କେନ୍ଦ୍ର ସରକାରଙ୍କ ବଡ଼ ନିଷ୍ପତ୍ତି : ରାଜ୍ୟକୁ ଦିଆଯିବ ରେଳ ବିଭାଗର ଅବ୍ୟବହୃତ ଜମି

ଭୁବନେଶ୍ୱର : ଭାରତୀୟ ରେଳବାଇ ଅଧୀନରେ ଅବ୍ୟବୃହତ ହୋଇ ପଡ଼ିରହିଥିବା ପ୍ରାୟ ୧୨,୦୦୦ ଏକର ଅତିରିକ୍ତ ଜମିକୁ ବିଭିନ୍ନ ରାଜ୍ୟକୁ ପ୍ରଦାନ କରାଯିବ। ଏନେଇ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଏଥିପାଇଁ ଭୂମି ଚିହ୍ନଟ ପ୍ରକ୍ରିୟା ମଧ୍ୟ ଶେଷ ହୋଇଥିବା ଜଣାପଡ଼ିଛି। ଭାରତୀୟ ରେଳ ପକ୍ଷରୁ ଏବାବଦରେ ବିଭିନ୍ନ ରାଜ୍ୟ ସରକାରଙ୍କୁ ଲିଖିତ ଆକାରରେ ଜଣାଇ ଦିଆଯାଇଛି। ଭାରତ ସରକାରଙ୍କ ସାଧାରଣ ବିନିୟମ (ଜିଏଫ୍‌ଆର୍‌) ଅନୁଯାୟୀ ଭୂମି ପ୍ୟାଚ୍‌ ସ୍ଥାନାନ୍ତରିତ କରିବା ପାଇଁ କୁହାଯାଇଛି । ଏହିସବୁ ଅବ୍ୟବହୃତ ଜମି ମଧ୍ୟରୁ କେତେକ ୧୯୦୦ ମସିହା ପୂର୍ବରୁ ଭାରତୀୟ ରେଳବିଭାଗ ଅଧୀନରେ ରହିଛି। ରେଲ୍‌ୱେ ବୋର୍ଡର ସଦସ୍ୟ (ଇଂଜିନିୟରିଂ) ଏମ୍‌କେ ଗୁପ୍ତା ନିକଟରେ ଓଡ଼ିଶା ସମେତ ଆସାମ, କର୍ଣ୍ଣାଟକ, ଗୁଜରାଟ, ତାମିଲନାଡ଼ୁ, ଛତିଶଗଡ଼, ଉତ୍ତରପ୍ରଦେଶ, ମଧ୍ୟପ୍ରଦେଶ, ପଶ୍ଚିମବଙ୍ଗ, ଝାଡ଼ଖଣ୍ଡ, ପାଞ୍ଜାବ, ରାଜସ୍ଥାନ, ମହାରାଷ୍ଟ୍ର ଆଦି ଭଳି ୧୩ଟି ରାଜ୍ୟର ମୁଖ୍ୟସଚିବଙ୍କୁ ଏନେଇ ଚିଠି ମାଧ୍ୟମରେ ଜଣାଇଛନ୍ତି। ବର୍ତମାନ ସମୟରେ ଜମିର ଆବଶ୍ୟକତା ଯଥେଷ୍ଟ ଅଧିକ ଥିବା ବେଳେ ରେଳ ବିଭାଗ ପକ୍ଷରୁ ବିଭିନ୍ନ ରାଜ୍ୟକୁ ପ୍ରଦାନ କରାଯିବାକୁ ଥିବା ଏହି ଜମି ବିଭିନ୍ନ କାର୍ଯ୍ୟରେ ଲାଗିବା ନେଇ ରେଳମନ୍ତ୍ରୀ ପିୟୁଷ ଗୋଏଲ୍‌ କହିଛନ୍ତି। ରେଳ ବିଭାଗ ପକ୍ଷରୁ ୧୩ଟି ରାଜ୍ୟରେ ଏହି ଜମି ଚିହ୍ନଟ ହୋଇଛି।

ଓଡ଼ିଶା ପାଇବ ୧୨୫ ଏକର ଜମି

ଏହି ପ୍ରକ୍ରିୟାରେ ରେଳ ବିଭାଗ ଓଡ଼ିଶା ସରକାରଙ୍କୁ ୫୦.୮୭ ହେକ୍ଟର ବା ପ୍ରାୟ ୧୨୫ ଏକର ଜମି ଫେରେଇବେ। ଏନେଇ ରେଳ ବିଭାଗ ପକ୍ଷରୁ ରାଜ୍ୟ ସରକାରଙ୍କୁ କୁହାଯାଇଛି। ପୂର୍ବତଟ ରେଳପଥ ଅଧୀନରେ ହୀରାକୁଦର ଅତି ନିକଟରେ ଏହି ଜମି ରହିଛି। ୧୯୦୬ ମସିହାରେ ହୀରାକୁଦ ବନ୍ଧ ନିର୍ମାଣ ବେଳେ ବିଭିନ୍ନ ସାମଗ୍ରୀ ପାଇଁ ରେଳ ବିଭାଗର ସହାୟତା ନିଆଯାଉଥିଲା। ବର୍ତମାନ ରେଳ ବିଭାଗ ଏହି ଜମିକୁ ପୁନର୍ବାର ଓଡ଼ିଶା ସରକାରଙ୍କୁ ଫେରାଇବା ନେଇ ସୂଚନା ଦେଇଛି।