ପୁଳା ପୁଳା ସମ୍ପତ୍ତି ଅମଳ କରିଥିଲେ କୃଷି ଅଧିକାରୀ !
ମାଲକାନଗିରି: କୋଟିପତି ସରକାରୀ ବାବୁଙ୍କ ସମ୍ପତ୍ତିର ବିବରଣୀ ପ୍ରକାଶ କଲେ ଭିଜିଲାନ୍ସ ଅଧିକାରୀ । ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ମାଲକାନଗିରି ଜିଲ୍ଲା କୃଷି ଅଧିକାରୀ ମକା ଆନନ୍ଦ ରାଓଙ୍କ ମାଲକାନଗିରି ସ୍ଥିତ ସରକାରୀ ବାସଭବନ, ନବରଙ୍ଗପୁର ସ୍ଥିତ ପୈତୃକ ବାସଭବନ ଓ ବିଶାଖାପାଟଣାରେ ଥିବା ସମ୍ପର୍କୀୟଙ୍କ ଘର ସମେତ ୬ଟି ସ୍ଥାନରେ ଭିଜିଲାନ୍ସ ବିଭାଗ ତରଫରୁ ଗତକାଲି ଚଢ଼ାଉ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଚଢ଼ାଉ ସମୟରେ ଭିଜିଲାନ୍ସ ବିଭାଗ ତରଫରୁ ମାଲକାନଗିରି ସ୍ଥିତ କାର୍ଯ୍ୟାଳୟ, ସରକାରୀ ବାସଭବନ, ନବରଙ୍ଗପୁର ସ୍ଥିତ ପୈତୃକ ବାସଭବନ, ସହ ସରକାରୀ କାର୍ଯ୍ୟାଳୟକୁ ଯାଇ ଭିଜିଲାନ୍ସ ବିଭାଗ ତରଫରୁ କାଗଜପତ୍ର ଯାଞ୍ଚ କରାଯାଇଥିଲା । ଚଢ଼ାଉ ସମୟରେ ନବରଙ୍ଗପୁର ସ୍ଥିତ ଏଲଆଇସି ଅଫିସ ନିକଟରେ ଥିବା ଦୁଇଟି ତିନି ମହଲା ବିଶିଷ୍ଟ ଘର ଯାହାର ଆନୁମାନିକ ମୂଲ୍ୟ ପ୍ରାୟ ୨.୨୧ କୋଟି ଟଙ୍କା, ନଗଦ ୧ ଲକ୍ଷ ୭୫ ହଜାର ୯୫୦ ଟଙ୍କା, ୮ ଟି ପ୍ଲଟ ଥିବା ଜଣାପଡିଛି ।
ଏଥିସହ ଗୋଟିଏ ଚାରି ଚକିଆ ଗାଡି ସହ ଗୋଟିଏ ଦୁଇ ଚକିଆ ଗାଡି, ସୁନା, ରୁପାର ଅଳଙ୍କାର ଓ ବ୍ୟାଙ୍କ ଡିପୋଜିଟରେ ଆନୁମାନିକ ୧୧.୭୩ ଲକ୍ଷ ଟଙ୍କା ରହିଥିବା ସୂଚନା ଦେଇଛନ୍ତି ଭିଜିଲାନ୍ସ ଅଧିକାରୀ । ଏହି ଚଢ଼ାଉ ରେ ତିନି ଜଣ ଡ଼ିଏସପି, ସାତ ଜଣ ଇନ୍ସପେକ୍ଟର ଏବଂ ଅନ୍ୟାନ୍ୟ କର୍ମଚାରୀ ଯୋଗ ଦେଇଥିଲେ ଓ ଆନନ୍ଦ ରାଓଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ।