ଅନ୍ଲାଇନ୍ ଫୋନ୍ ଅର୍ଡର କରିଥିବା ବେଳେ ଆସିଲା ରିନ୍ ସାବୁନ୍, କମ୍ପାନି ବିରୋଧରେ ମାମଲା ରୁଜୁ ନ ହୋଇ ଅର୍ଡ଼ର କରିଥିବା ଯୁବକ କାହିଁକି ଗିରଫ ହେଲେ ଜାଣନ୍ତୁ?
ହାଓ୍ଵଡ଼ା: ଅନ୍ଲାଇନ୍ ଜିନିଷ ଅର୍ଡ଼ର କରି ଠକାମିର ଶିକାର ହେବା ଖବର କିଛି ନୂଆ ନୁହେଁ । ପୂର୍ବରୁ ଏମିତି ଅନେକ ଥର ଅନେକ ଲୋକଙ୍କ ସହ ଘଟି ସାରିଛି । କିଛି ଲୋକଙ୍କୁ ନିଜ ଅର୍ଡ଼ର କରିଥିବା ଜିନିଷ ପରିବର୍ତ୍ତେ ଇଟା, କୁମ୍ଭୀର ଇତ୍ୟାଦି ମିଳିସାରିଥିବା ବେଳେ ଏବେ ଜଣେ ଯୁବକଙ୍କୁ ନିଜ ଫୋନ ବଦଳରେ ରିନ୍ ସାବୁନ ମିଳିଥିବା ଜଣା ପଡ଼ିଛି । ୩୫୦୦ଟଙ୍କାର ଏକ ଫୋନ ସେ ଅର୍ଡ଼ର କରିଥିବା ବେଳେ ୫ଟଙ୍କାର ସାବୁନ ତାଙ୍କୁ ମିଳିଥିଲା । କିନ୍ତୁ ପୁଲିସ କମ୍ପାନି ବିରୋଧରେ ଅଭିଯୋଗ କରିବା ପରିବର୍ତ୍ତେ ଅର୍ଡ଼ର କରିଥିବା ଯୁବକଙ୍କୁ ହିଁ ଗିରଫ କରି ନେଇଥିଲା । କାରଣ ଅର୍ଡ଼ର ପାଇବା ପରେ ଭିତରେ ସାବୁନ ଥିବା ଦେଖି ଯୁବକଜଣଙ୍କ ପୋଷ୍ଟ ମାଷ୍ଟରକୁ ହିଁ ମାଡ଼ ମାରିବା ଆରମ୍ଭ କରି ଦେଇଥିଲେ । ଯାହାଦ୍ୱାରା ତାଙ୍କୁ ଜେଲ ଯିବାକୁ ପଡ଼ିଥିଲା ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ୩୫୦୦ଟଙ୍କର ଫୋନ ଅର୍ଡ଼ର କରିବା ପରେ କମ୍ପାନି ଶେଖ୍ ଅଖ୍ତାରୁଲ ଦେଇଥିବା ଠିକଣାରେ ଡ଼େଲିଭରି କରିବାକୁ ମନା କରିଥିଲା । ଯାହା ପାଇଁ ଶେଖ୍ ନିଜ ପୋଷ୍ଟ ଅଫିସର ଠିକଣା ଦେଇଥିଲେ । ସମୟ ପୂର୍ବରୁ ହିଁ ତାଙ୍କ ଅର୍ଡ଼ର ଆସି ପୋଷ୍ଟ ଅଫିସରେ ପହଞ୍ଚି ଯାଇଥିଲା । ଶେଖ୍ଙ୍କୁ ପୋଷ୍ଟ ଅଫିସରୁ ଫୋନ ଆସିବା ପରେ ସେ ପୋଷ୍ଟ ଅଫିସ ଯାଇ ନିଜ ଜିନିଷ ନେଇ ଘରକୁ ଫେରିଥିଲେ । ଘରେ ଆସି ପ୍ୟାକେଟ ଖୋଲିବା ପରେ ଭିତରେ ସାବୁନ ଥିବା ଦେଖି ରାଗରେ ଶେଖ୍ ପୋଷ୍ଟ ଅଫିସର ଯାଇ ମୋତେ ମୋ ଟଙ୍କା ଫେରାଅ ଏବଂ ଏହି ପାର୍ସଲ ନେଇଯାଅ ବୋଲି କହିଥିଲେ । କିନ୍ତୁ ପୋଷ୍ଟମାଷ୍ଟର ଏପରି କରି ନଥିଲେ । ଯାହା ଫଳରେ ଦୁହିଁଙ୍କ ମଧ୍ୟରେ ଝଗଡ଼ା ହେବାରୁ ଶେଖ୍ ପୋଷ୍ଟମାଷ୍ଟରଙ୍କୁ ମାଡ଼ ମାରିଥିଲେ । ଏହା ପରେ ସେ ଭିତରେ ରଖାଯାଇଥିବା ଟଙ୍କା ପେଟିକୁ ଧରି ଫେରାର ହେବାକୁ ବସିଥିଲେ । ପୋଷ୍ଟ ମାଷ୍ଟର ଜଣଙ୍କ ସ୍ଥାନୀୟ ଲୋକଙ୍କ ସାହାଯ୍ୟରେ ଶେଖ୍ଙ୍କୁ କାବୁ କରିବା ସହ ପୁଲିସ ଜିମା ଦେଇଥିବା ବେଳେ ସବୁ ଘଟଣା ଜଣା ପଡ଼ିବା ପରେ ଏବେ ଶେଖ୍ଙ୍କୁ ଜାମିନ ମିଳିଥିବା ଜଣା ପଡ଼ିଛି ।