୁ ଅଂଶଧନକୁ କେନ୍ଦ୍ର ସରକାର ବିକ୍ରି କରିବାକୁ ବିଚାର କରୁଛନ୍ତି |