ଡିସେମ୍ବର ସୁଦ୍ଧା ଭାଙ୍ଗିବ ଟିଏମସି, ଉଦ୍ଧବଙ୍କ ଭଳି ହେବ ଦିଦିଙ୍କ ଅବସ୍ଥା !
କୋଲକାତା: ରାଜ୍ୟସଭାରେ ବିଜେପି ନେତା ତଥା ବିରୋଧୀଦଳର ନେତା ଶୁଭେନ୍ଦୁ ଅଧିକାରୀ ପଶ୍ଚିମବଙ୍ଗରେ କ୍ଷମତାରେ ଥିବା ମମତା ବାନାର୍ଜୀଙ୍କ ଦଳକୁ ନେଇ ଏକ ବଡ଼ ଭବିଷ୍ୟବାଣୀ କରିଛନ୍ତି। ଟିଏମସିର ନାଁ ନନେଇ ସେ କହିଛନ୍ତି ଯେ, ଇଡି ଏବଂ ସିବିଆଇ ସେମାନଙ୍କ କାର୍ଯ୍ୟ କରୁଛନ୍ତି। ଏହି ଦଳ ୬ମାସରୁ ଅଧିକ ସମୟ ଧରି ଚାଲିବ ନାହିଁ।
Sambad is now on WhatsApp
Join and get latest news updates delivered to you via WhatsApp
ପଶ୍ଚିମବଙ୍ଗର ବରିଷ୍ଠ ବିଜେପି ନେତା ଶୁଭେନ୍ଦୁ ଅଧିକାରୀ ଏକ ବଡ ଦାବି କରିଛନ୍ତି ଯେ, ଡିସେମ୍ବର ମାସ ସୁଦ୍ଧା ଟିଏମସି ଦଳ ଭାଙ୍ଗିବ। ଶୁଭେନ୍ଦୁ ଅଧିକାରୀଙ୍କ ଏଭଳି ଦାବି ପରେ ମହାରାଷ୍ଟ୍ର ଉଦ୍ଧବ ଠାକରେଙ୍କ ସହ ଯାହା ଘଟିଲା, ପଶ୍ଚିମବଙ୍ଗରେ କ୍ଷମତାରେ ଥିବା ଦଳ ସହିତ ମଧ୍ୟ ସେଭଳି ଘଟିବ ବୋଲି ଚର୍ଚ୍ଚା ଆରମ୍ଭ ହୋଇଯାଇଛି।
ମହାରାଷ୍ଟ୍ରରେ ଯାହା ଘଟିଲା ତାହା ପଶ୍ଚିମବଙ୍ଗରେ ମଧ୍ୟ ପୁନରାବୃତ୍ତି ହେବ କି? ମମତାଙ୍କ ଗଡ଼ରେ ଲାଗିଥିବା ଏକ ପୋଷ୍ଟର ଏବଂ ବିଜେପି ନେତା ଶୁଭେନ୍ଦୁଙ୍କ ଦାବିକୁ ନେଇ ଏଭଳି ପ୍ରଶ୍ନ ଏବେ ସମସ୍ତଙ୍କ ମନକୁ ଆସିଛି। ଯେଉଁ ପୋଷ୍ଟରକୁ ନେଇ ବିବାଦ ଆରମ୍ଭ ହୋଇଛି, ସେ ପୋଷ୍ଟରଟି ମମତା ବାନାର୍ଜୀଙ୍କ ଗଡ଼ ଦକ୍ଷିଣ କୋଲକାତାର ହଜ୍ରା ଅଞ୍ଚଳରେ ଲଗାଯାଇଥିଲା। ଲଗାଯାଇଥିବା ପୋଷ୍ଟରରେ କେବଳ ମମତା ବାନାର୍ଜୀଙ୍କ ପୁତୁରା ଅଭିଷେକ ବାନାର୍ଜୀଙ୍କ ଫଟୋ ରହିଥିଲା ଏବଂ ଏହା ସହିତ ଆସନ୍ତା ୬ମାସ ମଧ୍ୟରେ ନୂତନ ଟିଏମସି ଗଠନ ହେବ ବୋଲି ଲେଖାଯାଇଥିଲା। ଏହି ପୋଷ୍ଟର ଭାଇରାଲ ହେବା ପରେ ଟିଏମସି ଭାଙ୍ଗିବା କିମ୍ବା ନୂତନ ପରିବର୍ତ୍ତନ ହେବା ନେଇ କଳ୍ପନାଜଳ୍ପନାର ଆରମ୍ଭ ହୋଇଛି। ଏହି ପୋଷ୍ଟର ପଦାକୁ ଆସିବା ପରେ ବିଜେପି କହିଛି ଯେ ମମତା ବାନାର୍ଜୀଙ୍କ ଉପରେ ଲୋକଙ୍କ ବିଶ୍ୱାସ ନାହିଁ ବୋଲି ବର୍ତ୍ତମାନ ସ୍ପଷ୍ଟ ହୋଇଛି।