ମନରେଗାରେ ଓଡ଼ିଶା ପାଇଁ ୧୨୨୦ କୋଟି, ଉପକୃତ ହେବେ ୬୧ ଲକ୍ଷ ହିତାଧିକାରୀ, ଶ୍ରମିକଙ୍କ ମଜୁରି ୨୦୨ ଟଙ୍କାକୁ ବୃଦ୍ଧି
ନୂଆଦିଲ୍ଲୀ : କୋଭିଡ–୧୯ ମହାମାରୀ ସଂକ୍ରମଣ କାରଣରୁ ଦେଶବ୍ୟାପୀ ଲକଡାଉନ ଜାରି ରହିଛି। ଏହିଭଳି ଏକ ସମୟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ମନରେଗା)ରେ ଶ୍ରମିକମାନଙ୍କୁ କାମ ଯୋଗାଇ ଦେବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଓଡ଼ିଶା ପାଇଁ ୧୨୨୦ କୋଟି ଟଙ୍କା ବ୍ୟୟବରାଦ କରାଯାଇଥିବାବେଳେ ୬୧ ଲକ୍ଷ ହିତାଧିକାରୀ ଏଥିରୁ ଉପକୃତ ହେବେ। ଏଥିସହିତ, ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଅନ୍ତର୍ଗତ ଏହି ଯୋଜନାରେ ଶ୍ରମିକମାନଙ୍କର ଦୈନିକ ମଜୁରି ୨୦ ଟଙ୍କା ଲେଖାଏଁ ବୃଦ୍ଧି କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଇତିମଧ୍ୟରେ ବିଭିନ୍ନ ଗ୍ରାମାଂଚଳରେ ମନରେଗା ଯୋଜନା ଅଧୀନରେ କାମ ଆରମ୍ଭ ହୋଇଯାଇଛି। ଏହି ଯୋଜନାରେ ଓଡ଼ିଶାର ୬୧ ଲକ୍ଷ ଶ୍ରମିକଙ୍କୁ ୧୦୦ ଦିନର କାମ ଯୋଗାଇ ଦେବାକୁ ଲକ୍ଷ୍ୟ ରଖାଯାଇଛି। ପୂର୍ବରୁ ଏହି ଯୋଜନାରେ ଦୈନିକ ୧୮୨ ଟଙ୍କା ମଜୁରି ମିଳୁଥିବାବେଳେ ଏବେ ଶ୍ରମିକମାନେ ଦୈନିକ ୨୦୨ ଟଙ୍କା ପାରିଶ୍ରମିକ ପାଇବେ। ଦୈନିକ ୨୦ ଟଙ୍କା ଲେଖାଏଁ ହିସାବକୁ ନେଲେ ପ୍ରତ୍ୟେକ ଶ୍ରମିକ ୧୦୦ ଦିନର କାମ ପାଇଁ ଅତିରିକ୍ତ ୨ ହଜାର ଟଙ୍କାର ଲାଭ ପାଇପାରିବେ। ମନରେଗା ଯୋଜନାରେ ଓଡ଼ିଶା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ୧୨୨୦କୋଟି ଟଙ୍କା ବ୍ୟୟବରାଦ କରାଯାଇଛି। ଲକଡାଉନ କାରଣରୁ ବିଭିନ୍ନ ସ୍ଥାନରେ ଅଟକି ରହିଥିବା ପ୍ରବାସୀ ଶ୍ରମିକମାନଙ୍କୁ ମଧ୍ୟ ଏହି ଯୋଜନାରେ କାମ ଯୋଗାଇ ଦେବାକୁ ଉଦ୍ୟମ କରାଯାଉଛି। ଅନ୍ୟପକ୍ଷରେ, ମନରେଗା ଯୋଜନାରେ କାମ ପାଇଥିବା ନବରଙ୍ଗପୁର ଜିଲ୍ଲା ଚଟାହାଣ୍ତିର ଦିନ ମଜୁରିଆ ମଧୁ ଗୌଡ଼ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଧନ୍ୟବାଦ ଜଣାଇଛନ୍ତି। ଲକଡାଉନ ସମୟରେ ପଂଚାୟତ ଜରିଆରେ ତାଙ୍କୁ କାମ ଯୋଗାଇ ଥିବାରୁ ସେ ଖୁସି ବ୍ୟକ୍ତ କରିଛନ୍ତି। ଏହି ଅଂଚଳର ଅନ୍ୟ ଜଣେ ଦିନ ମଜୁରିଆ ଦାମୁ ଗୌଡ଼ ଜବ କାର୍ଡରେ କାମ ପାଇଁ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି, ଲକଡାଉନ ସମୟରେ କାମ ବନ୍ଦ ଥିଲା। ଏବେ କାମ ଆରମ୍ଭ ହୋଇଛି। ଆଗ ଅପେକ୍ଷା ଏବେ ଅଧିକ ଟଙ୍କା ମିଳିବ, ସେଥିପାଇଁ ବେଶୀ ଖୁସି ଲାଗୁଛି। ସେହିପରି ମାଟି ପକାଇବା କାମରେ ନିୟୋଜିତ ଶ୍ରମିକ ଜଗନ୍ନାଥ ମଧ୍ୟ ଗାଁ ପାଖରେ କାମ ପାଇ ଖୁସି ବ୍ୟକ୍ତ କରିଛନ୍ତି।
ସୂଚନାଯୋଗ୍ୟ ଯେ, କରୋନା ମହାମାରୀ କାରଣରୁ ଦେଶରେ ଲକଡାଉନ ଜାରି ହୋଇଥିବା ସମୟରେ ଗରିବ ଲୋକମାନଙ୍କୁ ଆର୍ଥିକ ସହାୟତା ଯୋଗାଇ ଦେବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଅର୍ଥମନ୍ତ୍ରୀ ନିର୍ମଳା ସୀତାରମଣ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଅନ୍ତର୍ଗତ ୧.୭୦ ଲକ୍ଷ କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ। ଏହି ପ୍ୟାକେଜରେ ମନରେଗା ଯୋଜନା ଅନ୍ତର୍ଗତ ଦୈନିକ ମଜୁରି ୧୮୨ ଟଙ୍କାରୁ ୨୦୨ ଟଙ୍କାକୁ ବୃଦ୍ଧି କରାଯିବାକୁ ଘୋଷଣା କରାଯାଇଥିଲା। ଏପ୍ରିଲ ପହିଲାଠାରୁ ବଦ୍ଧିର୍ତ ମଜୁରି ଲାଗୁ ହୋଇସାରିଛି। ଏଥିଯୋଗୁ ଦେଶର ୧୩.୬୨ କୋଟି ଶ୍ରମିକ ଉପକୃତ ହୋଇପାରିବେ।