ଶୌଚାଳୟ ନଥିବାରୁ ଶାଶୁଘର ଛାଡ଼ିଲେ ନବବିବାହିତା, କହିଲେ ଯେ ପର୍ଯ୍ୟନ୍ତ ଶୌଚାଳୟ ନ ହୋଇଛି ମୁଁ ଫେରିବି ନାହିଁ
ମହୋବା : କେନ୍ଦ୍ର ସରାକାରଙ୍କର ସ୍ୱଚ୍ଛ ଭାରତ ଅଭିଯାନର ପ୍ରଭାବ ସହର ସମେତ ଗ୍ରାମାଞ୍ଚଳର ଲୋକମାନଙ୍କ ଉପରେ ପଡ଼ୁଥିବାର ଦେଖିବାକୁ ମିଳିଛି । ଉତ୍ତରପ୍ରଦେଶର ମହୋବା ଜିଲ୍ଲାରେ ଥିବା ଖନ୍ନା ଗ୍ରାମରେ ଜଣେ ନବବିବାହିତାଙ୍କ ଶାଶୁଘରେ ଶୌଚାଳୟ ନଥିବାରୁ ସେ ବିବାହର କିଛି ଦିନ ମଧ୍ୟରେ ଶାଶୁ ଘର ଛାଡ଼ିଥିବା ଜଣାପଡ଼ିଛି । ଏହା ସହ ଯେ ପର୍ଯ୍ୟନ୍ତ ଶୌଚାଳୟ ନ ହୋଇଛି ମୁଁ ଫେରିବି ନାହିଁ ବୋଲି ମଧ୍ୟ କହିଥିବା ସୂଚନା ମିଳିଛି । ଏହି ଖବର ଚାରିଆଡ଼େ ପ୍ରସାର ହେବା ପରେ ଲୋକମାନେ ନବବିବାହିତାଙ୍କ ଏହି ପଦକ୍ଷପକୁ ପ୍ରଶଂସା କରିବା ସହ ସରକାରଙ୍କ ସ୍ୱଚ୍ଛ ଭାରତ ଅଭିଯାନର ପ୍ରଭାବ ଲୋକମାନଙ୍କ ଉପରେ ପଡ଼ୁଥିବା ଏହି ଘଟଣାରୁ ସ୍ପଷ୍ଟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମେ ୧ରେ ବାହା ହୋଇ ଶାଶୁ ଘରକୁ ଆସିବା ପରେ ସେଠାରେ ଶୌଚାଳୟ ନଥିବା ଜାଣିଥିଲେ ୨୦ବର୍ଷିୟ ସୁନୀତା । ଏ ବିଷୟରେ ଜାଣି ସେ ତୁରନ୍ତ ନିଜ ଘରକୁ ଏକଥା ଫୋନ କରି ଜଣାଇବା ସହ ତାଙ୍କୁ ଆସି ନେଇଯିବା ପାଇଁ କହିଥିଲେ । ଏହା ଶୁଣି ସୁନୀତାଙ୍କ ସ୍ୱାମୀ ଦେବୀଦାସ ପ୍ରଜାପତି ତାଙ୍କୁ ରୋକିବା ପାଇଁ ଚେଷ୍ଟା କରିବାରୁ ସୁନୀତା ରହିବା ଲାଗି ସଫା ମନା କରି ଦେଇଥିଲେ । ସେ କହିଥିଲେ, ମୁଁ ଆମ ଘରେ ଆଜି ପର୍ଯ୍ୟନ୍ତ କେବେ ହେଲେ ବାହାରେ ଶୌଚ ହୋଇନାହିଁ । ଏଠିକି ଆସି ମୁଁ ମୋର ଅଭ୍ୟାସ ବଦଳାଇ ବାହାରେ ଶୌଚ ହୋଇ ପାରିବି ନାହିଁ ।ଏହାପରେ ସେ ବାପ ଘରକୁ ଚାଲି ଯାଇଥିଲେ । ଯାଉ ଯାଉ ଯେ ପର୍ଯ୍ୟନ୍ତ ଶୌଚାଳୟ ନ ହୋଇଛି ମୁଁ ଫେରିବି ନାହିଁ ବୋଲି କହି ଯାଇଥିବା ଜଣା ପଡ଼ିଛି । ସୁନୀତାଙ୍କ ଏପରି ଇଚ୍ଛାକୁ ଆଖି ଆଗରେ ରଖି ଦେବୀଦାସ ଶୌଚାଳୟ ତିଆରି କରିବା ପାଇଁ ମନସ୍ଥ କରିଥିବା ଜାଣିିବାକୁ ମିଳିଛି । ଏଥିପାଇଁ ସେ ପ୍ରସ୍ତୁତି ମଧ୍ୟ ଆରମ୍ଭ କରିସାରିଛନ୍ତି ବୋଲି ସୂଚନା ମିଳିଛି ।