ସୁଦାନ ଗୃହଯୁଦ୍ଧରେ ଫସିଥିବା ଖାରତୁମ ଅନାଥାଶ୍ରମର ୬୦ ଶିଶୁଙ୍କ ମୃତ୍ୟୁ
ଖାରତୁମ: ସୁଦାନର ସେନା ଓ ଅର୍ଦ୍ଧସାମରିକ ବାହିନୀ ମଧ୍ୟରେ ପ୍ରାୟ ଦୁଇମାସ ହେଲା ଯୁଦ୍ଧ ଚାଲିଥିବା ବେଳେ ଖାରତୁମର ଏକ ଅନାଥାଶ୍ରମରେ ଅନ୍ୟୂନ ୬୦ ଜଣ ଶିଶୁ ଓ କିଶୋରଙ୍କର ଗତ ଦେଢ଼ମାସ ଭିତରେ ମୃତ୍ୟୁ ହୋଇଛି। ଖାଦ୍ୟ ଅଭାବ ଓ ଜ୍ବର ଆଦି କାରଣରୁ ଏହି ପିଲାମାନଙ୍କର ମୃତ୍ୟୁ ଘଟିଥିବା କୁହାଯାଉଛି।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହାନ୍ତରେ ଦୁଇଦିନରେ ୨୬ ଜଣ ପିଲାଙ୍କର ମୃତ୍ୟୁ ହୋଇଥିବା ଏକ ରିପୋର୍ଟରୁ ଜଣାପଡ଼ିଛି। ଅଲ୍-ମେକୋମା ଅନାଥାଶ୍ରମର କର୍ମୀମାନେ ଛାଡ଼ିଥିବା ହୃଦୟବିଦାରକ ଭିଡ଼ିଓରେ ପୋତାହେବା ଅପେକ୍ଷାରେ ରହିଥିବା ଧଳା କପଡ଼ା ଆବୃତ ଶିଶୁଙ୍କ ଶବ ଦେଖିବାକୁ ମିଳୁଛି। ଆଉ ଏକ ଭିଡ଼ିଓରେ ୨୦ରୁ ଅଧିକ ଶିଶୁ କାନ୍ଦୁଥିବା ଓ ଜଣେ ମହିଳା ଏକ ଧାତବ ପାତ୍ରରେ ପାଣି ନେଉଥିବା ଦେଖିବାକୁ ମିଳୁଛି। ଜଣେ ଅନାଥାଶ୍ରମ କର୍ମଚାରୀ କହିଛନ୍ତି, ଗତ ସପ୍ତାହରେ ଉକ୍ତ ଅଞ୍ଚଳରେ ପ୍ରବଳ ଗୁଳିଗୋଳା ମାଡ଼ ଯୋଗୁ ଅନାଥାଶ୍ରମ ଧୂଳି ଓ ଧୂଆଁ ଦ୍ବାରା ଆଚ୍ଛାଦିତ ହୋଇଯାଇଥିଲା। ଏହା ଏକ ଭୟଙ୍କର ପରିସ୍ଥିତି ବୋଲି ଅନାଥାଶ୍ରମ କର୍ମଚାରୀ ଅଫକାର ଓମର ମୁସ୍ତାଫା କହିଛନ୍ତି। ଯୁଦ୍ଧ ଯୋଗୁ ଅନାଥାଶ୍ରମର ପିଲାମାନେ ଉପଯୁକ୍ତ ଖାଦ୍ୟ ଓ ଔଷଧ ଆଦିରୁ ବଞ୍ଚିତ ହୋଇ ମୃତ୍ୟୁ ବରଣ କରୁଥିବା ସେ କହିଛନ୍ତି। ସୁଦାନର ଡକ୍ଟର୍ସ ସିଣ୍ଡିକେଟ୍ ପକ୍ଷରୁ କୁହାଯାଇଛି ଯେ ଯୁଦ୍ଧ ଯୋଗୁ ଅଦ୍ୟାବଧି ଅନ୍ୟୂନ ୧୯୦ ଶିଶୁ ସମେତ ୮୬୦ ଜଣ ସାଧାରଣ ନାଗରିକଙ୍କର ମୃତ୍ୟୁ ଘଟିସାରିଲାଣି।