ନୂଆଦିଲ୍ଲୀ: ସାରା ବିଶ୍ୱରେ ପ୍ରାୟ ୭ ଲକ୍ଷରୁ ଅଧିକ ଲୋକ କରୋନା ଭାଇରସରେ ଆକ୍ରାନ୍ତ ହୋଇ ଏବେ ସଂଗ୍ରାମ କରୁଛନ୍ତି । ଏହି ମହାମାରୀ ଭୂତାଣୁର ଶିକାର ହୋଇ ବର୍ତ୍ତମାନ ସୁଦ୍ଧା ୩୮ ହଜାରରୁ ଅଧିକ ଲୋକଙ୍କର ମୃତ୍ୟୁ ମଧ୍ୟ ହୋଇସାରିଲାଣି । ଯାହାଫଳରେ ବର୍ତ୍ତମାନ ଅନେକ ଦେଶରେ ଲକଡାଉନ କଟକଣା ଲାଗୁ କରିଦିଆଯାଇଛି । ହେଲେ ଲକଡାଉନ୍ ସମୟରେ ଘରେ ବନ୍ଦୀ ରହିବା କାରଣରୁ ଲୋକଙ୍କ ଶରୀରରେ ଏହାର ଗଭୀର ପ୍ରଭାବ ଦେଖିବାକୁ ମିଳୁଛି । ଏଥି ସହିତ ଲୋକମାନଙ୍କର ମାନସିକସ୍ଥିତି ମଧ୍ୟ ବିଗିଡିବାର ଯଥେଷ୍ଟ ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ତେବେ ବିଶ୍ବ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚଓ) ପକ୍ଷରୁ ଲୋକଙ୍କ ଉଭୟ ଶାରୀରିକ ଏବଂ ମାନସିକ ସ୍ଥିତିକୁ ନଜରରେ ରଖି ଏକ ଗୁରୁତ୍ୱପୂର୍ଣ୍ଣ ପରାମର୍ଶ ଦିଆଯାଇଛି । ଯେଉଁଥିରେ ଲୋକଙ୍କୁ ଶାରିରୀକ ସୁସ୍ଥ ରହିବା ପାଇଁ ଅତି କମରେ ୩୦ ମିନିଟ୍ କାଳ ନିଜ ପାଇଁ ସମୟ ଦେବାକୁ ପଡିବ ବୋଲି ପରାମର୍ଶ ଦିଆଯାଇଛି । ସେହପରି ଛୋଟ ପିଲାଙ୍କୁ ୧ ଘଣ୍ଟା ପାଇଁ ଶାରୀରିକ ବ୍ୟାୟାମ ଥିବା କାମ କରିବାକୁ ମଧ୍ୟ କୁହାଯାଇଛି ।
ପ୍ରତିଦିନ ୧ ଘଣ୍ଟାରେ କରନ୍ତୁ ୫ଟି କାମ:
• ଦୈନିକ ନିଜ ରୁଚିର ବିଷୟ ନେଇ ୧ ଘଣ୍ଟା ଅନଲାଇନ୍ କ୍ଲାସ କରିପାରିବେ । ବ୍ୟାୟାମ, ପ୍ରାଣାୟାମ ତଥା ବିଭିନ୍ନ ପ୍ରକାରର ୱାର୍କଆଉଟ୍ ଦେଖି ଏହାକୁ ଅଭ୍ୟାସ କରି ନିଜକୁ ଫିଟ୍ ରଖିପାରିବେ ।
• ସେହପରି ଉଭୟ ଶାରୀରିକ ଏବଂ ମାନସିକ ରୋଗରୁ ଦୂରେଇ ରହିବା ପାଇଁ ଆପଣ ପ୍ରତିଦିନ ଘରେ ରହି ନାଚଗୀତ ଭଳି ମନୋରଞ୍ଜନାତ୍ମକ କାମ କରିପାରିବେ । ପାଖାପାଖି ୩୦ ମିନିଟ୍ ନାଚ କରିବା ଦ୍ୱାରା ଆପଣ ବହୁ ମାତ୍ରାରେ କ୍ୟାଲୋରୀ ମଧ୍ୟ ହ୍ରାସ କରିପାରିବେ ।
• ସ୍ମାର୍ଟଫୋନରେ ଭିଡିଓ ଗେମ୍ .ଖେଳିବା ବ୍ୟତୀତ ଫିଜିକାଲି ଫିଟ୍ ରହିବା ପାଇଁ ଅନେକ ଛୋଟ ବଡ ଖେଳ ଘରେ ରହି ହିଁ ଖେଳି ପାରିବେ । ଚେସ୍, ଲୁଡୋ ଏବଂ କ୍ୟାରମ୍ ଛଡା ଆପଣ ପିଲାମାନଙ୍କ ସହ ଫୁଟବଲ କିମ୍ବା ବ୍ୟାଡମିଣ୍ଟନ୍ ମଧ୍ୟ ଖେଳିପାରିବେ ।
• ଏହି ସମୟରେ ସ୍କିପିଂ ବି ଶରୀର ପାଇଁ ବେଶ୍ ଲାଭଦାୟକ ପ୍ରମାଣିତ ହୋଇପାରେ । ଏହାଦ୍ୱାରା ଆପଣ ଫିଜିକାଲି ମଧ୍ୟ ଆକ୍ଟିଭ ରହିବେ ଏବଂ ଝାଳ ବାହାରିବା ଦ୍ୱାରା ଆପଣଙ୍କୁ ଅବସାଦ ମୁକ୍ତ ହୋଇପାରିବେ ।
• ମସଲ ଷ୍ଟ୍ରେଚିଂ ଏବଂ ବାଲାନ୍ସ ଟ୍ରେନିଂ ଭଳି ଏକ୍ସରସାଇଜ ଆପଣ ଘରେ ବସି କରିପାରିବେ । ଏଥିପାଇଁ ଆପଣଙ୍କୁ ଜିମ କିମ୍ବା ଫିଟନେସ ସେଂଟରର ଉପକରଣର ମଧ୍ୟ ଆବଶ୍ୟକତା ପଡିବ ନାହିଁ ।