୨୮ରୁ ୧୩ତମ ଜାତୀୟ ତୋଷାଳି କ୍ରାଫ୍ଟସ ମେଳା
ଖୋଲିବ ୩୮୦ ଷ୍ଟଲ୍, ୨୨କୋଟିରୁ ଅଧିକ ବ୍ୟବସାୟ ଲକ୍ଷ୍ୟ, ନାମୀ ହୋଟେଲ ଖୋଲିବେ ଫୁଡକୋର୍ଟ, ତନ୍ତୁକୃତି’ରେ ସଜେଇ ହେବ ପ୍ୟାଭିଲିୟନ୍ ଓ ମେଳା
ଭୁବନେଶ୍ବର : ଆସନ୍ତା ୨୮ତାରିଖରୁ ଜନତା ମଇଦାନରେ ଆରମ୍ଭ ହେବ ୧୩ତମ ଜାତୀୟ ତୋଷାଳି କ୍ରାଫ୍ଟସ ମେଳା। ୧୭ଦିନ ଧରି ହେବାକୁ ଥିବା ଏହି ମେଳାରେ ୩୮୦ଟି ଷ୍ଟଲ ଖୋଲିବ। ଓଡ଼ିଶା ସମେତ ୨୫ଟି ରାଜ୍ୟର ୩୫୦ରୁ ଅଧିକ କାରିଗର ଓ ବୁଣାକାର ଏଥିରେ ଅଂଶଗ୍ରହଣ କରିବେ। ଚଳିତବର୍ଷ ‘ତନ୍ତୁକୃତି’ ପରିକଳ୍ପନା ଆଧାରରେ ଥିମ୍ ପ୍ୟାଭିଲିୟନ୍ ଓ ସମଗ୍ର ମେଳା ସଜେଇ ହେବ। ଏଥର ସମୁଦାୟ ୨୨କୋଟି ଟଙ୍କାର ବ୍ୟବସାୟ ଲକ୍ଷ୍ୟ ରଖାଯାଇଥିବା ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ଆଜି ଲୋକସଂପର୍କ ଭବନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ବିଭାଗୀୟ ସଚିବ ଶୁଭା ଶର୍ମା କହିଲେ, ରାଜ୍ୟରେ ଉତ୍ପାଦିତ ସାମଗ୍ରୀ ଗୋଟିଏ ସ୍ଥାନରେ ଉପଲବ୍ଧ ହେବା ସହିତ କାରିଗର ଓ ବୁଣାକାରଙ୍କ ମଧ୍ୟରେ ଭାବର ଆଦାନ ପ୍ରଦାନ, ବଜାର ଓ ଐତିହ୍ୟକୁ ପ୍ରଦର୍ଶିତ କରିବା ହେଉଛି ଏହାର ମୁଖ୍ୟ ଉଦ୍ଦେଶ୍ୟ। ଖୋଲିବାକୁ ଥିବା ୩୮୦ଟି ଷ୍ଟଲ ମଧ୍ୟରୁ ୨୦୦ଟି ହସ୍ତଶିଳ୍ପ, ୧୩୦ଟି ହସ୍ତତନ୍ତ, ୩୦ଟି ଫୁଡ କୋର୍ଟ, ଏନ୍ଆଇଏଫ୍ଟି, ଆଆଇଟି ଚୌଦ୍ବାର, ଆଇଏଚ୍ଟି ବରଗଡ଼/ସିଡାକ୍ ସମେତ ୧୨ଟି ଶିକ୍ଷାନୁଷ୍ଠାନ ଷ୍ଟଲ, ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ, ପର୍ଯ୍ୟଟନ ବିଭାଗ, ଜାତୀୟ ହସ୍ତତନ୍ତ ବିକାଶ ନିଗମ ଭାଗ ନେବ। ସିଡାକ ପକ୍ଷରୁ ରାଜ୍ୟର ପ୍ରସିଦ୍ଧ ହସ୍ତତନ୍ତ ଓ ହସ୍ତଶିଳ୍ପ ଲାଇଭ ଡେମୋନଷ୍ଟ୍ରେସନ୍ କରାଯିବ। କେନ୍ଦ୍ର ହସ୍ତତନ୍ତ ଉନ୍ନୟନ କମିସନରଙ୍କ ଦ୍ବାରା ପ୍ରଯୋଜିତ ୫୦ଜଣ ବୁଣାକାର, ରାଜ୍ୟରୁ ୨୩୦ ବୁଣାକାର ଓ କାରିଗର ସାମିଲ ହେବେ। ପ୍ରତ୍ୟେକ ଦିନ ସଂଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ଫୁଡକୋର୍ଟରେ ନାମୀ ହୋଟେଲ ନିଜର ଷ୍ଟଲ ଖୋଲିବେ। ଏଥିରେ ଓଡ଼ିଆ ଖାଦ୍ୟ ସହିତ ଜାତୀୟ ଓ ଅନ୍ତର୍ଜାତୀୟ ଖାଦ୍ୟ ଉପଲବ୍ଧ ହେବ। ମେଳା ସମୟରେ ଜୀବନବ୍ୟାପୀ ସାଧନା ପାଇଁ ଓ ଅନ୍ୟ ୩ଜଣ ହସ୍ତଶିଳ୍ପୀ/ବୁଣାକାରଙ୍କୁ ସମ୍ବର୍ଧିତ କରାଯିବାର କାର୍ଯ୍ୟକ୍ରମ ରହିଛି। ମେଳା ପାଇଁ ସମୁଦାୟ ୩କୋଟି ୪୬ଲକ୍ଷ ଟଙ୍କା ଖର୍ଚ ହେବ ବୋଲି ଶ୍ରୀମତୀ ଶର୍ମା ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ଅତିରିକ୍ତ ସଚିବ ଶ୍ରୀକାନ୍ତ ପୃଷ୍ଟି, ଯୁଗ୍ମ ସଚିବ ଅଞ୍ଜନା ପଣ୍ଡା ଓ ହସ୍ତଶିଳ୍ପ ନିର୍ଦେଶକ ବସନ୍ତ ଦାସ ପ୍ରମୁଖ ଉପସ୍ଥିତ ଥିଲେ।