ପରାଜୟ ସ୍ବୀକାର କରି ଆସୁଥିବା ବେଳେ ‘ପରେ ଜଣାପଡ଼ିବ’ କହି ହଠାତ୍ ଅଟକି ଗଲେ ଟ୍ରମ୍ପ୍
ୱାସିଂଟନ୍: ଆମେରିକା ରାଷ୍ଟ୍ରପତି ନିର୍ବାଚନରେ ପରାଜିତ ହୋଇଥିଲେ ହେଁ ସ୍ବୀକାର କରିପାରୁନାହାନ୍ତି ଡୋନାଲ୍ଡ ଟ୍ରମ୍ଫ। ହ୍ବାଇଟ୍ ହାଉସରେ ଚାଲିଥିବା ଏକ ସାମ୍ବାଦିକ ସମ୍ମିଳନୀ ସମୟରେ ନଭେମ୍ବର ୩ ନିର୍ବାଚନରେ ଡେମୋକ୍ରାଟ୍ ଜୋ ବାଇଡେନ୍ଙ୍କ ଠାରୁ ପରାସ୍ତ ହୋଇଥିବା କଥା ଶୁକ୍ରବାର ସ୍ବୀକାର କରି ଆସୁଥିବା ବେଳେ ହଠାତ୍ ଅଟକି ଯାଇଥିଲେ ରାଷ୍ଟ୍ରପତି ଟ୍ରମ୍ପ୍। ଏହାପରେ କହିଥିଲେ- ପରବର୍ତ୍ତୀ ସରକାରର ମୁଖ୍ୟ କିଏ ହେବ ତାହା ‘‘ପରେ ଜଣାପଡ଼ିବ’’।
Sambad is now on WhatsApp
Join and get latest news updates delivered to you via WhatsApp
ନିର୍ବାଚନରେ ପରାଜିତ ହୋଇଥିବା କଥାକୁ ବାରମ୍ବାର ଅସ୍ବୀକାର କରି ଆସୁଥିବା ଟ୍ରମ୍ପ୍ ହ୍ବାଇଟ୍ ହାଉସ୍ ପରିସରରେ କୋଭିଡ୍-୧୯ ସଂକ୍ରାନ୍ତୀୟ ଏକ ସାମ୍ବାଦିକ ସମ୍ମିଳନୀରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରିବା ବେଳେ ଏକଥା କହିଛନ୍ତି।
ସେ କହିଥିଲେ, ଆମେ ଆଉ ଲକ୍ଡାଉନ୍ ଘୋଷଣା କରିବୁ ନାହିଁ। ଭବିଷ୍ୟତରେ କ’ଣ ହେବ କହି ପାରିବି ନାହିଁ । କିଏ ଜାଣେ ସେତେବେଳକୁ କେଉଁ ସରକାରର ଥିବ? ମୋର ଅନୁମାନ, ପରେ ସେକଥା ଜଣାପଡ଼ିବ। କିନ୍ତୁ, ମୁଁ କହିବି, ଏ ପ୍ରଶାସନ ଲକ୍ଡାଉନ୍ ଘୋଷଣା କରିବ ନାହିଁ।
ଏତିକି କହି ଟ୍ରମ୍ପ୍ ନିରବ ରହିଥିଲେ ଓ ଅନ୍ୟ ଅଧିକାରୀମାନେ ଏଯାବତ୍ ପ୍ରାୟ ୨୪୩,୦୦୦ ଆମେରିକୀୟଙ୍କ ଜୀବନ ନେଇଥିବା କରୋନାଭାଇରସ୍ ମହାମାରୀ ମୁକାବିଲାରେ ପ୍ରଶାସନର ଭୂମିକା ପ୍ରସଙ୍ଗରେ କହିଥିଲେ।
ଏହାପରେ, ସାମ୍ବାଦିକମାନଙ୍କର ଆଉ କୌଣସି ପ୍ରଶ୍ନର ଉତ୍ତର ନ ଦେଇ ଟ୍ରମ୍ପ୍ ହ୍ବାଇଟ୍ ହାଉସ୍ ପରିସରସ୍ଥ ‘ରୋଜ୍ ଗାର୍ଡେନ୍’ରେ ଚାଲିଥିବା ଏହି ସାମ୍ବାଦିକ ସମ୍ମିଳନୀରୁ ଉଠି ଚାଲି ଯାଇଥିଲେ। ସାମ୍ବାଦିକମାନେ କିନ୍ତୁ, ପଚାରି ଚାଲିଥିଲେ, ସାର୍, ନିର୍ବାଚନରେ ହାରିଛନ୍ତି ବୋଲି ଆପଣ କେବେ ସ୍ବୀକାର କରିବେ?