ଖଡ଼ିଆଳ: ନୂଆପଡ଼ା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ୩୫୩ ଜାତୀୟ ରାଜପଥର ଚଲାନପଡ଼ା ବଡ଼ପୋଲ ପାଖରେ ଏକ ଟ୍ରକ୍ ଓ କାର୍ ମଧ୍ୟରେ ଧକ୍କା ହୋଇଥିଲା। ଫଳରେ କାର୍ରେ ଥିବା ବଡ଼ଦୋହେଲ ଗ୍ରାମର ସେନାପତି ବାଗ (୩୬) ଓ ସ୍ତ୍ରୀ ସରିତା ବାଗ (୩୨)ଙ୍କ ମୃତ୍ୟୁ ଘଟିଛି।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂତ୍ରରୁ ପ୍ରକାଶ ଯେ, ଶୁକ୍ରବାର ଅପରାହ୍ଣ ୪ଟାରେ ବଡ଼ଦୋହେଲ ଗ୍ରାମର ସେନାପତି ଓ ସ୍ତ୍ରୀ ସରିତା ଏକ କାର୍ (ସିଜି ୦୪ ଏଫ୍ଡି ୮୧୦୦)ରେ ନୂଆପଡ଼ା ପଟକୁ ଯାଉଥିଲେ। ଚଲାନପଡ଼ା ବଡ଼ପୋଲ ନିକଟରେ ବିପରୀତ ଦିଗରୁ ଆସୁଥିବା ଏକ କଣ୍ଟେନର (ଏପି ୩୯ ଟି ଏକ୍ସ ୬୮୫୯) କାର୍କୁ ଧକ୍କା ଦେଇଥିଲା। ସ୍ୱାମୀ ଓ ସ୍ତ୍ରୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଖଡ଼ିଆଳ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାର ଉଭୟଙ୍କ ମୃତ୍ୟୁ ହୋଇଯାଇଥିଲା। ମୃତକଙ୍କ ଦୁଇ ପୁଅ ସରୋଜ ବାଗ (୧୧ ବର୍ଷ) ଓ ରାଜବିର ବାଗ (୯ ବର୍ଷ) ଏବଂ ଝିଅ ଚୈତ୍ରା ବାଗ (୬ ବର୍ଷ) ଅଛନ୍ତି। ଦୁର୍ଘଟଣା ପରେ କଣ୍ଟେନରକୁ ୫ କିମି ଦୂରରେ ଛାଡ଼ି ଡ୍ରାଇଭର ଫେରାର ହୋଇ ଯାଇଥିବା ଜଣାପଡ଼ିଛି। ଘଟଣାର ତଦନ୍ତ ଚାଲିଥିବା ଥାନା ଅଧିକାରୀ ପ୍ରଦୀପ ଧାରୁଆ ପ୍ରକାଶ କରିଛନ୍ତି।