ପିପିଲି: ବ୍ରିଜ ପାଇଁ ନିର୍ମାଣାଧୀନ ପିଲର୍ ଭିତରେ ଖସିପଡିଲା ଚିତା ବାଘ ଭଳି ଦିଶୁଥିବା ଯନ୍ତୁ | ପୁରୀ ଜିଲ୍ଲା ପିପିଲି ଥାନା ଅନ୍ତର୍ଗତ ଶୁଆବରି ଗ୍ରାମରେ ଆଜି ଏମିତି ଏକ ଘଟଣା ଦେଖିବାକୁ ମିଳିଛି | ସୂଚନା ମୁତାବକ ପିପିଲିର ଶୁଆବରି ନିକଟରେ ଥିବା ଗଙ୍ଗୁଆ ନଦୀ ଉପରେ ଏକ ବ୍ରିଜ ନିର୍ମାଣ ହେଉଥିଲା | ଏଥିପାଇଁ ଉଦ୍ଦିଷ୍ଟ ପିଲରରେ ଆଜି ସକାଳେ ବର୍ଷା ଯୋଗୁଁ ପାଣି ଜମିଯାଇଥିଲା | ଏହି ସମୟରେ ଏକ ଚିତା ବାଘ ଭଳି ଦେଖା ଯାଉଥିବା ଯନ୍ତୁ ପିଲର ଭିତରେ ଖସିପଡିଥିଲା | କେତେକ ଏହାକୁ ଚିତା ବାଘ ନୁହେଁ ‘ଫିସିଙ୍ଗ କ୍ୟାଟ୍’ ବୋଲି କହିଛନ୍ତି। ସ୍ଥାନୀୟ ଲୋକେ ବନ ବିଭାଗକୁ ଖବର ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ବାଘଟିର ଚିତ୍କାର ଶୁଣି ଗ୍ରାମବାସୀ ଆସି ଘଟଣାସ୍ଥଳରେ ପହଂଚିଥିଲେ | ବାଘଟିକୁ ଉଦ୍ଧାର କରିବା ପାଇଁ ଗ୍ରାମବାସୀମାନେ ପ୍ରଚେଷ୍ଟା ଚଳାଇଛନ୍ତି | ଶେଷ ଖବର ସୁଦ୍ଧା ବାଘଟି ପିଲର ମଧ୍ୟରୁ ଉଦ୍ଧାର ହୋଇପାରିନାହିଁ |
ଏକ ବାଉଁଶ ଦ୍ୱାରା ବାଘଟିକୁ ଉପରକୁ ଆଣିବାକୁ ଚେଷ୍ଟା କରାଯାଇଥିଲେ ବି ଏହା ବିଫଳ ହୋଇଛି | ଗ୍ରାମବାସୀ ଏ ବାବଦରେ ବନ ବିଭାଗକୁ ଜଣାଇଛନ୍ତି | ତେବେ ଚିତା ବାଘଟି କେଉଁଠୁ ଆସିଲା ତାହା ଜଣାପଡିନାହିଁ | ବାଘଟି ରାତିରେ ଏହି ବାଟ ଦେଇ ଯାଉଥିବାବେଳେ ଖସିପଡିଥିବାର ଗ୍ରାମବାସୀ ସନ୍ଦେହ କରୁଛନ୍ତି |