ସଙ୍କଟ ବେଳେ ଏକାଥରକେ ଏତେ ଲୋକଙ୍କୁ କେମିତି ସାହାଯ୍ୟ କରୁଛନ୍ତି ସୋନୁ ?

ଏହି ଭିଡିଓରେ ଆପଣ ଯାହାଙ୍କୁ ଦେଖୁଛନ୍ତି, ସେ ହେଉଛନ୍ତି ସୋନୁଙ୍କ କ୍ଷୀରବାଲା ଗୁଡୁ ଭାଇ । ସୋନୁ ତାଙ୍କୁ ପଚାରୁଛନ୍ତି, ମୁଁ ଯେଉଁ ନମ୍ବରଟା ଆପଣଙ୍କୁ ଦେଇଥିଲି, ସେଥିରେ ଯେଉଁ କଲ୍ ସବୁ ଆସୁଛି, ଆପଣ ସମସ୍ତଙ୍କ କଥା ଶୁଣୁଛନ୍ତି କି ନାହିଁ । ସୋନୁଙ୍କ ପ୍ରଶ୍ନର ଉତ୍ତର ଦେଇ କ୍ଷୀରବାଲା କହୁଛନ୍ତି, ସାହାଯ୍ୟ ପାଇଁ କେତେବେଳେ ରାତି ୧ଟାରେ କଲ୍ ଆସୁଛି, କେତେବେଳେ ରାତି ୪ଟାରୁ ବି । ଏପରିକି ସେ ବିରକ୍ତି ପ୍ରକାଶ ମଧ୍ୟ କରୁଛନ୍ତି । ସୋନୁ କହୁଛନ୍ତି, ତାଙ୍କ ପାଖକୁ ବି କଲ୍ ଆସୁଛି, ସେ ବି ଧୈର୍ଯ୍ୟର ସହ ଲୋକଙ୍କ କଥା ଶୁଣୁଛନ୍ତି । ସୋନୁଙ୍କୁ ଉତ୍ତର ଦେଇ ଗୁଡୁ କହୁଛନ୍ତି, ମୋର ଆପଣଙ୍କ ଭଳି କାପାସିଟି ନାହିଁ ।

ତେବେ ଏହି ଭିଡିଓକୁ ସେୟାର କରି କ୍ୟାପସନରେ ସୋନୁ ଲେଖିଛନ୍ତି, ମୋ କ୍ଷୀରବାଲା ଗୁଡୁ ବି ହାତ ଟେକି ଦେଇଛନ୍ତି । ସେ ଆଉ ବୋଝ ସମ୍ଭାଳି ପାରୁନାହାନ୍ତି । ଯିଏବି ଏହା ଜାଣିବାକୁ ଚାହୁଁଛନ୍ତି, ଯେ ମୁଁ କେମିତି ଏତେ ଲୋକଙ୍କୁ ସାହାଯ୍ୟ କରୁଛି, ସେମାନେ ଆସନ୍ତୁ, ମୋ ସହ ଗୋଟିଏ ଦିନ ରହିକି ଦେଖନ୍ତୁ ।

ଦିନର ୨୪ ଘଂଟାରୁ ୨୨ ଘଂଟା ଧରି ଅହରହ ଲୋକଙ୍କୁ ସାହାଯ୍ୟ କରିବା କାମ କରୁଛନ୍ତି ସୋନୁ । ସେ କହିଛନ୍ତି ଦିନକୁ ତାଙ୍କୁ ୪୦ ହଜାରରୁ ୫୦ ହଜାର ଅନୁରୋଧ ଆସୁଛି । ସୋନୁ କୁହନ୍ତି, ଯଦି ସମୁଦ୍ରରେ କେହି ବୁଡିଯାଉଛି, ତେବେ ସାହାଯ୍ୟ ପାଇଁ ସମୁଦ୍ର ଭିତରକୁ ଡେଇଁବାକୁ ପଡିବ । ସମୁଦ୍ରର ଢେଉ ଆଉ ଲହରି ଆପଣଙ୍କୁ ପହଁରା ଶିଖାଇଦେବ । ସତରେ, ପରଦାର ଏହି ଖଳନାୟକ, ସତ ଜୀବନରେ କିନ୍ତୁ ନାୟକ ସାଜିଛନ୍ତି । ଆଉ ସେଇଥିପାଇଁ ତ କୋଟି କୋଟି ଭାରତୀୟଙ୍କ ହୃଦୟ ଭିତରେ ସ୍ୱତନ୍ତ୍ର ଜାଗାଟିଏ କିଣିପାରିଛନ୍ତି ହୃଦୟର ହିରୋ ସୋନୁ ସୁଦ୍ । ଆଉ ପୂରା ଦୁନିଆ ଆଜି ସୋନୁଙ୍କୁ ସାଲ୍ୟୁଟ୍ କରୁଛି ।