ଦୁଷ୍କର୍ମକାରୀକୁ ମୃତ୍ୟୁଦଣ୍ଡ : ଏକ ମାସ ନ ପୂରୁଣୁ ଶିଶୁ ଦୁଷ୍କର୍ମ ଓ ହତ୍ୟା ମାମଲାର ଫଇସାଲା କଲା ଇନ୍ଦୋର ଜିଲ୍ଲା ଅଦାଲତ
ଇନ୍ଦୋର : ଦେଶରେ ନାବାଳିକା ଦୁଷ୍କର୍ମ ମାମଲା ବଢ଼ି ଚାଲିଥିବା ବେଳେ ଏକ ଉଦାହରଣ ସୃଷ୍ଟି କରିଛନ୍ତି ଇନ୍ଦୋରର ଏକ ଅଦାଲତ। ଏହି ଅଦାଲତ ଶୁଣାଇଛନ୍ତି ଏକ ଏତିହାସିକ ରାୟ । ନାବାଳିକା ଦୁଷ୍କର୍ମ ମାମଲାରେ ତ୍ୱରିତ ନ୍ୟାୟ ପ୍ରଦାନ କରି ଦୁଷ୍କର୍ମକାରୀକୁ ଦେଇଛନ୍ତି ମୃତ୍ୟୁଦଣ୍ଡ। ଏକ ୪ ମାସର ଶିଶୁକୁ ଦୁଷ୍କର୍ମ ହେବାର ମାସେ ନ ପୂରୁଣୁ ମାମଲାର ଫଇସଲା କରିଛନ୍ତି କୋର୍ଟ। ଗତ ଏପ୍ରିଲ ୨୦ରେ ଅଭିଯୁକ୍ତ ଜଣକ ଶିଶୁକୁ ଶୋଇଥିବା ଅବସ୍ଥାରେ ଉଠାଇ ନେଇ ତା’ସହ ଦୁଷ୍କର୍ମ କରି ହତ୍ୟା କରିଥିବା ବେଳେ ଆଜି ଇନ୍ଦୋର ଜିଲ୍ଲା ଅଦାଲତ ଏ ନେଇ ମୃତ୍ୟୁ ଦଣ୍ଡ ଶୁଣାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଇନ୍ଦୋରର ରଜ୍ଓ୍ଵାଡ଼ା ଅଞ୍ଚଳରେ ଅଭିଯୁକ୍ତ ଜଣଙ୍କ ଏକ କୋଠାର ବେସ୍ମେଣ୍ଟକୁ ନେଇ ଶିଶୁକୁ ଦୁଷ୍କର୍ମ କରିଥିବା ବେଳେ ବିଲ୍ଡ଼ିଙ୍ଗରେ ଲାଗିଥିବା ସିସିଟିଭିରେ ତାହା କଏଦ ହୋଇଥିଲା । ପୁଲିସ ଏତଲା ପାଇ ସିସିଟିଭି ଯାଞ୍ଚ କରିବା ପରେ ଅଭିଯୁକ୍ତ ଜଣଙ୍କ ଶିଶୁର ସଂପର୍କିୟ ବୋଲି ଜଣା ପଡ଼ିଥିଲା । ଏହା ପରେ ପୁଲିସ ଅଭିଯୁକ୍ତକୁ ଗିରଫ କରି ପଚରା ଉଚରା କରିବା ସହ କୋର୍ଟ ଚାଲାଣ କରିଥିଲା ।
ସୂଚନା ମୁତାବକ, ଏପ୍ରିଲ ୨୦ରେ ରଜ୍ଓ୍ଵାଡ଼ା ଦୁର୍ଗ ପାଖରେ ପୀଡ଼ିତା ଏବଂ ତା’ର ପରିବାର ଲୋକ ଶୋଇଥିବା ବେଳେ ଅଭିଯୁକ୍ତ ଜଣଙ୍କ ପୀଡ଼ିତାଙ୍କୁ ଉଠାଇ ନେବା ସହ ପାଖରେ ଥିବା ଏକ ଘରକୁ ନେଇ ଦୁଷ୍କର୍ମ କରିଥିଲେ । ଏହା ପରେ ଧରା ପଡ଼ିଯିବା ଡ଼ରରେ ସେ ତାଙ୍କୁ ହତ୍ୟା କରିବା ସହ ସେଠାରେ ଫିଙ୍ଗିଦେଇ ଚାଲି ଆସିଥିଲେ । ଏହି ଘଟଣାଟି ଭୋର ୪.୩୦ରେ ଘଟିଥିବା ବେଳେ ଅପରାହ୍ନରେ ପୀଡ଼ିତାଙ୍କ ମୃତଦେହ ଉଦ୍ଧାର କରିଥିଲା ପୁଲିସ । ପୀଡ଼ିତାଙ୍କ ପରିବାର ଲୋକେ ଏବଂ ଅଭିଯୁକ୍ତ ମିଶି ରଜ୍ଓ୍ଵାଡ଼ା ଦୁର୍ଗ ଆଗରେ ବେଲୁନ୍ ବିକୁଥିଲେ ବୋଲି ଜଣାପଡ଼ିଛି।