ବ୍ରହ୍ମପୁର : ବିଶିଷ୍ଟ କର୍ମଚାରୀ ନେତା ତଥା ସମାଜସେବୀ ବୃନ୍ଦାବନ ସାବତଙ୍କ ଆଜି ସକାଳ ସାଢ଼େ ୮ଟାରେ ବ୍ରହ୍ମପୁର ବଡ଼ ଡାକ୍ତରଖାନାରେ ପରଲୋକ ଘଟିଛି।
Sambad is now on WhatsApp
Join and get latest news updates delivered to you via WhatsApp
ଆଙ୍କୁଲି ଶିଳ୍ପାଞ୍ଚଳ ଛକ ବାସିନ୍ଦା ଦିବଂଗତ ବୃନ୍ଦାବନ ରାଜ୍ୟ ଅଣଗେଜେଟେଡ଼୍ କର୍ମଚାରୀ ସମନ୍ବୟ ସମିତିର ପୂର୍ବତନ ରାଜ୍ୟ ସଭାପତି ଓ ମଜଦୁର ସଂଘର ଗଂଜାମ ଜିଲ୍ଲା ସଭାପତି ଭାବେ ଦାୟିତ୍ବ ତୁଲାଇଥିଲେ। ଏହାସହ ଜଣେ ବିଶିଷ୍ଟ ସମାଜସେବୀ ଓ ସଂଗଠକ, ସୁଲେଖକ, ବିଶିଷ୍ଟ ବକ୍ତା ଓ ସଂସ୍କୃତି ପ୍ରେମୀ ଭାବେ ପରିଚିତ ଥିଲେ। ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ଓ ଜାନକୀବଲ୍ଲଭ ପଟ୍ଟନାୟକ, ନ୍ୟାୟଧୀଶ ହରିହର ମହାପାତ୍ର, ଡ.ହରେକୃଷ୍ଣ ମହତାବ, ବୃନ୍ଦାବନ ନାୟକ, ଦିବାକର ପଟ୍ଟନାୟକ ଓ ବିନାୟକ ଆଚାର୍ଯ୍ୟଙ୍କ ଭଳି ବିଶିଷ୍ଟ ବ୍ୟକ୍ତିତ୍ବଙ୍କ ସଂସ୍ପର୍ଶରେ ଅନେକ କାମ କରିବା ସହ ଚତୁର୍ଥ ଶ୍ରେଣୀ କର୍ମଚାରୀ ମାନଙ୍କୁ ନ୍ୟାୟ ପ୍ରଦାନ ପାଇଁ ଅହରହ ସଂଗ୍ରାମ ଜାରି ରଖିଥିଲେ। ଏହାସହ ବ୍ରହ୍ମପୁରର ସହରର ପାଣି ଓ ରାସ୍ତାଘାଟ ସମସ୍ୟା ସମାଧାନ ପାଇଁ ସ୍ବରୋତ୍ତୋଳନ କରିଆସୁଥିଲେ। ଶ୍ରମିକ କର୍ମଚାରୀ ନେତା ଭାବେ ବିଭିନ୍ନ ଆନ୍ଦୋଳନରେ ସେ ସାମିଲ୍ ହୋଇଥିଲେ। କୃଷି ଓଭରସିଅର ଭାବେ କର୍ମପ୍ରବଣ ଓ ସମୟାନୁବର୍ତ୍ତିତା ପାଇଁ ସମ୍ମାନିତ ହୋଇ ମଧ୍ୟ ମଜଦୁର ସଂଘର ସଭାପତି ଭାବେ ରାଜଧାନୀ ରାଜରାସ୍ତାରେ ଆନ୍ଦୋଳନରେ ପ୍ରମୁଖ ଭୂମିକା ଗ୍ରହଣ କରିଥିଲେ। ପୁରୀ ଓ ଦ୍ବାରିକାପୀଠ ଶଙ୍କରାଚାର୍ଯ୍ୟ, ବ୍ରହ୍ମପୁର ବେଦ ପାଠଶାଳାର ପ୍ରତିଷ୍ଠାତା ଓ ଉପଦେଷ୍ଟା ଭାବେ ଅଦ୍ୟାବଧି କାର୍ଯ୍ୟରତ ଥିଲେ।
ମୃତ୍ୟୁଶଯ୍ୟା ନିକଟରେ ପତ୍ନୀ ଲକ୍ଷ୍ମୀପ୍ରିୟା, ପୁଅ ସରୋଜ, ସଂଜୟ , ଦୁଇ ବୋହୂ ,ଝିଅ ସୁଜାତା, ଜ୍ବାଇଁ ପ୍ରବୀଣ ଏବଂ ନାତିନାତୁଣୀଙ୍କ ସମେତ ଆତ୍ମୀୟସ୍ବଜନ ଉପସ୍ଥିତ ଥିଲେ। ବହୁ ନେତା ଓ ବିଭିନ୍ନ ସଂଗଠନର କର୍ମକର୍ତ୍ତା ମାନେ ବାସଭବନକୁ ଯାଇ ଶେଷ ଦର୍ଶନ କରିଥିଲେ।