ଗୌହାଟୀ: ଆସାମର ବାଗଜାନରେ ହୋଇଥିବା ତୈଳକୂପ ଅଗ୍ନିକାଣ୍ଡ ଘଟଣାର ଆଜି ସ୍ଥିତି ଅନୁଧ୍ୟାନ କରିଛନ୍ତି କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କେନ୍ଦ୍ର ମନ୍ତ୍ରୀ ଆଜି ମୁଖ୍ୟମନ୍ତ୍ରୀ ସରବାନନ୍ଦ ସୋନୱାଲଙ୍କ ସହ ବାଗଜାନକୁ ଯାଇ ଗ୍ରାଉଣ୍ଡ୍ ଜିରୋରୁ ସ୍ଥିତି ଅନୁଧ୍ୟାନ କରିଛନ୍ତି । ଏହା ସହ ଶ୍ରୀ ପ୍ରଧାନ ପ୍ରଭାବିତଙ୍କୁ ଭେଟିବା ସହ ରିଲିଫ କାର୍ଯ୍ୟର ସମୀକ୍ଷା କରିଛନ୍ତି | ଘଟଣାସ୍ଥଳରେ ନିଆଁକୁ ନିୟନ୍ତ୍ରଣ କରିବା ତଥା ଅଧିକ କ୍ଷତି ନ ହେବା ପାଇଁ ବିଶେଷଜ୍ଞଙ୍କ ପକ୍ଷରୁ ପରିଚାଳନା କାର୍ଯ୍ୟ ଜୋର୍ସୋର୍ରେ ଚାଲିଛି। ଆମର ଦଳ ୨୪ ଘଣ୍ଟା କାର୍ଯ୍ୟ କରୁଛନ୍ତି।
Sambad is now on WhatsApp
Join and get latest news updates delivered to you via WhatsApp
ଲୋକଙ୍କ ସୁରକ୍ଷା ଓ କଲ୍ୟାଣ ପାଇଁ ପେଟ୍ରୋଲିୟମ୍ ମନ୍ତ୍ରଣାଳୟ ପ୍ରତିଶ୍ରୁତିବଦ୍ଧ ବୋଲି ଶ୍ରୀ ପ୍ରଧାନ କହିଛନ୍ତି। ଏଠାରେ ସୂଚନା ଥାଉ କି ଆସାମ ତିନସୁକିଆ ଜିଲ୍ଲାର ବାଗଜାନରେ ତୈଳକୂପରେ ଭୟଙ୍କର ଅଗ୍ନିକାଣ୍ଡ ହୋଇଥିଲା । ଏଠାରେ ଦୁଇଜଣଙ୍କର ମୃତ୍ୟୁ ହୋଇଥିଲା | ଗ୍ୟାସ ପାଇପଲାଇନରେ କୌଣସି କାରଣରୁ ନିଆଁ ଲାଗିବା ପରେ କ୍ରମଶଃ ଏହାର ସ୍ଥାନୀୟ ଅଂଚଳରେ ବ୍ୟାପିବାରେ ଲାଗିଛି ।
ନିଆଁକୁ ଆୟତ କରିବାକୁ ଏନଡିଆରଏଫ ଟିମ ଏବଂ ରାଜ୍ୟ ବିପର୍ଯ୍ୟୟ ପ୍ରଶମନ ଟିମ୍ ଉଦ୍ୟମ ଜାରି ରଖିଛି । ଏହି ଗ୍ୟାସ ଅଗ୍ନିକାଣ୍ଡ କାରଣରୁ ବ୍ୟାପକ କ୍ଷୟକ୍ଷତି ହୋଇଛି । ନିଆଁ ଏତେ ଭୟଙ୍କର ଯେ ଅଗ୍ନିକାଣ୍ଡ ତୁରନ୍ତ ଲିଭେଇବା ସମ୍ଭବ ପର ହେଉନାହିଁ । ଫଳରେ ସେଠାକାର ଲୋକେ ଭୟଭୀତ ଅବସ୍ଥାରେ ଦିନ କାଟୁଛନ୍ତି । ବର୍ତ୍ତମାନ ସୁଦ୍ଧା ୭ ହଜାର ଲୋକଙ୍କୁ ରିଲିଫ କ୍ୟାମ୍ପକୁ ସ୍ଥାନାନ୍ତର କରାଯାଇଛି |