ଦୂରସଞ୍ଚାର ବିଭାଗ ପକ୍ଷରୁ ‘ଗତିଶକ୍ତି ସଞ୍ଚାର’ ପୋର୍ଟାଲ ଉନ୍ମୋଚିତ

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ଦେଶରେ, ବିଶେଷ କରି ଗ୍ରାମାଞ୍ଚଳରେ ସାର୍ବଜନୀନ ଓ ସମାନତାପୂର୍ଣ୍ଣ ବ୍ରଡ୍‌ବ୍ୟାଣ୍ଡ ସେବା ଯୋଗାଇ ଦେବା ଉପରେ ଗୁରୁତ୍ବାରୋପ କରି ଆସୁଛନ୍ତି। ପିଏମ୍ ଗତିଶକ୍ତି ଜାତୀୟ ମାଷ୍ଟର ପ୍ଲାନ ଧାରାରେ, କେନ୍ଦ୍ର ସଞ୍ଚାର, ଇଲେକ୍ଟ୍ରୋନିକ୍ସ ଏବଂ ଆଇଟି ଓ ରେଳବାଇ ମନ୍ତ୍ରୀ ଅଶ୍ବିନୀ ବୈଷ୍ଣବ ରାଇଟ୍‌ ଅଫ୍‌ ୱେ (ଆର୍‌ଓଡବ୍ଲୁ) ଅନୁମୋଦନ ପାଇଁ ‘ଗତିଶକ୍ତି ସଞ୍ଚାର’ ପୋର୍ଟାଲ (www.sugamsanchar.gov.in)କୁ ଶନିବାର ଉନ୍ମୋଚନ କରିଛନ୍ତି ।

ଏହି କାର୍ଯ୍ୟକ୍ରମରେ ବିଭିନ୍ନ ରାଜ୍ୟର ମୁଖ୍ୟ ଶାସନ ସଚିବ, ଆଇଟି ସଚିବଙ୍କ ସମେତ ସାରା ଦେଶରୁ ବହୁ ବିଶିଷ୍ଟ ବ୍ୟକ୍ତି ଅଂଶଗ୍ରହଣ କରିଥିଲେ। ବିବିଏନ୍‌ଏଲ, ଭାରତୀ ଏୟାରଟେଲ ଲିମିଟେଡ, ବିଏସ୍‌ଏନ୍‌ଏଲ/ଏମ୍‌ଟିଏନ୍‌ଏଲ, ସିଓଏଆଇ, ଡିଆଇପିଏ, ଇଣ୍ଡସ୍‌ ଟାୱାର୍ସ, ଆଇଏସ୍‌ପିଏଆଇ, ରିଲାଏନ୍ସ ଜିଓ, ଷ୍ଟେରଲାଇଟ, ଭୋଡ଼ାଫୋନ ଆଇଡିଆ ଆଦି ବିଭିନ୍ନ ଟେଲିକମ୍‌ ସେବା ପ୍ରଦାନକାରୀ ସଂସ୍ଥାର ମୁଖ୍ୟ କାର୍ଯ୍ୟନିର୍ବାହୀ, ଡିଜି, ଅଧ୍ୟକ୍ଷ ଓ ଉପାଧ୍ୟକ୍ଷମାନେ ସାମିଲ ହୋଇଥିଲେ। ଜାତୀୟ ବ୍ରଡ୍‌ବ୍ୟାଣ୍ଡ ମିସନକୁ କେନ୍ଦ୍ରରେ ରଖାଯାଇ ଏହି ପୋର୍ଟାଲକୁ ବିକଶିତ କରାଯାଇଛି। ନାଗରିକମାନଙ୍କ ମୌଳିକ ଆବଶ୍ୟକତା ଭାବେ ଏବଂ ଚାହିଦା ଅନୁସାରେ ପ୍ରଶାସନ ଓ ସେବା କ୍ଷେତ୍ରକୁ ବ୍ରଡ୍‌ବ୍ୟାଣ୍ଡ ସେବା ଯୋଗାଇଦେବାକୁ ଏହି ମିସନରେ ଲକ୍ଷ୍ୟ ରଖାଯାଇଛି। ଏହା ମାଧ୍ୟମରେ ବିଶେଷ କରି ନାଗରିକଙ୍କ ଡିଜିଟାଲ ସଶକ୍ତୀକରଣ ଉପରେ ଗୁରୁତ୍ବାରୋପ କରାଯାଇଛି।

ଦେଶବ୍ୟାପୀ, ବିଶେଷ କରି ଗ୍ରାମୀଣ ଓ ଉପାନ୍ତ ଅଞ୍ଚଳରେ ସାର୍ବଜନୀନ ଓ ସମାନତାପୂର୍ଣ୍ଣ ବ୍ରଡ୍‌ବ୍ୟାଣ୍ଡ ସେବା ଯୋଗାଇ ଦେବା ଉଦ୍ଦେଶ୍ୟରେ ଡିସେମ୍ବର ୧୭, ୨୦୧୯ରେ ଜାତୀୟ ବ୍ରଡ୍‌ବ୍ୟାଣ୍ଡ ମିସନ (ଏନ୍‌ବିଏମ୍‌) ପ୍ରତିଷ୍ଠା କରାଯାଇଥିଲା। ଏହି ଲକ୍ଷ୍ୟ ପୂରଣ କରିବା ଲାଗି ଦେଶରେ ସୁଦୃଢ଼ ତଥା ଦକ୍ଷ ଡିଜିଟାଲ ସଞ୍ଚାର ଭିତ୍ତିଭୂମି ନିର୍ମାଣ କରିବାର ଆବଶ୍ୟକତା ରହିଛି। ଏହାକୁ ସୁନିଶ୍ଚିତ କରିବା ଲାଗି ଦୂରସଞ୍ଚାର ବିଭାଗ ପକ୍ଷରୁ ‘ଗତିଶକ୍ତି ସଞ୍ଚାର’ ପୋର୍ଟାଲ ଉନ୍ମୋଚନ କରାଯାଇଛି। ଜାତୀୟ ଡିଜିଟାଲ ସଞ୍ଚାର ନୀତି-୨ରେ କରାଯାଇଥିବା ପରିକଳ୍ପନା ଅନୁଯାୟୀ, ‘‘ସମସ୍ତଙ୍କ ପାଇଁ ବ୍ରଡବ୍ୟାଣ୍ଡ’’ ଲକ୍ଷ୍ୟ ହାସଲ ନିମନ୍ତେ ଏହା ଏକ ଦୃଢ଼ ମଞ୍ଚ ଯୋଗାଇ ଦେବ।

ପୋର୍ଟାଲ ଉନ୍ମୋଚନ ଅବସରରେ କେନ୍ଦ୍ର ସଞ୍ଚାର ମନ୍ତ୍ରୀ ଉଲ୍ଲେଖ କରିଥିଲେ ଯେ, ‘‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂକଳ୍ପକୁ କାର୍ଯ୍ୟକାରୀ କରିବା ନିମନ୍ତେ ଦୂରସଞ୍ଚାର ଭିତ୍ତିଭୂମି ପାଇଁ ‘ବ୍ୟବସାୟିକ ସୁଗମତା’ ଲକ୍ଷ୍ୟ ହାଲ ଦିଗରେ ଏହି ପୋର୍ଟାଲ ସହାୟକ ହୋଇପାରିବ। ବିଭିନ୍ନ ପ୍ରକାର ସେବା ଏବଂ ଭିତ୍ତିଭୂମି ପ୍ରଦାନକାରୀମାନଙ୍କ ପାଇଁ ଆର୍‌ଓଡବ୍ଲୁ ଆବେଦନ ମଞ୍ଜୁରି ପ୍ରକ୍ରିୟା ଯଥାସମୟରେ ହୋଇପାରିଲେ ଦ୍ରୁତ ଗତିରେ ଭିତ୍ତିଭୂମି ନିର୍ମାଣ ସମ୍ଭବ ହୋଇପାରିବ ଯାହାକି ୫ଜି ନେଟ୍‌ୱର୍କର ତ୍ବରିତ କାର୍ଯ୍ୟକାରିତାକୁ ସୁନିଶ୍ଚିତ କରିବ। ପ୍ରଶାସନରେ ପ୍ରଯୁକ୍ତି ଉପଯୋଗର ଲାଭ ବିଷୟରେ ସେ ସୂଚନା ଦେଇଥିଲେ। ସମନ୍ବିତ କେନ୍ଦ୍ରୀକୃତ ଗତିଶକ୍ତି ସଞ୍ଚାର ପୋର୍ଟାଲ କାର୍ଯ୍ୟକ୍ଷମ କରିବାରେ କେନ୍ଦ୍ର ସରକାରଙ୍କ ସହିତ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶମାନଙ୍କର ଭୂମିକା ଓ ସହଯୋଗ ଉପରେ ଶ୍ରୀ ବୈଷ୍ଣବ ଗୁରୁତ୍ବାରୋପ କରିଥିଲେ।

ଏହି ପୋର୍ଟାଲ ମାଧ୍ୟମରେ ଟେଲିକମ୍‌ ସେବା ପ୍ରଦାନକାରୀ ଏବଂ ଭିତ୍ତିଭୂମି ନିର୍ମାଣକାରୀମାନେ ଅପ୍ଟିକାଲ ଫାଇବର କେବୁଲ ବିଛାଇବା ଓ ମୋବାଇଲ ଟାୱାର ପ୍ରତିଷ୍ଠା କରିବା ନିମନ୍ତେ ରାଜ୍ୟ/କେନ୍ଦ୍ରଶାସିତ ପ୍ରଦେଶ ସରକାରଙ୍କଠାରୁ ସିଧାସଳଖ ଅନୁମତି ପାଇବା ଲାଗି ଗୋଟିଏ ସାଧାରଣ ସିଙ୍ଗଲ ପୋର୍ଟାଲରେ ଆବେଦନ କରିପାରିବେ। ଆର୍‌ଓଡବ୍ଲୁ ଆବେଦନର ପ୍ରଭାବୀ ଅନୁଧ୍ୟାନ ଏହି ପୋର୍ଟାଲରେ ଏକ ଡ୍ୟାସ୍‌ବୋର୍ଡ ସୁବିଧା ରହିଛି ଯାହାକି ରାଜ୍ୟ ଓ ଜିଲ୍ଲାୱାରି ବିଳମ୍ବିତ ଆବେଦନର ସ୍ଥିତି ଦର୍ଶାଇଥାଏ।

‘ଇଜ୍‌ ଅଫ୍‌ ଡୁଇଂ ବିଜନେସ’ ବା ବ୍ୟବସାୟିକ ସୁଗମତା ଯୋଗାଇ ଦେବା ଲାଗି ଭାରତ ସରକାର ସଂକଳ୍ପବଦ୍ଧ ଏବଂ ‘ଗତିଶକ୍ତି ସଞ୍ଚାର’ ପୋର୍ଟାଲାର ଶୁଭାରମ୍ଭ କରାଯିବା ଏ କ୍ଷେତ୍ରରେ ଆଉ ଏକ ପଦକ୍ଷେପ। ଏହି ପୋର୍ଟାଲ ରାଜ୍ୟ/କେନ୍ଦ୍ର ଶାସିତ ପ୍ରଦେଶମାନଙ୍କୁ ମଧ୍ୟ ଅନେକ ସୁବିଧା ଯୋଗାଇ ଦେବ। ଏହା ଆର୍‌ଓଡବ୍ଲୁ ଅନୁମୋଦନ ପ୍ରକ୍ରିୟାକୁ ସରଳ କରିବ ଯାହାଫଳରେ- ଦ୍ରୁତ ବେଗରେ ଅଧିକ ଅପ୍ଟିକାଲ ଫାଇବର କେବୁଲ ବିଛାଇବା ସମ୍ଭବ ହେବ ଏବଂ ଫାଇବରାଇଜେସନ ତ୍ବରାନ୍ବିତ ହେବ, ଅଧିକ ସଂଖ୍ୟାରେ ଟାୱାର ପ୍ରତିଷ୍ଠା ହେବ ଏବଂ ଟେଲିକମ୍‌ ସେବାର ଗୁଣବତ୍ତାରେ ସୁଧାର ଆସିବ ଏବଂ ଦୂରସଞ୍ଚାର ଟାୱାରଗୁଡ଼ିକର ଫାଇବରାଇଜେସନ ବଢ଼ିବ, ଯାହାକି ସାରା ଦେଶରେ ବ୍ରଡ୍‌ବ୍ୟାଣ୍ଡ ଗତିରେ ସୁଧାର ଆଣିବ।