ଜଳବିଭାଜିକା ପରିଚାଳନା ପାଇଁ ୫୦୦ କୋଟି, ୩୫୦ କୋଟି ଋଣ ଆକାରରେ ଦେବ ବିଶ୍ବବ୍ୟାଙ୍କ
୧୦ ହଜାର ଭୂମିହୀନ ଗରିବଙ୍କ ସମେତ ୧ ଲକ୍ଷ ୯୦ ହଜାର କୃଷକ ପରିବାରକୁ ମିଳିବ ସୁଫଳ
ଭୁବନେଶ୍ବର,୯/୨(ଇମିସ): ବିଜ୍ଞାନ ସମ୍ମତ ଜଳବିଭାଜିକା ପରିଚାଳନା ପାଇଁ ୫୦୦ କୋଟି ଟଙ୍କା ବ୍ୟୟ କରାଯିବ। ଏଥିରୁ ୩୫୦ କୋଟି ଟଙ୍କା ବିଶ୍ବ ବ୍ୟାଙ୍କରୁ ସରକାର ଋଣ ଆଣିବେ। ଆଜି କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଆଗତ ଏହି ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ମଞ୍ଜୁରି ପ୍ରଦାନ କରିଛି। ଭାରତ ସରକାରଙ୍କ ସମନ୍ବିତ ଜଳବିଭାଜିକା ପରିଚାଳନା କାର୍ଯ୍ୟକ୍ରମ (ଆଇଡବ୍ଲ୍ୟୁଏମ୍ପି) ଓ ଡିଏଫ୍ଆଇଡି ସହାୟତାରେ ପଶ୍ଚିମ ଓଡ଼ିଶା ଗ୍ରାମ୍ୟ ଜୀବିକା ପ୍ରକଳ୍ପ ପରି ପ୍ରମୁଖ କାର୍ଯ୍ୟକ୍ରମରେ ପାରଦର୍ଶିତା ମିଳିଥିବାରୁ ଆଗକୁ ପୁରସ୍କାର କାର୍ଯ୍ୟକ୍ରମକୁ କାର୍ଯ୍ୟକାରୀ କରିହେବ। ଏହି ପ୍ରକଳ୍ପ ୬ ବର୍ଷ ପାଇଁ କାର୍ଯ୍ୟକାରୀ କରିବାକୁ ସ୍ଥିର ହୋଇଛି।
Sambad is now on WhatsApp
Join and get latest news updates delivered to you via WhatsApp
ପ୍ରକଳ୍ପ ମାଧ୍ୟମରେ ଭୂସମ୍ପଦର ବିଜ୍ଞାନ ସମ୍ମତ ବିକାଶ ସହ ଜଳବାୟୁ ସହନଶୀଳ ଫସଲ ଚାଷ ପଦ୍ଧତି ସଂପ୍ରାସାରଣ ଲକ୍ଷ୍ୟ ରଖାଯାଇଛି। କୃଷକ ଉତ୍ପାଦନକାରୀ ସଂଗଠନକୁ ପ୍ରୋତ୍ସାହନ ଓ ବଜାର ସଂଯୋଗ ପୂର୍ବକ ଚୟନ କରାଯାଇଥିବା ଫସଲର ମୂଲ୍ୟ ଶୃଙ୍ଖଳା ନିମନ୍ତେ ପଦକ୍ଷେପ ଗ୍ରହଣ କରିବା ଦ୍ବାରା ଅମଳ ଓ ଆୟବୃଦ୍ଧିର ଏକ ବୃହତ ସମ୍ଭାବନା ସୃଷ୍ଟି କରିବାକୁ ସରକାର ଲକ୍ଷ୍ୟ ରଖିଛନ୍ତି। ଏଥିରେ ୧୦ ହଜାର ଭୂମିହୀନ ଗରିବ ପରିବାର ସମେତ ପ୍ରାୟ ୧ ଲକ୍ଷ ୯୦ ହଜାର କୃଷକ ପରିବାର ଉପକୃତ ହେବେ ବୋଲି ସରକାର ଦାବି କରିଛନ୍ତି।