ବିମୁଦ୍ରୀକରଣକୁ ୫ ବର୍ଷ : କମିଲା କି କଳାଧନ ?
ଭୁବନେଶ୍ବର : ଆଜି ବିମୁଦ୍ରୀକରଣକୁ ୫ ବର୍ଷ ପୂରଣ ହୋଇଛି । ୨୦୧୬, ନଭେମ୍ବର ୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହଠାତ୍ ୫୦୦ ଓ ୧ ହଜାର ଟଙ୍କିଆ ନୋଟର ବିମୁଦ୍ରୀକରଣ ସମ୍ପର୍କରେ ଘୋଷଣା କରି ସମସ୍ତଙ୍କୁ ଚକିତ କରିଦେଇଥିଲେ । ନିଜର ସେହି ଭାଷଣରେ ମୋଦୀ ବିମୁଦ୍ରୀକରଣ ସମ୍ପର୍କରେ ଯୁକ୍ତି ବାଢି କହିଥିଲେ ଯେ ଏହା ଦ୍ବାରା କଳାଧନ, ନକଲି ନୋଟ କାରବାର ଓ ଆତଙ୍କବାଦ ଲୋପପାଇବ । କିନ୍ତୁ ୫ ବର୍ଷ ପରେ ଏସବୁ ଲକ୍ଷ୍ୟ ହାସଲ ହୋଇଥିବା ଭଳି ମନେ ହେଉନାହିଁ । କାରଣ ଏବେ କଳାଧନ ଲୋପପାଇଛି ବୋଲି କୁହାଯାଇପାରିବ ନାହିଁ, ନକଲି ନୋଟ କାରବାର ଯଥାରୀତି ଚାଲୁ ରହିଛି ଓ ଆତଙ୍କବାଦ ଟିକିଏ କମିଥିଲେ ବି ନିର୍ମୂଳ ହୋଇନାହିଁ । ଏଣୁ ସରକାରଙ୍କ ଏହି ପଦକ୍ଷେପ ଯେ ଏକ ବିଫଳ ଓ ଅପରିଣାମଦର୍ଶୀ ପଦକ୍ଷେପ ଥିଲା ସେଥିରେ ସମସ୍ତେ ଏକମତ ହେବେ ।
Sambad is now on WhatsApp
Join and get latest news updates delivered to you via WhatsApp
ବିମୁଦ୍ରୀକରଣର ପରିକଳ୍ପନା କଲାବେଳେ ବୋଧହୁଏ ସରକାର ଭାବି ଥିଲେ ଯେ କଳାଧନ କେବଳ ନଗଦ ଟଙ୍କା ରୂପରେ ଗଚ୍ଛିତ ଅଛି । କିନ୍ତୁ କଳାଧନ ବିଭିନ୍ନ ରୂପରେ ଦେଶରେ ମହଜୁଦ ରହିଛି । ଉଦାହରଣସ୍ବରୂପ ଲୋକମାନେ ନିଜର ପୁରୁଣା ନୋଟକୁ ବଦଳାଇ ସୁନା କିଣିଥିଲେ । ଏଣୁ ଏ କ୍ଷେତ୍ରରେ କଳାଧନ ସୁନାକୁ ପରିବର୍ତ୍ତିତ ହୋଇଛି ବୋଲି କୁହାଯାଇପାରେ । ସେହିପରି ଦେଶରେ ଜିଏସଟି ଲାଗୁ ପରେ ଶହ ଶହ କୋଟି ଟଙ୍କାର ଜିଏସଟି ଠକେଇ ଧରାପଡୁଛି । କିନ୍ତୁ ଯେଉଁ ଗୁଡ଼ିକ ଧରା ପଡ଼ୁନାହିଁ ତାହା କଳାଧନ ବୋଲି କୁହାଯାଇପାରେ । ଅନ୍ୟପକ୍ଷରେ ଦେଶରେ ଏବେ ବି ନକଲି ନୋଟ କାରବାର ଜାରି ରହିଛି । ବିଦେଶୀ ରାଷ୍ଟ୍ରଙ୍କ ସମର୍ଥନରେ ଏହା ଚାଲୁଥିବାରୁ ତାହାକୁ ଲୋପ କରିବା କଷ୍ଟକର ହୋଇପଡ଼ିଛି । ଅନ୍ୟପକ୍ଷରେ ଆତଙ୍କବାଦ ପାଇଁ ବିଭିନ୍ନ ଉପାୟରେ ଟଙ୍କା ଆସୁଛି । ହାଓ୍ବାଲା ମାଧ୍ୟମରେ ଡଲାର ଆସୁଛି ଓ ତାହାକୁ ଦେଶରେ ଟଙ୍କାରେ ପରିବର୍ତ୍ତନ କରାଯାଉଛି । ସେହିପରି ଡ୍ରଗ୍ସ ବ୍ୟବସାୟର ଅର୍ଥ ବି ଆତଙ୍କବାଦରେ ବିନିଯୋଗ ହେଉଛି ।