ଅହମ୍ମଦାବାଦ : ପୁଣି ଚର୍ଚ୍ଚାରେ ଷ୍ଟାଚ୍ୟୁ ଅଫ୍ ୟୁନିଟି । ବିଶ୍ୱର ସବୁଠୁ ଉଚ୍ଚ ପ୍ରତିମା ଷ୍ଟାଚ୍ୟୁ ଅଫ୍ ୟୁନିଟିରୁ ଉଦଘାଟନ ସମାରୋହ ପାଇଁ ବିଜ୍ଞାପନ ବାବଦକୁ ୨.୬୪ କୋଟିରୁ ଅଧିକ ଟଙ୍କା ଖର୍ଚ୍ଚ କରାଯାଇଛି । ଏଭଳି ଏକ ଚାଞ୍ଚଲ୍ୟକର ତଥ୍ୟ ଏବେ ସାମ୍ନାକୁ ଆସିଛି । ସୂଚନା ଅଧିକାର ଆଇନ ମଗାଯାଇଥିବା ପ୍ରଶ୍ନର ଉତ୍ତରରେ ଏଭଳି ତଥ୍ୟ ସାମ୍ନାକୁ ଆସିଛି ।
Sambad is now on WhatsApp
Join and get latest news updates delivered to you via WhatsApp
ମୁମ୍ବାଇର ସୂଚନା ଅଧିକାର କର୍ମୀ ଜତିନ ଦେଶାଇ ଏହି ପ୍ରତିମାର ଉଦଘାଟନ ସମାରୋହରେ ବିଜ୍ଞାପନ ବାବଦକୁ କେତେ ଟଙ୍କା ଖର୍ଚ୍ଚ ହୋଇଛି ସେ ନେଇ ସୂଚନା ଓ ପ୍ରସାରଣ ମନ୍ତ୍ରାଳୟକୁ ଆରଟିଆଇ ମାଧ୍ୟମରେ ଏହାର ତଥ୍ୟ ମାଗିଥିଲେ । ଏହାର ଉତ୍ତରରେ ଜାନୁଆରୀ ୯ରେ ମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ, ଏହି ସମାରୋହରେ ବିଜ୍ଞାପନ ବାବଦକୁ ଇଲେକ୍ଟ୍ରୋନିକ୍ସ ଗଣମାଧ୍ୟମକୁ ୨ କୋଟି ୬୨ ଲକ୍ଷ ୪୮ ହଜାର ୪୬୩ ଟଙ୍କା ଓ ପ୍ରିଣ୍ଟ ମିଡିଆରେ ବିଜ୍ଞାପନ ଦେବା ବାବଦକୁ ୧ ଲକ୍ଷ ୬୮ ହଜାର ୪୧୫ ଟଙ୍କା ସରକାର ଖର୍ଚ୍ଚ କରିଛନ୍ତି ।
ଯତୀନ ଦେଶାଇ କହିଛନ୍ତି, ଏହି ଖର୍ଚ୍ଚକୁ ଉଦଘାଟନ ସମାରୋହ ଖର୍ଚ୍ଚରେ ସାମିଲ କରିନାହାନ୍ତି ସରକାର । ଏହାଛଡା ଗଣମାଧ୍ୟମକୁ ଛାଡିଦେଲେ ଅନ୍ୟ ବିଜ୍ଞାପନ ବାବଦକୁ ହୋଇଥିବା ଖର୍ଚ୍ଚର ହିସାବ ଉପଲବ୍ଧ ନାହିଁ । ଏତେ ଟଙ୍କା ବିଜ୍ଞାପନ ବାବଦରେ ଖର୍ଚ୍ଚ କରିବାକୁ ନାପସନ୍ଦ କରିଛନ୍ତି ଯତୀନ ।
୩୧ ଅକ୍ଟୋବର ୨୦୧୮ରେ ଷ୍ଟାଚ୍ୟୁ ଅଫ୍ ୟୁନିଟିର ଉଦଘାଟନ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯାହା ପୂରା ବିଶ୍ୱର ସବୁଠାରୁ ବଡ ମୂର୍ତ୍ତି ଭାବେ ମାନ୍ୟତା ପାଇଛି । ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜନ୍ମତିଥିରେ ଏହାର ଉଦଘାଟନ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।