ଲଗାତାର ପାକିସ୍ତାନରୁ ଡ୍ରୋନ୍ ଯୋଗେ ଆସୁଛି ଅସ୍ତ୍ରଶସ୍ତ୍ର
ଶ୍ରୀନଗର: କରୋନା ମହାମାରୀ ସତ୍ତ୍ୱେ ପାକିସ୍ତାନ ପକ୍ଷରୁ ଭାରତକୁ ଡ୍ରୋନ ମାଧ୍ୟମରେ ଅସ୍ତ୍ରଶସ୍ତ୍ର ପଠାଇବା ଜାରି ରହିଛି | ଆଉ ସୁରକ୍ଷାକର୍ମୀ ମଧ୍ୟ ଏହା ଉପରେ ସତର୍କ ନଜର ରଖିଛନ୍ତି | ମିଳିଥିବା ସୂଚନା ମୁତାବକ ଶନିବାର ମଧ୍ୟରାତ୍ରିରେ ପାକିସ୍ତାନ ଜାମ୍ମୁର କାନାଚାକ୍ ସେକ୍ଟରକୁ ଡ୍ରୋନ୍ ପଠାଇଥିଲା । ଡ୍ରୋନ୍ ଅନୁପ୍ରବେଶ ପରେ ସୁରକ୍ଷାବାହିନୀ ସମଗ୍ର କାନାଚାକ୍ ସେକ୍ଟରରେ ବ୍ୟାପକ ସର୍ଚ୍ଚ ଅପରେସନ୍ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଜାମ୍ମୁ ପୁଲିସ ସୂଚନା ପାଇଥିଲା ଯେ ଶନିବାର ବିଳମ୍ବିତ ରାତିରେ ଜାମ୍ମୁର କାନାଚାକ୍ ଅଂଚଳରେ ଏକ ଡ୍ରୋନ ଉଡୁଥିବା ନେଇ ଗ୍ରାମବାସୀ ଦେଖିଥିଲେ | ଆଉ ଗ୍ରାମବାସୀଙ୍କ ସୂଚନା ଆଧାରରେ ସେନା ଏବଂ ସାମରିକ ବାହିନୀ ରବିବାର ସକାଳେ ସର୍ଚ୍ଚ ଅପରେସନ୍ କରିଥିଲେ | ସୁରକ୍ଷାବାହିନୀର କହିବାନୁସାରେ, ଏହି ସର୍ଚ୍ଚ ଅପରେସନରେ ସେଭଳି କୌଣସି ଡ୍ରୋନ୍ ମିଳିନାହିଁ |
ତଥାପି ପାକିସ୍ତାନର ଏହି ଘୃଣ୍ୟ ଷଡଯନ୍ତ୍ର ଉପରେ ସୁରକ୍ଷା ବାହିନୀ ମଧ୍ୟ ନିରନ୍ତର ନଜର ରଖିଛନ୍ତି। ଏଠାରେ ଉଲ୍ଲେଖଯୋଗ୍ୟ ଯେ ଶନିବାର ଦିନ ଜାମ୍ମୁର ସାମ୍ବା ସେକ୍ଟରରେ ପାକିସ୍ତାନ ଡ୍ରୋନ୍ ଦ୍ୱାରା ଅସ୍ତ୍ରଶସ୍ତ୍ର ପଠାଯାଇଥିଲା। ସାମ୍ବାରେ ଏକ ଏକେ-47 ରାଇଫଲ, ପିସ୍ତଲ ସମେତ ସୁରକ୍ଷା ବାହିନୀ ବହୁମାତ୍ରାରେ ଗୁଳି ଜବତ କରିଛି।