ଜମି ପାସ୍ବୁକ୍ ଦେବା ପାଇଁ ଏକ ଲକ୍ଷ ଟଙ୍କା ଲାଞ୍ଚ ମାଗିଲେ ତହସିଲ୍ଦାର, ଟଙ୍କା ଦେବା ପାଇଁ ଭିକ ମାଗିବାକୁ ବାଧ୍ୟ ହେଲେ କୃଷକ ଏବଂ ତାଙ୍କ ପତ୍ନୀ
ହାଇଦ୍ରାବାଦ୍: ଲୋକମାନଙ୍କୁ ସାହାଯ୍ୟ ଏବଂ ସୁବିଧା ଯୋଗାଇ ଦେବା ପାଇଁ ବିଭିନ୍ନ ପ୍ରକାରର ସରକାରୀ ବିଭାଗ ତିଆରି କରାଯାଉଛି । ଯାହା ପାଇଁ ସେଠାରେ କାର୍ଯ୍ୟରତ ଅଧିକାରୀମାନଙ୍କୁ ସରାକରଙ୍କ ତରଫରୁ ଟଙ୍କା ମଧ୍ୟ ମିଳୁଛି । କିନ୍ତୁ ସରକାରଙ୍କ ଠାରୁ ଟଙ୍କା ପାଇ ମଧ୍ୟ କିଛି ସରକାରୀ କର୍ମଚାରୀ ଲାଞ୍ଚ ନେବା ଭଳି ଅପରାଧ କରୁଛନ୍ତି । ତେଲେଙ୍ଗାନାର ଜୟଶଙ୍କର ଭୁପଲପଲ୍ଲୀରେ ସେଭଳି ଏକ ମାମଲା ସାମ୍ନାକୁ ଆସିଛି । ଜମି ପାସ୍ବୁକ୍ ଦେବା ପାଇଁ ତହସିଲ୍ଦାର ଜଣେ କୃଷକ ଏବଂ ତାଙ୍କ ପତ୍ନୀଙ୍କୁ ୧ଲକ୍ଷ ଟଙ୍କା ଲାଞ୍ଚ ମାଗିଥିବା ସୂଚନା ମିଳିଛି । ତହସିଲ୍ଦାରଙ୍କ ଏଭଳି ଦାବୀକୁ ବିରୋଧ କରି କୃଷକ ବସାବୈୟା ଏବଂ ତାଙ୍କ ପତ୍ନୀ ଲକ୍ଷ୍ମୀ ବିଭିନ୍ନ ଉଚ୍ଚ ପଦସ୍ଥ ଅଧିକାରୀଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ କିଛି ଲାଭ ମିଳି ନଥିଲା । ଯାହା ପରେ ଦୁହେଁ ଅନ୍ୟ କିଛି ବାଟ ନ ପାଇ ଭିକ ମାଗିବା ଆରମ୍ଭ କରିଥିଲେ । କିନ୍ତୁ ଏ ଘଟଣା ବିଷୟରେ ଜିଲ୍ଲାପାଳଙ୍କୁ ସୂଚନା ମିଳିବାରେ ଘଟଣାରେ ନୂଆ ମୋଡ଼ ଆସିଥିଲା ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାପାଳ ବସମ୍ ଭେଙ୍କଟେଶରଲ୍ଲ ପୂରା ମାମଲା ବିଷୟରେ ଜାଣି ବସାବୈୟାଙ୍କ ଜମିର ଯାଞ୍ଚ କରାଇ ତାଙ୍କୁ ଜମି ପାସ୍ବୁକ୍ ଦେଇଥିଲେ । ଏ ନେଇ ଲାଞ୍ଚ ମାଗିଥିବା ତହସିଲ୍ଦାରଙ୍କୁ ପଚରାଉଚରା କରାଯିବା ପରେ, ବସାବୈୟାଙ୍କ ଜମିକୁ ନେଇ ଅଦାଲତରେ ମାମଲା ଚାଲୁଥିବାରୁ ମୁଁ ଜମି ପାସ୍ବୁକ୍ ଦେଇ ନଥିଲି । ଲାଞ୍ଚ ମାଗିବା ଘଟଣା ସମ୍ପୂର୍ଣ୍ଣ ମିଛ ବୋଲି କହିଥିଲେ । ଯଦି ବସାବୈୟାଙ୍କ ଜମିକୁ ନେଇ ଅଦାଲତରେ ମାମଲା ଚାଲୁଥିଲା, ତେବେ ଜିଲ୍ଲାପାଳ ଜମି ପାସ୍ବୁକ୍ ଦେଲେ କେମିତି? ଏବେ ସେ ନେଇ ପ୍ରଶ୍ନ ଉଠିଛି ।