ଆଧାରକାର୍ଡ଼ ଧରି ପୁଲିସ ପାଖରେ ପହଞ୍ଚିଲେ ପ୍ରେମୀ ଯୁଗଳ, ତୁରନ୍ତ ବାହାଘର କରିବାକୁ କଲେ ନିବେଦନ
ଲଖନଉ: ଆଧାରକାର୍ଡ଼ ଧରି ପୁଲିସ ପାଖରେ ପହଞ୍ଚିଲେ ପ୍ରେମୀ ଯୁଗଳ | ତୁରନ୍ତ ବାହାଘର କରାଇବାକୁ ନିବେଦନ ବି କଲେ | ମଧ୍ୟପ୍ରଦେଶର ମୋରେନାରେ ଏଭଳି ଏକ ଘଟଣା ଦେଖିବାକୁ ମିଳିଛି | ଆଜି ଶିବପୁରୀର ଏସପି କାର୍ଯ୍ୟାଳୟରେ ପ୍ରେମୀଯୁଗଳଙ୍କ ହାଇଡ୍ରାମା ଦେଖିବାକୁ ମିଳିଥିଲା |ଏହା ପରେ ପୁଲିସ ଯେତେବେଳେ ପ୍ରେମୀଯୁଗଳଙ୍କ ପରିବାରକୁ ଥାନାକୁ ଡାକିଥିଲା, ଯୁବତୀଙ୍କ ବାପା କହିଥିଲେ ଯେ ତାଙ୍କ ଝିଅ ନାବାଳିକା ଥିବାରୁ ବିବାହ କରିପାରିବ ନାହିଁ | ତେବେ ହାଇ ଭୋଲଟେଜ୍ ଡ୍ରାମା କିଛି ସମୟ ଚାଲିବା ପରେ ଏବଂ ଶେଷରେ ଉଭୟ ପରିବାର ଆଫିଡେଭିଟରେ ସମ୍ମତି ପ୍ରଦାନ କରିଥିଲେ | ପ୍ରେମୀଯୁଗଳଙ୍କୁ କଥାବାର୍ତ୍ତା ହେବା ପାଇଁ ଏକ ନୂତନ ମୋବାଇଲ୍ ଦେବାକୁ କହିବା ପରେ ଏହି ସମସ୍ୟାର ସମାଧାନ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ମଧ୍ୟପ୍ରଦେଶ ମୋରେନା ଜିଲ୍ଲାର ସୁମାୱାଲି ଗାଁର ରହୀସଙ୍କ ଝିଅ ଓ ଶିବପୁରୀର ଲାଲମାଟି ବାସିନ୍ଦା ମନସୁରଙ୍କ ପୁଅ ମଧ୍ୟରେ ପ୍ରେମ ସମ୍ପର୍କ ଥିଲା । ତେବେ ଏହି ସମ୍ପର୍କକୁ ଉଭୟଙ୍କ ପରିବାର ସ୍ୱୀକୃତି ଦେଉନଥିବାରୁ ଉଭୟ ପ୍ରେମୀଯୁଗଳ ଘରୁ ପଳାଇ ଶୁକ୍ରବାର ରାତିରେ ଶିବପୁରୀରେ ପହଞ୍ଚିଥିଲେ। ଶନିବାର ସନ୍ଧ୍ୟାରେ ଉଭୟେ ଶିବପୁରୀର ଏସପି କାର୍ଯ୍ୟାଳୟରେ ପହଂଚି ସୁରକ୍ଷା ପାଇଁ ନିବେଦନ କରିଥିଲେ |
ଉଭୟ ଏସପିଙ୍କୁ ଆଧାରକାର୍ଡ଼ ଦେଖାଇ ବିବାହ ପାଇଁ ଉଭୟଙ୍କ ବୟସ ହୋଇଥିବାର କହିଥିଲେ | ସେମାନଙ୍କ ପରିବାର ବାହାଘର କରିବାକୁ ରାଜି ହେଉନଥିବାରୁ ପୁଲିସ ତାଙ୍କର ବାହାଘର କରାଇବାକୁ ଅନୁରୋଧ କରିଥିଲେ |ଉଭୟଙ୍କ କଥା ଶୁଣିବା ପରେ ପୁଲିସ ସେମାନଙ୍କ ପରିବାରକୁ ଡାକି ବିବାହ ନକରିବାର କାରଣ ପଚାରିଥିଲା। ଝିଅର ବାପା ପୁଲିସକୁ କହିଥିଲେ ଯେ ତାଙ୍କ ଝିଅଙ୍କର ବିବାହ ପାଇଁ ବୟସ ହୋଇନାହିଁ | ତିନି ମାସ ପରେ ହିଁ ବିବାହ କରିପାରିବେ | ଏହାପରେ ଯୁବକ ଏବଂ ଯୁବତୀ ସେମାନଙ୍କ ଆଧାର କାର୍ଡର ପ୍ରମାଣ ଦେଖାଇଥିଲେ | ଶେଷରେ ଉଭୟ ପରିବାର ବିବାହ ପାଇଁ ରାଜି ହୋଇଥିଲେ |