ସମାବେଶ ପରେ ପୁଲିସର ଚେତା ପଶିଲା : ଆୟୋଜକଙ୍କ ସମେତ ୭ଶହଙ୍କ ବିରୋଧରେ ମାମଲା
ଆପଣାଛାଏଁ ପଳାଇ ଆସିଲେ ଲୋକେ: ଆୟୋଜକ
ବାଲେଶ୍ବର/ବାଲିଆପାଳ : କୋଭିଡ୍ କଟକଣା ଭାଙ୍ଗି ବାଲିଆପାଳରେ ବିଶାଳ ସମାବେଶ ଚାଲିଥିବା ବେଳେ ପୁଲିସ ଓ ପ୍ରଶାସନ ଜାଣିଶୁଣି ଚୁପ୍ ରହିଲେ। ଆଜି ବିଭିନ୍ନ ଗଣମାଧ୍ୟମରେ ଏ ସଂକ୍ରାନ୍ତରେ ଖବର ପ୍ରକାଶ ପାଇବା ପରେ ପୁଲିସ ଆୟୋଜକ, ଅତିଥିଙ୍କ ସମେତ ୭୦୦ଜଣଙ୍କ ବିରୋଧରେ ମାମଲା ରୁଜୁ କରିଛି। ଗତକାଲି ବାଲିଆପାଳ ବ୍ଲକ ବାଲିବିଲ ଠାରେ ବିଶାଳ ସମାବେଶ ଆୟୋଜନ କରିଥିବା ଉପକୂଳ ଭିଟାମାଟି ସୁରକ୍ଷା କମିଟି ବିରୋଧରେ ପ୍ରଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଜିଲ୍ଲାପାଳଙ୍କ ନିର୍ଦେଶକ୍ରମେ ସ୍ଥାନୀୟ ତହସିଲଦାର ଆୟୋଜକ କମିଟିର ସମସ୍ତ ସଦସ୍ୟ, ସଭାରେ ଯୋଗ ଦେଇଥିବା ନେତୃବୃନ୍ଦଙ୍କ ସମେତ ସେଠାରେ ଉପସ୍ଥିତ ଥିବା ୭ଶହ ଲୋକଙ୍କ ନାମରେ ବାଲିଆପାଳ ଥାନାରେ ଏତଲା ଦେଇଥିବା ବେଳେ କେସ ନମ୍ବର ୧୭୨/୨୦ରେ ମାମଲା ରୁଜୁ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଉପକୂଳ ଭିଟାମାଟି ସୁରକ୍ଷା କମିଟିର ସଭାପତି ସୁଭାଷ ଚୌଧୁରୀ, ଆବାହକ ଅରୁଣ ଜେନା, ସଭାରେ ମୁଖ୍ୟଅତିଥି ଭାବେ ଯୋଗ ଦେଇଥିବା କଂଗ୍ରେସ ନେତା ତଥା ବାଲିଆପାଳ ବ୍ଲକ ଅଧକ୍ଷ ବିଜନ ନାୟକ, ସମ୍ମାନୀତ ଅତିଥି ଭାବେ ଯୋଗ ଦେଇଥିବା ସିପିଆଇ ନେତା ଜୟନ୍ତ ଦାସ, ଆଇନ୍ଜୀବୀ ମନୋଜ ନାୟକ, କମିଟିର ମୁଖ୍ୟ ସଦସ୍ୟ କାର୍ତ୍ତିକ ଜେନା, ମାୟାଧର କୁହ୍ଲାରି, ବନମାଳୀ ଦାସ, କମଳାକାନ୍ତ ଜେନା, ମୃତ୍ୟୁଞୟ ରାଉତ, ପୂର୍ଣ୍ଣଚନ୍ଦ୍ର ବେହେରା, ଜତୀନ୍ଦ୍ର କୁହ୍ଲାରୀ, ଭାସ୍କର ବିଶ୍ୱାଳ, ସେକ ଆକବର ସାହା, ଜନ୍ମେଜୟ ଜେନା ପ୍ରମୁଖଙ୍କ ନାଁରେ ଅଭିଯୋଗ ହୋଇଥିବା ପୁଲିସ ସୂଚନା ଦେଇଛି। ରବିବାର ସଟଡାଉନ କଟକଣା ବଳବତ୍ତର ଥିବା ବେଳେ ହଜାର ହଜାର ଲୋକ ଏକାଠି ହୋଇ ପ୍ରସ୍ତାବିତ ପେଟ୍ରୋକେମିକାଲ୍ସ ପ୍ରକଳ୍ପକୁ ବିରୋଧ କରିଥିଲେ। ସୂଚନା ଅନୁସାରେ ପୁଲିସ ପାଖରେ ଏ ସମ୍ପର୍କରେ ଖବର ଥିଲା। ସେଥିପାଇଁ ବିନା ୟୁନିଫର୍ମରେ ପୁଲିସ ଜଗିଥିଲା। ହେଲେ କାହିଁକି ମୂଳରୁ ଏ ସମାବେଶକୁ ବାତିଲ ନ କଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାଛଡ଼ା ବସ୍ତା ଅଞ୍ଚଳରେ ପୁଲିସ ବିଭାଗର ଉପଖଣ୍ଡୀୟ ଅଧିକାରୀ(ଏସ୍ଡିପିଓ)ଙ୍କ କାର୍ଯ୍ୟାଳୟ ଥିବା ବେଳେ ଆଜି ଏ ବିଷୟରେ ତାଙ୍କୁ ପଚାରିବାରୁ ସେ ଘଟଣା ବାବଦରେ ସମ୍ପୂର୍ଣ୍ଣ ଅବଗତ ନାହାନ୍ତି ବୋଲି କହିଛନ୍ତି। ସେପଟେ କମିଟିର ଆବାହକ ଅରୁଣ ଜେନା ନିଜ ପ୍ରତିକ୍ରିୟାରେ କହିଛନ୍ତି ଯେ, ପ୍ରଶାସନ ବର୍ତ୍ତମାନର ସଙ୍କଟ ସମୟରେ ପେଟ୍ରୋ କେମିକାଲ୍ସ ପ୍ରକଳ୍ପ ପାଇଁ ଅହେତୁକ ଆଗ୍ରହ ଦେଖାଇ ପ୍ରଥମେ ଆଇନର ଉଲ୍ଲଂଘନ କରିଛି। ୨୦୧୮ ମସିହାରୁ ଏଠାରେ ଚିଙ୍ଗୁଡି ଘେରି ଉଚ୍ଛେଦ ପାଇଁ ଆଦେଶ ରହିଥିବା ବେଳେ ସେତେବେଳେ ତାହା କାର୍ଯ୍ୟକାରୀ ନ କରି ବର୍ତ୍ତମାନ ପେଟ୍ରୋ କେମିକାଲ୍ସ ପ୍ରସ୍ତାବିତ ଅଞ୍ଚଳରେ ଘେରି ଉଚ୍ଛେଦ ନାଁରେ ସରକାରୀ ଜମି ଅଧିଗ୍ରହଣ କରାଯାଉଛି। ଲୋକଙ୍କୁ ଅନ୍ଧାରରେ ରଖି ସରକାର ଜିଦ୍ଖୋର ମନୋଭାବ ପୋଷଣ କରି ପୁଲିସଫୋର୍ସ ସହ ଉକ୍ତ ଅଞ୍ଚଳକୁ ଉଚ୍ଛେଦ ପାଇଁ ଯାଉଛନ୍ତି। ତେବେ କ୍ରାନ୍ତି ଦିବସରେ ସହିଦମାନଙ୍କୁ ଶ୍ରଦ୍ଧାଞଳି ଦେବା ଲାଗି ସ୍ବଳ୍ପ ସଂଖ୍ୟକ ଲୋକଙ୍କୁ ନେଇ ସେଠାରେ ସଭା ଚାଲିଥିବା ବେଳେ କରୋନାକୁ ନ ଡରି ସ୍ଥାନୀୟ ବାସିନ୍ଦା ଆପଣାଛାଏଁ ଆସିଗଲେ ବୋଲି ସେ କହିଛନ୍ତି।
ପଞ୍ଚାୟତ ସମିତି ଅଧ୍ୟକ୍ଷ ବିଜନ ନାୟକ କହିଛନ୍ତି, କ୍ରାନ୍ତିଦିବସ ଅବସରରେ ସହିଦମାନଙ୍କୁ ଶ୍ରଦ୍ଧାଞ୍ଜଳି ଦେବା ଲାଗି ସେ ସେଠାକୁ ନିମନ୍ତ୍ରିତ ହୋଇଥିଲେ। ତେବେ ସେ ସେଠାରେ ଥିବା ସମୟରେ ସମାବେଶ ସ୍ଥଳରେ ମାତ୍ର ୨୦ରୁ ୩୦ ଜଣ ଲୋକ ଉପସ୍ଥିତ ଥିଲେ।