ପୁଣି ବିମାନ ଯାତ୍ରା ସୁବିଧା ପାଇବେ କେନ୍ଦ୍ରୀୟ ପାରାମିଲିଟାରୀ ଫୋର୍ସ
ନୂଆଦିଲ୍ଲୀ: କେନ୍ଦ୍ରୀୟ ପାରାମିଲିଟାରୀ ଫୋର୍ସର ଯବାନ ପୁଣି ଥରେ ବିମାନ ଯାତ୍ରା ସୁବିଧା ପାଇବାକୁ ଯାଉଛନ୍ତି। ଏ ବାବଦରେ କେନ୍ଦ୍ର ଗୃହ ମନ୍ତ୍ରାଳୟ ଅନୁମତି ଦେଇଛି | କେନ୍ଦ୍ରୀୟ ପାରାମିଲିଟାରୀ ଫୋର୍ସର ଯବାନ ବିମାନରେ ଯିବା ସୁବିଧା ବା ‘ଏୟାର କ୍ୟୁରିଅର୍ ସର୍ଭିସ’ ୧୬ ସେପ୍ଟେମ୍ବରରୁ ପୁଣି ଆରମ୍ଭ ହେବ | ଏହି ସେବା ସାତ ମାସ ପାଇଁ ବୃଦ୍ଧି କରାଯାଇଛି | ଅର୍ଥାତ୍ ୩୧ ମାର୍ଚ୍ଚ ୨୦୨୨ ଯାଏଁ କେନ୍ଦ୍ରୀୟ ପାରାମିଲିଟାରୀ ଫୋର୍ସର ଯବାନମାନେ ‘ଜମ୍ମୁ-ଶ୍ରୀନଗର’ ଏବଂ ‘ଉତ୍ତର ପୂର୍ବ’ ମାର୍ଗରେ ବିମାନ ସେବା ବ୍ୟବହାର କରିପାରିବେ। କେନ୍ଦ୍ର ଗୃହ ମନ୍ତ୍ରାଳୟ ଯବାନଙ୍କ ସୁରକ୍ଷାକୁ ଦୃଷ୍ଟିରେ ରଖି ‘ଏୟାର କ୍ୟୁରି ସେବା’ ପୁନଃ ଆରମ୍ଭ କରିବାକୁ ନିଷ୍ପତ୍ତି ନେଇଛି। ଆଫଗାନିସ୍ତାନରେ ତାଲିବାନ ଶାସନ ପରେ ଆଶଙ୍କା କରାଯାଉଛି ଯେ ପାକିସ୍ତାନରୁ ବହୁ ସଂଖ୍ୟକ ଆତଙ୍କବାଦୀ ଜମ୍ମୁକଶ୍ମୀରରେ ପ୍ରବେଶ କରିପାରନ୍ତି।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ବିଶେଷଜ୍ଞମାନେ ମଧ୍ୟ ଆଶଙ୍କା କରିଛନ୍ତି ଯେ, ପାକିସ୍ତାନର ଗୁପ୍ତଚର ଏଜେନ୍ସି ଆଇଏସ୍ଆଇ, ଜୈସ, ଲଶ୍କର, ହକ୍କାନି ଏବଂ ଆଇଏସ୍-କେପି ଭଳି ଆତଙ୍କବାଦୀ ସଂଗଠନ ସହିତ ମିଶି ଜମ୍ମୁକଶ୍ମୀରରେ ଅଶାନ୍ତି ସୃଷ୍ଟି କରିବାକୁ ଚେଷ୍ଟା କରିପାରେ । ଏଭଳି ପରିସ୍ଥିତିରେ ଯବାନମାନେ ସଡକ ମାର୍ଗରେ ଯିବା ସମୟରେ ଆତଙ୍କବାଦୀ ଆକ୍ରମଣ ହେବାର ଆଶଙ୍କା ରହିଛି। ଆତଙ୍କବାଦୀମାନେ ସୁରକ୍ଷା ବାହିନୀକୁ କ୍ଷତି ପହଞ୍ଚାଇବା ପାଇଁ ଆଇଇଡି, ହ୍ୟାଣ୍ଡ ଗ୍ରେନେଡ, ଡ୍ରୋନ ବ୍ୟବହାର କରିପାରନ୍ତି। ତେଣୁ ଯବାନମାନେ ସଡକ ମାର୍ଗରେ ନ ଯାଇ ବିମାନରେ ଜମ୍ମୁକଶ୍ମୀର ଯିବେ ବୋଲି ଗୃହ ମନ୍ତ୍ରାଳୟ ନିଷ୍ପତ୍ତି ନେଇଛି | ସୂଚନା ଥାଉ କି ଯେ ୨୦୧୯ ରେ ପୁଲୱାମା ଆକ୍ରମଣ ପୂର୍ବରୁ ମଧ୍ୟ ବିମାନ ଯାତ୍ରା ସେବା ସୁବିଧା ଯୋଗାଇବାକୁ କେନ୍ଦ୍ର ସରକାରଙ୍କୁ ଅନୁରୋଧ କରାଯାଇଥିଲା। ସେତେବେଳେ କେନ୍ଦ୍ର ଗୃହ ମନ୍ତ୍ରାଳୟ ବିମାନ ଯାତ୍ରା ସେବାକୁ ଅନୁମୋଦନ କରିନଥିଲା। ଫଳସ୍ୱରୂପ, ଯବାନମାନେ ସଡକ ମାର୍ଗରେ ଯାଇଥିଲେ |
ଆଉ ଫେବୃଆରୀ ୧୪ ରେ, ଯବାନଙ୍କ ଉପରେ ଆତ୍ମଘାତୀ ଆକ୍ରମଣ ହୋଇଥିଲା | ସେହି ଆକ୍ରମଣରେ ୪୦ ଜଣ ଯବାନ ସହିଦ ହୋଇଥିଲେ। ଏହା ପରେ ତତ୍କାଳୀନ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂ ‘ଏୟାର କ୍ୟୁରି ସେବା’ ସୁବିଧା ଘୋଷଣା କରିଥିଲେ। ନିକଟରେ ଅଗଷ୍ଟ ୩୧ ପରେ ‘ଦିଲ୍ଲୀ-ଶ୍ରୀନଗର-ଦିଲ୍ଲୀ’ ଏବଂ ‘ଶ୍ରୀନଗର-ଜାମ୍ମୁ-ଶ୍ରୀନଗର’ ରୁଟରେ ‘ଏୟାର କ୍ୟୁରିଅର୍ ସର୍ଭିସ’ ଆଗକୁ ବ ନ ବଢାଇବାକୁ ଗୃହ ମନ୍ତ୍ରାଳୟ ନିଷ୍ପତ୍ତି ନେଇଥିଲା | କିନ୍ତୁ ଏହାକୁ ପ୍ରତିରକ୍ଷା ବିଶେଷଜ୍ଞ ବିରୋଧ କରିବାରୁ ‘ଏୟାର କ୍ୟୁରିଅର୍ ସର୍ଭିସ’କୁ ଚାଲୁ ରଖିବାକୁ ଗୃହ ମନ୍ତ୍ରାଳୟ ନିଷ୍ପତ୍ତି ନେଇଛି |