ନୂଆଦିଲ୍ଲୀ : ଭାରତର ଆର୍ଥିକ ଅଭିବୃଦ୍ଧି ଚୀନକୁ ଟପିଯାଇଛି । ଚଳିତ ଆର୍ଥିକ ବର୍ଷର ୩ୟ ତିନିମାସ (ଅକ୍ଟୋବର-ଡିସେମ୍ବର) ରେ ଜିଡିପି ଅଭିବୃଦ୍ଧି ୭.୨ ପ୍ରତିଶତ ରହିଛି । ଏହି ସମୟରେ ଚୀନର ଜିଡିପି ଅଭିବୃଦ୍ଧି ୬.୮ ପ୍ରତିଶତ ରହିଛି ।ଏହା ସହିତ ଅର୍ଥନୀତି ଉପରେ ବିମୁଦ୍ରାୟନ ଓ ଜିଏସଟିର ନକାରାତ୍ମକ ପ୍ରଭାବ ହ୍ରାସ ପାଇଥିବା ଆକଳନ କରାଯାଉଛି । ୨୦୧୬ର ଜାନୁୟାରୀ-ମାର୍ଚ୍ଚ ତିନିମାସରେ ମଧ୍ୟ ଭାରତର ଅର୍ଥନୈତିକ ଅଭିବୃଦ୍ଧି ଚୀନକୁ ଟପିଯାଇଥିଲା । କେନ୍ଦ୍ର ସରକାରଙ୍କ ଅଧିନସ୍ଥ କେନ୍ଦ୍ରୀୟ ପରିସଂଖ୍ୟାନ ଅଫିସର ଅଟକଳ ମୁତାବକ ଚଳିତ ଆର୍ଥିକ ବର୍ଷରେ ଦେଶର ଆର୍ଥିକ ଅଭିବୃଦ୍ଧି ହାର ୬.୬ ପ୍ରତିଶତ ରହିବା ଆଶା କରାଯାଉଛି । ପୂର୍ବରୁ ଏହା ୬.୫ ପ୍ରତିଶତ ରହିବା ଅଟକଳ କରାଯାଇଥିଲା । ଜିଡିପି ଅଭିବୃଦ୍ଧିରେ ଉନ୍ନତି ଦେଖାଯିବା ଦ୍ୱାରା କେନ୍ଦ୍ରର ମୋଦି ସରକାରଙ୍କ ପାଇଁ ଏକ ବଡ଼ ନୈତିକ ସହାୟତା ମିଳିବା ଆଶା କରାଯାଉଛି । କାରଣ ପିଏନବି ଓ ଅନ୍ୟ କେତେକ ବ୍ୟାଙ୍କରେ ଦେଖାଯାଇଥିବା ଦୁର୍ନୀତିକୁ ନେଇ ମୋଦି ସରକାର ଏବେ ଚିନ୍ତାରେ ଅଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଗତ ଜାନୁୟାରୀ ମାସରେ ଦେଶର ୮ଟି ଭିତ୍ତିଭୂମି କ୍ଷେତ୍ରର ଅଭିବୃଦ୍ଧି ୬.୭ ପ୍ରତିଶତ ରହିଛି ଯାହାକି ଜାନୁୟାରୀ ୨୦୧୭ରେ ମାତ୍ର ୩.୪ ପ୍ରତିଶତ ଥିଲା ।