ସୁଭଦ୍ରା ଆର୍ଟ ଗ୍ୟାଲେରୀ ପକ୍ଷରୁ ଦିଲ୍ଲୀରେ ଗାନ୍ଧୀ ଚିତ୍ରକଳା ପ୍ରଦର୍ଶନୀ

ନୂଆଦିଲ୍ଲୀ: ଭୁବନେଶ୍ୱରସ୍ଥିତ ସୁଭଦ୍ରା ଆର୍ଟ ଗ୍ୟାଲେରୀ ଆନୁକୁଲ୍ୟରେ ଦିଲ୍ଲୀଠାରେ ଗାନ୍ଧୀ ଚିତ୍ରକଳା ପ୍ରଦର୍ଶନୀ ଅନୁଷ୍ଠିତ ହୋଇଯାଇଛି।  ସ୍ବାଧୀନତାର ୭୫ ବର୍ଷ ପାଳନ ଉପଲକ୍ଷେ ପାଳନ ହେଉଥିବା ”ଆଜାଦିକା ଅମୃତ ମହୋତ୍ସବ” ଅବସରରେ ଆୟୋଜିତ ଏହି ଚିତ୍ରକଳା ମହାକୁମ୍ଭରେ ଜାତୀୟ ରାଜଧାନୀରେ ଅବସ୍ଥାପିତ ଏବଂ ଓଡ଼ିଶାରୁ ସ୍ବତନ୍ତ୍ର ନିମନ୍ତ୍ରଣ କ୍ରମେ ଆସିଥିବା ବିଶିଷ୍ଟ ଚିତ୍ରଶିଳ୍ପୀମାନେ ଅଂଶ ଗ୍ରହଣ କରିଥିଲେ। ଏଠାକାର କନଷ୍ଟିଚ୍ୟୁସନ୍ କ୍ଲବସ୍ଥିତ ଐତିହାସିକ ସ୍ପିକର ହଲରେ ଗାନ୍ଧୀଙ୍କର ଜୀବନ ଓ ଦର୍ଶନ ଉପରେ ଚିତ୍ରକାରମାନଙ୍କର ପ୍ରସ୍ତୁତ ବିରଳ କଳାକୃତିକୁ ଦିଲ୍ଲୀର ବହୁ ବରେଣ୍ୟ ବ୍ୟକ୍ତି, ପ୍ରବାସୀ ଓଡ଼ିଆ ନେତୃବୃନ୍ଦ ଓ ବୁଦ୍ଧିଜୀବୀ ବୁଲି ଦେଖିଥିଲେ।

ଉତ୍ସବରେ ପୌରହିତ୍ୟ କରି ସୁଭଦ୍ରା ଆର୍ଟ ଗ୍ୟାଲେରୀର ଅଧକ୍ଷ ତଥା ମୁଖ୍ୟ ଆୟୋଜକ ଡଃ ସୂର୍ଯ୍ୟ ରଥ ମହାତ୍ମା ଗାନ୍ଧୀଙ୍କର ମହାନ୍ ଜୀବନ ଓ ମହତ୍ ଦର୍ଶନ ଦ୍ଵାରା ଚଳିତ ପିଢ଼ିର ଚିତ୍ରଶିଳ୍ପୀମାନେ ଅନୁପ୍ରାଣିତ ହେବାକୁ ଆହ୍ବାନ ଜଣାଇଥିଲେ।  ଅନ୍ତର୍ଜାତୀୟ ଖ୍ୟାତିସମ୍ପନ୍ନ ଭାସ୍କର୍ଯ୍ୟ ଶିଳ୍ପୀ ରବି ନାରାୟଣ ରଥଙ୍କ ଦ୍ଵାରା, “ବୈଷ୍ଣବ ଜନ ତୋ…”ଭଜନର ତାଳେ ତାଳେ ମାତ୍ର ୧୦ ମିନିଟ ମଧ୍ୟରେ ଗାନ୍ଧୀ ମୂର୍ତ୍ତି ନିର୍ମାଣ ପ୍ରଦର୍ଶନୀର ମୁଖ୍ୟ ଆକର୍ଷଣ ଥିଲା। ପ୍ରସିଦ୍ଧ ଶିଳ୍ପୀ ସୁଧାଂଶୁ ସୂତାର, ଗାନ୍ଧୀବାଦୀ ଚିନ୍ତାଧାରା ତାଙ୍କର କଳା କଳ୍ପନା ଓ ସର୍ଜନକୁ କିଭଳି ବିଶେଷ ଭାବେ ପ୍ରଭାବିତ କରିଛି, ତାହା ବେଶ୍ ପ୍ରାଞ୍ଜଳ ଭାବେ ବର୍ଣ୍ଣନା କରିଥିଲେ।

ସମାବେଶରେ  କବି ଶଙ୍କର୍ଷଣ ପରିଡ଼ା, ଲେଖିକା ସୁନିତୀ ମୁଣ୍ଡ ଓ ପ୍ରବାସୀ ଓଡ଼ିଆ ସମାଜସେବୀ ରିତା ପାତ୍ର ପ୍ରମୁଖ ଅତିଥି ଭାବରେ ଯୋଗ ଦେଇଥିଲେ। ସିଲଭର ଗାନ୍ଧୀ ଭାବେ ପ୍ରସିଦ୍ଧି ହାସଲ କରିଥିବା ମୋହନ ମହାପାତ୍ର, ମହାତ୍ମାଙ୍କ ବେଶରେ ଛିଡ଼ା ହୋଇ ତାଙ୍କର ସ୍ଵଭାବ ସୁଲଭ ଢଙ୍ଗରେ ଆଗନ୍ତୁକମାନଙ୍କୁ ହାର୍ଦ୍ଦିକ ସ୍ୱାଗତ ଜଣାଇବାର ଦୃଶ୍ୟ ବେଶ୍ ମର୍ମସ୍ପର୍ଶୀ ଥିଲା।

ପ୍ରଦର୍ଶନୀରେ ସୁଧାଂଶୁ ସୂତାର, ପ୍ରବୋଧ ସ୍ବାଇଁ, ସଜଲ୍ ପାତ୍ର, ପ୍ରବୋଧ କୁମାର ସାହୁ, ତପନ ଦାସ, ଅନୁପ ଚାନ୍ଦ, ଶୁଭ୍ରା ଚାନ୍ଦ, ଡାଇନା ମହାପାତ୍ର, ମମତା ସାମନ୍ତରାୟ,ନିବେଦିତା ପଟ୍ଟନାୟକ, ଶଶିକାନ୍ତ ରାଉତ, ଟୁଟୁ ପଟ୍ଟନାୟକ, ମାନସ ରଂଜନ ଜେନା, ମନୋଜ ମହାନ୍ତି, ସ୍ଥିତାଧି ରଥ, କୁମୁଦ ଦାସ, ବନୋଜ ମହାନ୍ତି,ବିକ୍ରମ ନାୟକ, ସୌଭାଗ୍ୟ ମହାପାତ୍ର, ଜଗନ୍ନାଥ ମହାପାତ୍ର, ଚିନ୍ତାମଣି ବିଶ୍ଵାଳ, ଆଶିଷ ପାଣ୍ଡେ ଓ ସୁବାସ ପୂଜାରୀ ପ୍ରମୁଖ ଶିଳ୍ପୀ ଭାଗ ‌ନେଇଥିଲେ।  ପ୍ରାରମ୍ଭରେ ଉଦୀୟମାନ ଓଡ଼ିଶୀ ନୃତ୍ୟାଙ୍ଗନା ଅଭିପ୍ସା ଦାଶ ଗଣେଶ ବନ୍ଦନା ପରିବେଷଣ କରିଥିଲେ।

ସମଗ୍ର କାର୍ଯ୍ୟକ୍ରମକୁ ସୁଭଦ୍ରା ଆର୍ଟ ଗ୍ୟାଲେରୀର ନିର୍ଦ୍ଦେଶକ ଅଶୋକ ନାୟକ ପରିଚାଳନା କରିବା ସହିତ ଆନୁଷ୍ଠାନିକ ଭାବେ ଧନ୍ୟବାଦ ଅର୍ପଣ କରିଥିଲେ। ଉତ୍କଳ ଭାରତୀର ମୁଖ୍ୟ ସଂପାଦକ ଡଃ ନିର୍ମଳ ପଟ୍ଟନାୟକ, କଳିଙ୍ଗ ଭାରତୀ ଫାଉଣ୍ଡେସନର ପ୍ରତିଷ୍ଠାତା ସଭାପତି ଇଂ ଅକ୍ଷୟ ସାମଲ ଏବଂ ସୂର୍ଯ୍ୟକ୍ଷେତ୍ର ଫାଉଣ୍ଡେସନର ସଭାପତି ଡଃ ବିପିନ ମିଶ୍ର ପ୍ରମୁଖ ଉପସ୍ଥିତ ଥିଲେ।