ନୂଆଦିଲ୍ଲୀ: ଆଫଗାନିସ୍ତାନର ବଲ୍କ ଅଞ୍ଚଳକୁ କବଜାରେ ନେବା ପରେ ଏଠାରେ ହିଂସା ଚଳାଇଛି ତାଲିବାନ୍ । ପୂର୍ବରୁ ଅନେକ ନିରୀହଙ୍କ ଜୀବନ ନେଇଥିବା ବେଳେ ଏବେ ସାମାନ୍ୟ କାରଣରୁ ଜଣେ ମହିଳାଙ୍କୁ ହତ୍ୟା କରିଛି ତାଲିବାନ୍। ଜଣେ ମହିଳା ଚିପା ପୋଷାକ ପିନ୍ଧିଥିବାରୁ ଓ ତାଙ୍କ ସହ କୌଣସି ପୁରୁଷ ନଥିବାରୁ ତାଙ୍କୁ ତାଲିବାନ୍ ଆତଙ୍କବାଦୀ ଗୁଳିମାରି ହତ୍ୟା କରିଥିବା କହିଛି ସ୍ଥାନୀୟ ପୁଲିସ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘଟଣାଟି ଘଟିଛି ଉତ୍ତର ବଲ୍କର ସମର କାଦିୟାନ୍ ଅଂଚଳର, ଯାହା ଏବେ ସମ୍ପୂର୍ଣ୍ଣ ଭାବେ ତାଲିବାନର କବଜାରେ । ମୃତ ମହିଳା ଘରୁ ବାହାରି ମଜର-ଏ-ଶରିଫକୁ ଯିବା ପାଇଁ ଗାଡ଼ିରେ ବସୁଥିବା ବେଳେ ଆତଙ୍କବାଦୀମାନେ ତାଙ୍କ ଉପରକୁ ଗୁଳିମାଡ କରିଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ପୁଲିସ କହିଥିବାବେଳେ ତାଲିବାନ୍ କିନ୍ତୁ ଏହାକୁ ଅସ୍ୱୀକାର କରିଛି । କେବଳ ଏତିକି ନୁହେଁ ଆଫଗାନିସ୍ତାନରେ ତାଲିବାନ୍ ନିଜ ଆଧିପତ୍ୟ ବିସ୍ତାର କରିବା ପରେ ମହିଳାଙ୍କ ଉପରେ ଅତ୍ୟାଚାର କରିବା ଆରମ୍ଭ କରିଛି ।
ଦୈନିକ ସମ୍ବାଦ ‘ଦି ମେଲ’ର ରିପୋର୍ଟ ମୁତାବକ, କୌଣସି ଅଞ୍ଚଳକୁ ଦଖଲକୁ ନେବା ପରେ ତାଲିବାନ୍ ଆତଙ୍କବାଦୀ ମହିଳାଙ୍କୁ ଅପହରଣ କରିବା ସହ ଜବରଦସ୍ତି ବିବାହ କରୁଛନ୍ତି । ବିଶେଷ କରି ତାଖାର ଓ ବଦାଖସାନ୍ ଅଂଚଳରୁ ଏପରି ଖବର ମିଳିଛି । ଏହାସହ ଏଠାରେ ନିଯୁକ୍ତ ପୁଲିସ କର୍ମଚାରୀ ଓ ସରକାରୀ କର୍ମଚାରୀଙ୍କୁ ତାଙ୍କୁ ସମର୍ପି ଦେବାକୁ ବାଧ୍ୟ କରୁଛନ୍ତି । ଫଳରେ ଦଖଲରେ ଥିବା ଅଞ୍ଚଳରେ ଲୋକେ ନିଜ ଘରର ମହିଳାମାନଙ୍କୁ କାବୁଲର ସୁରକ୍ଷିତ ସ୍ଥାନକୁ ପଠାଇଦେଉଥିବା ପ୍ରକାଶ ପାଇଛି ।