ଖୋର୍ଦ୍ଧା: ଯାହା ଆଶଙ୍କା କରାଯାଉଥିଲା ତାହା ଘଟିଲା । ରାଜୁଆ-ଦୟା ନଦୀରେ ତିରିମଲ ଓ କଂଟାବଣିଆ ୪ରୁ ଊର୍ଦ୍ଧ୍ବ ଘାଇ ପରେ ପାଣି ଆଜି ଧଉଳିମୁହଁର ଚାଷ ଜମିକୁ ଡୁବାଇବା ସହ ଶରଧାପୁର ଗାଁ ମଧ୍ୟରେ ପାଣି ପଶିଛି । ଏହା ସହ ଖୋର୍ଦ୍ଧା ବ୍ଲକରେ ବନ୍ୟା ପ୍ରଭାବିତ ଗାଁ ସଂଖ୍ୟା ୧୧କୁ ବୃଦ୍ଧି ପାଇଛି । ଗତକାଲି ତିରିମଲ ଓ କଂଟାବଣିଆ ଠାରେ ଘାଇ ସୃଷ୍ଟି ହେବା ପରେ ବଢ଼ି ପାଣି ଆଜି ସକାଳୁ ଶରଧାପୁରରେ ପଶିଛି । ଶରଧାପୁରର ଗାଁଦାଣ୍ଡରେ ଦୁଇ-ତିନିଫୁଟ ପାଣି ରହିଛି । ରାଜୁଆ ଓ ଦୟା ନଦୀର ଘାଇ ଦେଇ ଅନବରତ ବଢ଼ିପାଣି ପ୍ରବାହିତ ହେଉଥିବାରୁ ଶରଧାପୁରରେ ଜଳସ୍ତର ବୃଦ୍ଧି ପାଇବାରେ ଲାଗିଛି । ଏହା ସହ ମାନପୁର ନିକଟ ଓରମିରେ ମଧ୍ୟ ଜଳପତ୍ତନ ବଢ଼ୁଥିବା ଗାଁ ଲୋକ ସୂଚନା ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲା ପ୍ରଶାସନ ପକ୍ଷରୁ ମିଳିଥିବା ସୂଚନାନୁସାରେ, ଜିଲ୍ଲାରେ ବନ୍ୟା ଦ୍ୱାରା କ୍ଷତିଗ୍ରସ୍ତ ଗାଁ ସଂଖ୍ୟା ୫୪ରୁ ୬୭କୁ ବୃଦ୍ଧି ପାଇଛି । ଏହା ମଧ୍ୟରେ ଖୋର୍ଦ୍ଧା ବ୍ଲକର ୧୧ଟି ଗାଁ -ନରଣଗଡ଼ ପଂଚାୟତର ଓରମି, ମାନପୁର, ଧବଳପୁର, ବଳପୁର, ବ୍ରଜମୋହନପୁରର ଶରଧାପୁର, ଓରବରସିଂହ ପଂଚାୟତର ରାୟପୁର, କୃଷ୍ଣପୁର, ତିରିମୂଳ, ଦୁର୍ଗାପୁର ଓ ଓରବରସିଂହ ରହିଛି । ମୋଟାମୋଟି ଭାବେ ଜିଲ୍ଲାର ୫ଟି ବ୍ଲକର ୪୫ଟି ଗାଁର ୧୮୫୦୭ଜଣ ଲୋକ ବଢ଼ିପାଣି ଘେରରେ ରହିଛନ୍ତି । ୭୬୪୧ଜଣଙ୍କୁ ୧୩ଟି ଆଶ୍ରୟସ୍ଥଳିକୁ ସ୍ଥାନାନ୍ତର କରାଯାଇଛି । ୭୨୬୪ଟି ଗୃହପାଳିତ ପଶୁପକ୍ଷୀ ବନ୍ୟା ଦ୍ୱାରା ପ୍ରଭାବିତ ହୋଇଥିବା ବେଳେ ୨୧୫୦.୪୦୬ ହେକ୍ଟର ଜମି ଜଳମଗ୍ନ ହୋଇଥିବା ପ୍ରାଥମିକ ଆକଳନରୁ ଜଣାଯାଇଛି ।
ଖୋର୍ଦ୍ଧା ବ୍ଲକର ବନ୍ୟା ସ୍ଥିତି ନେଇ ବିଡିଓ କ୍ଷୀରାବ୍ଧୀ ତନୟା ସାହୁ କହିଛନ୍ତି ଯେ ଘାଇ ହେତୁ ଜଳବନ୍ଦୀରେ ରହିଥିବା ଗାଁଗୁଡ଼ିକର ଜଳପତ୍ତନ ବଢ଼ୁଛି । ଆଜି ସେ ଓ ତହସିଲଦାରଙ୍କ ନେତୃତ୍ୱରେ ଏକ ଟିମ୍ ଦିନ ତମାମ ବନ୍ୟା ପ୍ରଭାବିତ ଗାଁଗୁଡ଼ିକର ସ୍ଥିତି ନିରୀକ୍ଷଣ କରିଥିଲେ । ଶରଧାପୁରରେ ରନ୍ଧନଖାଦ୍ୟ ଆଜି ଠାରୁ ଦିଆଯାଇଛି, ଗୋଖାଦ୍ୟ ମଧ୍ୟ ଗାଁରେ ବଂଟନ କରାଯାଇଛି । ତହସିଲଦାର କେତେକ ପ୍ରଭାବିତଙ୍କୁ ତାର୍ପୁଲିନ୍ ବଂଟନ କରିଥିଲେ । ପରିସ୍ଥିତି ଉପରେ ନଜର ରଖାଯାଇଛି, ଦୁଇ-ତିନି ଦିନ ମଧ୍ୟରେ ପରିସ୍ଥିତିରେ ସୁଧାର ଆସିବ ବୋଲି ଅନୁମାନ କରାଯାଉଛି ।