ଯୁଦ୍ଧ ଆଶଙ୍କା ବଢିଲା ! ଶନିବାର ଆଣବିକ ଯୁଦ୍ଧାଭ୍ୟାସ କରିବ ଋଷିଆ
ମସ୍କୋ : ୟୁକ୍ରେନ ସଂକଟକୁ ନେଇ ଚିନ୍ତା ଆହୁରି ବଢାଇଦେଇଛି ଋଷିଆ । ଗୋଟିଏ ପଟେ ସେନା ପ୍ରତ୍ୟାହାର କଥା କହୁଥିବାବେଳେ ଅନ୍ୟପଟେ ଆସନ୍ତା ଶନିବାର ଏକ ବଡ଼ ଧରଣର ଆଣବିକ କ୍ଷୁଦ୍ଧାଭ୍ୟାସ କରିବାକୁ ଯାଉଛି ଋଷିଆ । ଏଥିରେ ଋଷିଆର ଅନ୍ତଃମହାଦେଶୀୟ ବାଲିଷ୍ଟିକ ଓ କ୍ରୁଜ ମିସାଇଲ ଗୁଡ଼ିକର ପରୀକ୍ଷଣ କରାଯିବ । ସମ୍ଭାବ୍ୟ ଆଣବିକ ଯୁଦ୍ଧର ମୁକାବିଲା ପାଇଁ ଋଷିଆ ଏହି ଅଭ୍ୟାସ କରୁଥିବା କୁହାଯାଉଛି । ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ନିଜେ ଏହି ଆଣବିକ ଯୁଦ୍ଧାଭ୍ୟାସର ନିରୀକ୍ଷଣ କରିବେ ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଜାତିସଂଘ ମହାସଚିବ ଆଣ୍ଟୋନିଆ ଗୁଏଟାରେସ କହିଛନ୍ତି ଯେ ଋଷିଆ ୟୁକ୍ରେନ ଯୁଦ୍ଧ ହେଲେ ତାହା ସମଗ୍ର ବିଶ୍ବ ପାଇଁ ବିନାଶକୁ ଟାଣିଆଣିବ । ୟୁକ୍ରେନ ସଂକଟର ସମାଧାନ ଲାଗି ଋଷିଆ ସୈନ୍ୟ ପ୍ରତ୍ୟାହାର ସମ୍ପର୍କରେ ଘୋଷଣା କରିଥିଲେ ବି ଆମେରିକା ଓ ପାଶ୍ଚାତ୍ୟ ଦେଶମାନେ ତାହାକୁ ବିଶ୍ବାସ କରିପାରୁନାହାନ୍ତି । ଋଷିଆ ନିଶ୍ଚିତ ଭାବରେ ୟୁକ୍ରେନ ଉପରେ ଆକ୍ରମଣ କରିବ ବୋଲି ଆମେରିକା ଓ ନାଟୋ କହୁଛି । ଗତ କାଲି ଆମେରିକା ରାଷ୍ଟ୍ରପତି ଜୋ ବାଇଡେନ କହିଥିଲେ ଯେ, ଯେଉଁସବୁ ସଂକେତ ମିଳୁଛି ତାହା ଦର୍ଶାଉଛି ଯେ ଋଷିଆ ଆସନ୍ତା କିଛି ଦିନ ଭିତରେ ୟୁକ୍ରେନ ଉପରେ ଆକ୍ରମଣ କରିପାରେ । ଶୁକ୍ରବାର ବାଇଡେନ ଏହି ପ୍ରସଙ୍ଗରେ କେତେକ ପାଶ୍ଚାତ୍ୟ ରାଷ୍ଟ୍ରମୁଖ୍ୟଙ୍କ ସହ ଭିଡିଓ କନଫରେନ୍ସିଂରେ ଆଲୋଚନା କରିଛନ୍ତି ।