ଭାରତୀୟ ଇଞ୍ଜିନିୟର କଲେ କମାଲ ! ବିଦେଶୀ ଚାକିରି ଛାଡ଼ି ଚାଷକୁ ବେଉସା କଲେ, ଗୋଟିଏ ଗଛରେ ଫଳାଇଲେ ୫୧ କିସମର ଆମ୍ବ

ସମସ୍ତଙ୍କ ଜୀବନରେ କିଛି ନା କିଛି ଲକ୍ଷ୍ୟ ରହିଥାଏ । କିଏ ଭଲ ପାଠ ପଢି ଡାକ୍ତର ହେବାକୁ ଚାହେଁ ତ ଆଉ କିଏ ଇଞ୍ଜିନିୟର, ଡାକ୍ତର ଓ ଓକିଲ ଇତ୍ୟାଦି । କିନ୍ତୁ କେହି ହେଲେ ଭଲ ପାଠ ପଢି ଚାଷ କ୍ଷେତ୍ରରେ ଉନ୍ନତି ଆଣିବାର ଲକ୍ଷ୍ୟ ରଖି ନ ଥାନ୍ତି । କିନ୍ତୁ ସମ୍ପ୍ରତି ଯୁବ ସମାଜର ଚିନ୍ତାଧାରାରେ ପରିବର୍ତ୍ତନ ପରିଲକ୍ଷିତ ହେଉଛି । ଅଳ୍ପ ମାତ୍ରାରେ ହେଉ ପଛେ କେତେକ ଯୁବକ କୃଷି କ୍ଷେତ୍ରରେ ଉନ୍ନତି ଆଣିବାରେ ଲାଗିଛନ୍ତି। ଲକ୍ଷ ଲକ୍ଷ ଟଙ୍କାର ଦରମାରେ ଭଲ ଚାକିରି କରୁଥିବା ଯୁବକ ବି ଏବେ କୃଷି କ୍ଷେତ୍ରକୁ ନିଜର କର୍ମଭୂମି ଭାବେ ଆଦରି ନେଇଛନ୍ତି ।

ଏଭଳି ଆଧୁନିକ ଚାଷୀ ନା କେବଳ ଭଲ ଚାଷ କରୁଛନ୍ତି ବରଂ ଆଖପାଖର ଚାଷୀମାନଙ୍କୁ ମଧ୍ୟ ଚାଷର ଉନ୍ନତ ପ୍ରଣାଳୀ ଏବଂ ପ୍ରକ୍ରିୟା ବିଷୟରେ ବୁଝାଉଛନ୍ତି । ସେପରି ଜଣେ ଚାଷୀ ହେଉଛନ୍ତି ରବି ମଙ୍ଗଲେଶ୍ୱର, ଯିଏ ଚାଷ କ୍ଷେତ୍ରରେ ଏବେ ସାରା ଦେଶରେ ଉଦାହରଣ ପାଲଟିଛନ୍ତି । ମାସ୍କଟରେ ୧୦ ବର୍ଷ ପର୍ଯ୍ୟନ୍ତ ଇଞ୍ଜିନିୟରିଂ ଚାକିରି କରିବା ପରେ ୨୦୦୧ ମସିହାରେ ପୁଣି ନିଜ ଗାଁକୁ ଫେରି ଆସିଥିଲେ ଏବଂ ଗାଁକୁ ଫେରି ଚାଷ କରିବାକୁ ମନସ୍ଥ କଲେ । ଜଣେ ଇଞ୍ଜିନିୟର ଭାବେ ଚାଷ କ୍ଷେତ୍ରରେ କିଭଳି ଉନ୍ନତି ଅଣାଯାଇ ପାରିବ ସେ ବିଷୟରେ ଆରମ୍ଭ କଲେ ଗବେଷଣା ।

ଆଉ ଏହି ଗବେଷଣା ଓ ପରୀକ୍ଷନିରୀକ୍ଷାର ସଫଳତା ମଧ୍ୟ ପାଇଲେ ରବି । ଗୋଟିଏ ଗଛରେ ୫୧ କିସମର ଆମ୍ବ ଉତ୍ପାଦନ କରି ପୂରା ଦେଶରେ ଚର୍ଚ୍ଚାର ପରିସରକୁ ଆସିଥିଲେ । ମହାରାଷ୍ଟ୍ରର ବିଦର୍ଭ କ୍ଷେତ୍ରରେ ରହୁଥିବା ରବିଙ୍କ ଦ୍ୱାରା ଆବିଷ୍କାର ହୋଇଥିବା ଏହି ନୂଆ ପ୍ରଣାଳୀ ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ରବି ନିଜ ଗବେଷଣା ବଳରେ ଏହା ସମ୍ଭବ କରି ଦେଖାଇଛନ୍ତି ଏବଂ ୨.୫ ଏକର ଅଞ୍ଚଳରେ ୧,୦୦୦ ଆମ୍ବ ଗଛ ଲଗାଇଛନ୍ତି । କୃଷି କ୍ଷେତ୍ରରେ ପାଦ ଦେବା ସମୟରେ ହିଁ ସେ କିଛି ଅଲଗା କରିବା ପାଇଁ ନିଷ୍ପତ୍ତି ନେଇଥିଲେ ଏବଂ ୫ ଏକର ଜାଗାରେ ସେ ଚାଷ କାମ ଆରମ୍ଭ କରିଥିଲେ । ତେବେ ଚାଷ ବିଷୟରେ ଅଧିକ ଜ୍ଞାନ ପାଇଁ ସେ ୫୦୦ରୁ ଅଧିକ ଜାଗା ପରିଭ୍ରମଣ କରିଥିଲେ । ରବିଙ୍କ ବାପା ଚାଷ କରୁଥିଲେ ଏବଂ ସମାଜ ପାଇଁ ମଧ୍ୟ କାମ କରୁଥିଲେ । ତେଣୁ କରି ରବି ମଧ୍ୟ ଏହି କ୍ଷେତ୍ରରେ କାମ କରିବ ପାଇଁ ନିଜ ଗାଁକୁ ଫେରି ଆସିଥିଲେ ।