ବିହାରରେ କରୋନାଭାଇରସ୍ ଆକ୍ରାନ୍ତ ୩୮ବର୍ଷିୟ ବ୍ୟକ୍ତିଙ୍କ ମୃତ୍ୟୁ; ଭାରତରେ ମୃତ୍ୟୁ ସଂଖ୍ୟା ୬କୁ ବୃଦ୍ଧି

ପାଟନା: ରବିବାର ସକାଳେ ବିହାରର ପାଟନାସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ’ରେ (ଏମ୍ସ୍) ଜଣେ ୩୮ ବର୍ଷିୟ ବ୍ୟକ୍ତିଙ୍କର ମୃତ୍ୟୁ ଘଟିଛି। ସେ କରୋନାଭାଇରସ ଆକ୍ରାନ୍ତ ଥିଲେ ବୋଲି ତାଙ୍କ ଠାରୁ ସଂଗ୍ରହ କରାଯାଇଥିବା ସ୍ୱାବ୍ ନମୁନାରୁ ଏବେ ଜଣାପଡ଼ିଛି । ଏହାକୁ ମିଶାଇ ଭାରତରେ କରୋନାଭାଇରସ ସଂକ୍ରମଣଜନିତ ମୃତ୍ୟୁ ସଂଖ୍ୟା ୬ରେ ପହଞ୍ଚିଛି ।

ରାଜେନ୍ଦ୍ର ମେମୋରିଆଲ୍ ରିସର୍ଚ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍’ର ନିର୍ଦେଶକ ଡାକ୍ତର ପ୍ରଦୀପ ଦାସ କହିଛନ୍ତି ଯେ କତାରରୁ ଫେରିଥିବା ଏହି ୩୮ ବର୍ଷିୟ ବ୍ୟକ୍ତିଜଣକ କୋଭିଡ୍-୧୯ରେ ଆକ୍ରାନ୍ତ ହୋଇ ପ୍ରାଣ ହରାଇଛନ୍ତି ।

ଏହାଛଡ଼ା ବିହାରରେ ଆଉ ଜଣେ ବ୍ୟକ୍ତି କରୋନାଭାଇରସରେ ସଂକ୍ରମିତ ହୋଇଥିବା କଥା ନମୁନା ପରୀକ୍ଷାରୁ ଜଣାପଡ଼ିଛି ।

କରୋନାଭାଇରସରେ ଆକ୍ରାନ୍ତ ହୋଇ ଗତ ବିଳମ୍ବିତ ରାତ୍ରୀରେ ମୁମ୍ବାଇରେ ଜଣେ ୬୩ ବର୍ଷିୟ ବ୍ୟକ୍ତି ପ୍ରାଣ ହରାଇଥିବା କଥା ଆଜି ସକାଳେ ଜଣାପଡ଼ିଥିଲା । ଏହା ଥିଲା ମହାରାଷ୍ଟ୍ରରେ କରୋନାଭାଇରସ୍ ସଂକ୍ରମଣଜନିତ ଦ୍ୱିତୀୟ ମୃତ୍ୟୁ । ପୂର୍ବରୁ ଦିଲ୍ଲୀ, ପଞ୍ଜାବ ଓ ରାଜସ୍ଥାନରେ ଜଣେ ଲେଖାଏଁ କରୋନାଭାଇରସରେ ଆକ୍ରାନ୍ତ ହୋଇ ଜୀବନ ହରାଇଥିଲେ ।