ଟୀକା ପାଇଁ ପ୍ରବଳ ଭିଡ଼ ; ପୁଲିସ ସହ ଯୁକ୍ତିତର୍କ
ଜୟପୁର: ତିନି ଦିନ ପରେ ଆଜି କୋଭିଡ୍ ଟୀକାଦାନ ହୋଇଥିଲା। ତେବେ ତିନୋଟି ଯାକ ଟୀକାଦାନ କେନ୍ଦ୍ରରେ ସକାଳ ୬ ଟାରୁ ହିଁ ପ୍ରବଳ ଭିଡ଼ ଦେଖିବାକୁ ମିଳିଥିଲା ଲୋକେ ସାମାଜିକ ଦୂରତାକୁ ଭୁଲି ନିଜ ଜୀବନ ବଂଚାଇବାକୁ ଲମ୍ବା ଲାଇନ୍ ଲଗାଇ ଠିଆ ହୋଇଥିବା ଦେଖିବାକୁ ମିଳିଥିଲା। ଆଜି ଜୟପୁର ପୌରପାଳିକା ଓ ବ୍ଲକରେ ୬ଟି ସ୍ଥାନରେ ୧୧୮୦ ଜଣଙ୍କୁ ଟୀକା ଦିଆଯାଇଥିଲା। ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରବଳ ଭିଡ ଜମିଥିବା ଦେଖିବାକୁ ମିଳିଥିଲା। ଭିଡ଼ ନିୟନ୍ତ୍ରଣ କରୁଥିବା ପୁଲିସ ଓ ଲୋକଙ୍କ ମଧ୍ୟରେ କଥା କଟାକଟି ଓ ଯୁକ୍ତିତର୍କ ହୋଇଥିଲା। ଜିଲ୍ଲା ମୁଖ୍ୟ ଚିକିତ୍ସାଳୟରେ ଲୋକଙ୍କୁ ଛାଇ ଦେବା ପାଇଁ ଟେଣ୍ଟ ଓ ବସିବା ପାଇଁ ଚେୟାର ପଡ଼ିଥିଲେ ହେଁ କୋଭିଡ୍ ହସ୍ପିଟାଲ ଓ ଲାଲଗୁଡା ପରିସର କେନ୍ଦ୍ରରେ ସେଭଳି କିଛି ବ୍ୟବସ୍ଥା ହୋଇନଥିଲା।
Sambad is now on WhatsApp
Join and get latest news updates delivered to you via WhatsApp
ପ୍ରବଳଖରାରେ ଦୀର୍ଘ ସମୟ ଧରି ଲୋକେ ସେଭଳି ଠିଆ ହୋଇ ରହିଥିବା ଦେଖିବାକୁ ମିଳିଥିଲା। ବହୁ ବରିଷ୍ଠ ନାଗରିକ ବସିବା ପାଇଁ ସ୍ଥାନ ନ ପାଇ ଉପଖଣ୍ଡ କୋଭିଡ୍ ହସ୍ପିଟାଲ ଓ ଲାଲଗୁଡା କେନ୍ଦ୍ର ନିକଟରେ ତଳେ ବସି ପଡ଼ିଥିବା ଦେଖିବାକୁ ମିଳିଥିଲା। ଆଜି ଜିଲ୍ଲା ମୁଖ୍ୟ ଚିକିତ୍ସାଳୟରେ ୨୭୨, ଲାଲଗୁଡା ଓ କୋଭିଡ୍ ହସ୍ପିଟାଲରେ ୧୭୬ ଲେଖାଏଁ, କୁମୁଲିପୁଟ (ରାବଣାଗୁଡା ସିଏଚସି)ରେ ୩୦୧, ବଡ଼ଜିଉନାରେ ୧୮୭, ହଡପାରେ ୬୮ ଏଭଳି ୧୧୮୦ଜଣଙ୍କୁ ଟୀକା ଦିଆଯାଇଥିଲା।