ସରିବ ୱେଟିଂ ଲିଷ୍ଟର ଯୁଗ ! ଆଗାମୀ ୫ ବର୍ଷ ମଧ୍ୟରେ କେବଳ କନଫର୍ମ ଟିକଟ ମିଳିବ
ନୂଆଦିଲ୍ଲୀ: ଭାରତରେ ଟ୍ରେନ ଯାତ୍ରା କରିବାବେଳେ ସିଟ ଖଣ୍ଡେ ପାଇବାକୁ ପ୍ରାୟତଃ ସମସ୍ତେ କେବେ ନା କେବେ ଅଜବ ପରିସ୍ଥିତିର ସାମ୍ନା କରିଥିବେ | ଟ୍ରେନରେ ଯାତ୍ରା ସମୟରେ କନଫର୍ମ ଟିକଟ ମିଳିବ ନା ନାହିଁ ଏହାକୁ ନେଇ ସବୁବେଳେ ଟ୍ରେନ ଯାତ୍ରୀ ଦ୍ଵନ୍ଦ୍ବରେ ଥାଆନ୍ତି | ୱେଟିଂ ଟିକଟ ଥିବା ଯାତ୍ରୀମାନେ କନଫର୍ମ ଟିକଟ କେତେବେଳେ ପାଇବେ ସେ ପ୍ରୟାସରେ ରହୁଥିବାବେଳେ ରେଳ ଯାତ୍ରୀଙ୍କ ପାଇଁ ଆସିବାକୁ ଯାଉଛି ଖୁସି ଖବର | କାରଣ ଆଗାମୀ ୫ ବର୍ଷ ମଧ୍ୟରେ ରେଳ ମନ୍ତ୍ରାଳୟ ଏଭଳି କିଛି ବ୍ୟବସ୍ଥା ଆଣିବାକୁ ଯାଉଛି ଯେତେବେଳେ ଆପଣ ଟିକଟ କରିବାକୁ ଯିବେ ତ କେବଳ କନଫର୍ମ ଟିକଟ ହିଁ ପାଇବେ |
Sambad is now on WhatsApp
Join and get latest news updates delivered to you via WhatsApp
ରେଳ ବୋର୍ଡର ଅଧ୍ୟକ୍ଷ ବିନୋଦ ଯାଦବ ଏକ ସାକ୍ଷାତକାରରେ କହିଛନ୍ତି ଯେ କିଛି ବର୍ଷ ଧରି ଟିକଟ ପାଇବାକୁ ନେଇ ଦେଖାଯାଉଥିବା ସମସ୍ୟା ଉପରେ ବିଚାରବିମର୍ଷ କରାଯାଉଛି | ରେଳ ମନ୍ତ୍ରାଳୟ ଆଗାମୀ ୫ ବର୍ଷ ମଧ୍ୟରେ କେବଳ କନଫର୍ମ ଟିକଟ ଦେବାକୁ ବିଚାର କରୁଛି | ସବୁଠାରୁ ବ୍ୟସ୍ତ ମାର୍ଗରେ ଏଭଳି ବ୍ୟବସ୍ଥାକୁ ପ୍ରଥମେ ଲାଗୁ କରାଯିବ | ରେଳ ଅଧିକାରୀଙ୍କ ସୂଚନା ମୁତାବକ କନଫର୍ମ ଟିକଟ ଜାରି ବ୍ୟବସ୍ଥା ଦିଲ୍ଲୀରୁ ମୁମ୍ବାଇ, କୋଲକାତା ଓ ଚେନ୍ନାଇ ରୁଟ ପାଇଁ ପ୍ରଥମେ ଆରମ୍ଭ କରାଯିବ |
ସବୁଠାରୁ ଅଧିକ ଯାତ୍ରୀ ଏହି ମାର୍ଗ ଦେଇ ଯାଉଥିବାରୁ ରେଳ ମନ୍ତ୍ରାଳୟ ଏହି ରୁଟରେ ଅଧିକ ଟ୍ରେନ ଚଳାଇ କନଫର୍ମ ଟିକଟ ଦେବାକୁ ଯୋଜନା କରିପାରେ | ବଡ଼କଥା ଯେ ଟିକଟ ସହଜରେ ନ ମିଳିବା ଯୋଗୁଁ ଅଧିକାଂଶ ଯାତ୍ରୀ ଏବେ ବିମାନରେ ଯାତ୍ରା କରିବାକୁ ପସନ୍ଦ କରୁଛନ୍ତି | ଯାହାଫଳରେ ରେଳ ମନ୍ତ୍ରାଳୟର ଆମଦାନି ମଧ୍ୟ କମିବାରେ ଲାଗିଛି | ତେବେ ଦିଲ୍ଲୀ-ମୁମ୍ବାଇ ମଧ୍ୟରେ ଚଳାଚଳ କରୁଥିବା ରାଜଧାନୀ ଏକ୍ସପ୍ରେସରେ ଟିକଟ ମିଳିବା ସହଜ ହୋଇଥିବା ବେଳେ ଅନ୍ୟ ଟ୍ରେନମାନଙ୍କରେ ୱେଟିଂ ଲିଷ୍ଟ ହିଁ ମିଳୁଛି | ଯେଉଁଥିପାଇଁ ଅଧିକ ଟ୍ରେନ ଚଳାଇ ଏହାକୁ ସୁଧାରିବାକୁ ରେଳ ବୋର୍ଡ ଏବେ ଚିନ୍ତା କରୁଛି | ସରକାରଙ୍କ ଏହି ନୂଆ ବ୍ୟବସ୍ଥା ଯାତ୍ରୀଙ୍କୁ ଲାଭଦାୟକ ସାବ୍ୟସ୍ତ ହୋଇପାରେ |