ଆଉଏକ ସୌରଜଗତର ସନ୍ଧାନ ମିଳିଲା
ନାସାର କେପ୍ଲର ମିସନ୍କୁ ବଡ଼ ସଫଳତା
ଓ୍ଵାସିଂଟନ: ଆମେରିକୀୟ ମହାକାଶ ଗବେଷଣା ସଂସ୍ଥାନ(ନାସା)ର କେପ୍ଲର ମିସନ୍କୁ ଏକ ବଡ଼ ସଫଳତା ମିଳିଛି। ପୃଥିବୀଠାରୁ ୨ ହଜାର ୫୪୫ ଆଲୋକବର୍ଷ ଦୂରତାରେ ଆଉ ଏକ ସୌରଜଗତର ସନ୍ଧାନ ମିଳିଛି ଏହି ସୌରଜଗତରେ ୮ଟି ଗ୍ରହ ରହିଛି। ଆମ ସୌରଜଗତର ଆକାର, ପ୍ରକାର ଓ ବିଭେଦତା ସହ ଏହାର ଅନେକ ସାମଞ୍ଜସ୍ୟ ରହିଥିବା ମହାକାଶ ବୈଜ୍ଞାନିକ ଆଂଡ୍ରିୟୁ ଓ୍ଵାନ୍ଦରବର୍ଗ କହିଛନ୍ତି। ଗତ ଜୁଲାଇ ମାସରେ ଏହି ମିସନ ଜରିଆରେ ଆବିଷ୍କାର ହୋଇଥିବା ପୃଥିବୀ ପରି ଏକ ଗ୍ରହ କେପ୍ଲର-୯୦-ଆଇ ସମ୍ବନ୍ଧରେ ଅଧିକ ତଥ୍ୟ ପାଇଁ ଗବେଷଣା ସମୟରେ ଏହି ନୂତନ ସୌରଜଗତର ସନ୍ଧାନ ମଳିଛି । ଏହି ସୌରଜଗତର ସୂର୍ଯ୍ୟଙ୍କ ନାମ କେପ୍ଲର-୯୦ ରଖାଯାଇଛି।
Sambad is now on WhatsApp
Join and get latest news updates delivered to you via WhatsApp
ନାସାର ଏକ ପତ୍ରିକାକୁ ସୂଚନା ଦେଇ ବୈଜ୍ଞାନିକ କହିଛନ୍ତି ଯେ, ପୃଥିବୀ ଭଳି ଅନୁରୂପ ସୌରଜଗତର ସନ୍ଧାନ ପ୍ରଥମଥର ପାଇଁ ହୋଇଛି। ନାସା ନିର୍ଦ୍ଦେଶକ ପାଉଲ ହର୍ଜ କହିଛନ୍ତି ଏହି କେପ୍ଲର ମିସନ ପ୍ରମାଣ କରିଦେଇଛି ଯେ କେପଲର-୯୦ ସୂର୍ଯ୍ୟ ସବୁଠୁ ଭିନ୍ନ। ଠିକ୍ ଆମ ସୌର ଜଗତ ଭଳି ଦୁଇଟି ଛୋଟ ଗ୍ରହ କେପଲର ବି ଓ ସି ଯଥାକ୍ରମେ ସପ୍ତମ ଓ ନବମ ଦିନରେ ସେମାନଙ୍କ ସୂର୍ଯ୍ୟ କେପଲର ୯୦କୁ ପରିକ୍ରମା କରୁଥିବା ବେଳେ କେପଲର ଡ଼ି, ଇ,ଏବଂ ଏଫ୍ ଯଥାକ୍ରମେ ୬୦,୯୨ ଓ ୧୨୫ ଦିନରେ ତାଙ୍କ କକ୍ଷ ପଥରେ ପରିକ୍ରମା କରୁଛନ୍ତି। ଶେଷ ଦୁଇ ଗ୍ରହ କେପଲର ଜି ଏବଂ ଏଚ୍ ଯଥାକ୍ରମେ ୨୨୧ ଓ ୩୩୨ ଦିନରେ ପରିକ୍ରମା ଶେଷ କରୁଥିବା ଜଣାପଡ଼ିଛି। ଏହି ସାମଞ୍ଜସ୍ୟ କେବଳ ଏତିକିରେ ଶେଷ ହୋଇନାହିଁ। ଆମ ସୌରଜଗତର ବୁଧ, ଶୁକ୍ର, ପୃଥିବୀ ଓ ମଙ୍ଗଳ ଭଳି ୪ଟି ପଥର, ପାହାଡ଼ ବହୁଳ ଗ୍ରହ ପରି ଏଠାରେ ମଧ୍ୟ ୪ ଟି ଗ୍ରହରେ ପଥରର ପରିମାଣ ଅଧିକ ରହିଛି।