ଭୁବନେଶ୍ବର : ଠାକୁରଙ୍କ ବନ୍ଦନା କରିବାରେ କାହାରି ଆପତ୍ତି ନାହିଁ। ମାତ୍ର ଧର୍ମକୁ ନେଇ ରାଜନୀତି କରିବା ଉଚିତ୍ ନୁହେଁ। କଂଗ୍ରେସ ଏକ ଧର୍ମ ନିରପେକ୍ଷ ଦଳ। ବିଜେଡିର ଜୟ ଜଗନ୍ନାଥ ଓ ବିଜେପିର ଜୟ ଶ୍ରୀରାମ ପ୍ରସଙ୍ଗରେ ଏହି ପ୍ରତିକ୍ରିୟା ରଖିଛନ୍ତି ବରିଷ୍ଠ କଂଗ୍ରେସ ନେତା ବିଜୟ ପଟ୍ଟନାୟକ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ପଟ୍ଟନାୟକ କହିଛନ୍ତି ଯେ ସେମାନେ ଭଗବାନଙ୍କ ନାଁ ନେବାକୁ ଚାହୁଁଛନ୍ତି ତାହା ଖୁସର କଥା। କିନ୍ତୁ ରତ୍ନ ଭଣ୍ଡାର ବିଷୟରେ ବିଜେଡି ପକ୍ଷରୁ କ’ଣ କାର୍ଯ୍ୟାନୁଷ୍ଠାନ ନିଆଯାଇଛି। ସେଠାରେ ଅଳଙ୍କାର ଅଛି କି ନାହିଁ ତାହା ସ୍ପଷ୍ଟ କରାଯାଉନାହିଁ। ରତ୍ନଭଣ୍ଡାର ଚାବି କୁଆଡ଼େ ହଜିଲା ଏହାର ସ୍ପଷ୍ଟୀକରଣ ଆସିବା ଦରକାର। ବ୍ରହ୍ମ ବିଭ୍ରାଟ ମଧ୍ୟ ହୋଇଥିଲା। ଏସବୁକୁ ଆସ୍ତେ ଆସ୍ତେ ଲିଭାଇବା ପାଇଁ ଚେଷ୍ଟା କରାଯାଉଛି। ବିଜେପି କାଳେ ମାଇଲେଜ ନେଇଯିବ ତାକୁ ନଜରରେ ରଖି ବିଜେଡି ପକ୍ଷରୁ ହୁଏତ ଏପରି କରାଯାଉଛି।
ସେ ଆହୁରିମଧ୍ୟ କହିଥିଲେ ଯେ ରାହୁଲ ଗାନ୍ଧୀଙ୍କ ପାଇଁ ଆଜି ଭାରତ ଏକାଠି ହୋଇଛି। ଏହା ବିରୋଧରେ ଦେଶବ୍ୟାପୀ ୧୮ଟି ଦଳ ସାମିଲ ହୋଇଛନ୍ତି। ରାଜ୍ୟରେ ମଧ୍ୟ ସମସ୍ତ ବିରୋଧୀ ଦଳ ଏକାଠି ହୋଇ ବିରୋଧ କରୁଛନ୍ତି। ମାତ୍ର ଓଡ଼ିଶାରେ ବିଜେଡି ଦଳ ସଂପୂର୍ଣ୍ଣ ଚୁପ୍ ରହିଛି। ବିଜେପି ଓ ବିଜେଡି ଗୋଟିଏ ମୁଦ୍ରାର ଦୁଇ ପାର୍ଶ୍ବ ବୋଲି ଯେଉଁ ସନ୍ଦେହ କରାଯାଉଥିଲା ତାହା ଏବେ ପ୍ରମାଣିତ ହୋଇଛି। ଯଦି ବିଜେଡି ବିରୋଧୀ ଦଳ ତେବେ କଂଗ୍ରେସ ପ୍ରସଙ୍ଗରେ କାହିଁକି ମୁହଁ ଖୋଲୁ ନାହାନ୍ତି। ମାତ୍ର ଦରକାର ପଡ଼ିଲେ ଉଭୟ ଦଳ ବିରୋଧୀଙ୍କ କଣ୍ଠରୋଧ କରିବାକୁ ସିବିଆଇ, ଇଡି, ଭିଜିଲାନ୍ସ ଓ ପୁଲିସ ଲଗାଇଥାନ୍ତି। ଏଥିରୁ ସ୍ପଷ୍ଟ ହେଉଛି ଯେ ବିଜେଡି ଓ ବିଜେପି ପରସ୍ପର ପାଇଁ କାମ କରୁଛନ୍ତି। ନଚେତ୍ ବିଜେଡି କଦାପି ଚୁପ୍ ରହି ନ ଥାନ୍ତା ବୋଲି ଶ୍ରୀ ପଟ୍ଟନାୟକ କହିଛନ୍ତି।