ବାରିପଦା: ମୟୁରଭଞ୍ଜ କୁଳିଅଣା ଥାନା ରୀତୟନି ଆଇଟିଆଇ କଲେଜରେ ଆଦିବାସୀ ଛାତ୍ରକୁ ପ୍ରିନସିପାଲଙ୍କ ସାନ ଭାଇ ମାଡ଼ ମାରୁଥିବା ଭିଡିଓ ଭାଇରାଲ ହୋଇଥିଲା | ଅଭିଯୋଗ ଅନୁସାରେ ଆଇଟିଆଇ ଛାତ୍ରମାନଙ୍କ ମଧ୍ୟରେ ଇଲେକ୍ଟିସିଆନ ଟ୍ରେଡ଼ ପିଲାଙ୍କ ଆଡିମିଟ କାର୍ଡ ଆସିବା ବଦଳରେ ଫିଟର ଟ୍ରେଡ଼ ଆଡମିଟ କାର୍ଡ ଆସିଥିବାବେଳେ ଫିଟର ଟ୍ରେଡ଼ ପିଲାଙ୍କ ପାଇଁ ଇଲେକ୍ଟିସିଆନର ଆଡମିଟ କାର୍ଡ ଆସିଥିଲା | ଏନେଇ ଛାତ୍ରମାନେ କଲେଜ ପ୍ରିନସିପାଲଙ୍କୁ ଅଭିଯୋଗ କରିଥିଲେ | ହେଲେ ଛାତ୍ରମାନଙ୍କ ସମସ୍ୟା ସମାଧାନ ବଦଳରେ ସେମାନଙ୍କୁ ପରୀକ୍ଷା ଦେବାକୁ ବାଧ୍ୟ କରାଯାଇଥିଲା | ତେବେ ଭୁଲ ଆଡମିଟ କାର୍ଡରେ ପରୀକ୍ଷା ଦେବାକୁ ଛାତ୍ରମାନେ ରାଜି ହୋଇନଥିଲେ | ସମସ୍ୟାକୁ ସମାଧାନ କରିବାକୁ ଯାଇ କଲେଜର ଗେଟ ବନ୍ଦ କରି ଆନ୍ଦୋଳନ କରିଥିଲେ | ତେବେ ଗେଟ ବନ୍ଦ କରିବାକୁ ନେଇ ପ୍ରିନସିପାଲଙ୍କ ସାନ ଭାଇ ଜଣେ ଛାତ୍ରଙ୍କୁ ମାଡ଼ ମାରିଥିଲେ | ଯାହାଫଳରେ ନ୍ୟାୟ ଦାବି କରି ଛାତ୍ରମାନେ କୁଳିଅଣା ଥାନାରେ ଲିଖିତ ଅଭିଯୋଗ କରିଥିଲେ |
Sambad is now on WhatsApp
Join and get latest news updates delivered to you via WhatsApp
ଥାନାରେ ଅଭିଯୋଗ କରିବାପରେ ଛାତ୍ରମାନଙ୍କୁ ବିନା ଦୋଷରେ ବାଧ୍ୟତାମୂଳକ ଟିସି ଦେଇ ଗାଳି ଗୁଲଜ କରିବା ସହିତ ବଳପୂର୍ବକ ହଷ୍ଟେଲରୁ ଅଗଷ୍ଟ ୨ ତାରିଖ ରାତ୍ରିରେ ବିଦା କରିଦେଇଥିଲେ | ଫଳରେ ପରୀକ୍ଷା ଦେବାରୁ ବଞ୍ଚିତ ହେବା ସହିତ ଶାରୀରିକ ମାନସିକ ଭାବେ ଆଘାତ ପାଇବା ପରେ ୧୨ ଜଣ ଛାତ୍ର ଅଭିଯୁକ୍ତ ମାନଙ୍କୁ ଗିରଫ ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ | ତେବେ ୨୪ ଘଣ୍ଟା ଭିତରେ ମାଡ଼ ମାରିଥିବା ୨ଅଭିଯୁକ୍ତଙ୍କୁ ଗିରଫ କରାଯାଇଥିଲା |
ପୁଲିସ ପ୍ରିନସିପାଲ ତଥା ମାଲିକ ତ୍ରୀଲୋଚନ ବାରିକ ଓ ଅଧ୍ୟାପକ ସତ୍ୟଜିତ ଗିରିକୁ ଗିରଫ କରି କୋର୍ଟ ଚାଲାଣ କରିଥିଲା | ହେଲେ ଛାତ୍ରକୁ ଗୋଡେଇ ଗୋଡେଇ ମାରିଥିବା ପ୍ରିନସିପାଲଙ୍କ ସାନ ଭାଇ ତଥା ମୁଖ୍ୟ ଅଭିଯୁକ୍ତ ଦିବ୍ୟଲୋଚନ ବାରିକ ଫେରାର ହୋଇଯାଇଥିଲେ | ସେପଟେ ମୁଖ୍ୟ ଅଭିଯୁକ୍ତକୁ ଧରିବାକୁ ଜିଲ୍ଲାପାଳ, ପୁଲିସ ପ୍ରଶାସନ ପକ୍ଷରୁ ୩ ଦିନ ସମୟ ଦିଆଯାଇଥିଲା | ହେଲେ ପୁଲିସ ଏବଂ ଜିଲ୍ଲା ପ୍ରଶାସନ ପ୍ରତିଶୃତିରେ ବିଫଳ ହେବାରୁ ଆଜି ଆଦିବାସୀ ସଂଗଠନ ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଜିଲ୍ଲାରେ ବନ୍ଦ ପାଳନ କରିଛି | ଫଳରେ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ ଅଧିକାଂଶ ବନ୍ଦ ରହିଛି |