ଶାରଳା ସୂତାକଳ ଖୋଲିବା ପ୍ରସଙ୍ଗ : ସ୍ୱର ଉଠାଇଲେ ଯୁବ ପିଢ଼ିଙ୍କ ସମେତ ଜଗତସିଂହପୁର ଡେଭଲପ୍ମେଣ୍ଟ ଫୋରମ୍
ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ଜିଲ୍ଲାପାଳଙ୍କୁ ଦାବିପତ୍ର
ଜଗତସିଂହପୁର ଟାଉନ୍ : ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ୍ ନାଉସୀରାରେ ଥିବା ଶ୍ରୀ ଶାରଳା ବୁଣାକାର ସମବାୟ ସୂତା କଳ ଲିଃକୁ ଚାଲୁ କରିବା ପାଇଁ ସ୍ୱର ଉଠାଇଛନ୍ତି ଜଗତସିଂହପୁରବାସୀ । ସମ୍ବାଦ-କନକ ନିୟୁଜରେ ଖବର ପ୍ରସାରଣ ପରେ ଜିଲ୍ଲାବାସୀଙ୍କ ମଧ୍ୟରେ ତତ୍ପରତା ପ୍ରକାଶ ପାଇଛି । ଏନେଇ ଆଜି ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କୁ ଜଗତସିଂହପୁର ଡେଭଲପମେଣ୍ଟ ଫୋରମ୍ ଓ ଜଗତସିଂହପୁର କିଛି ଉଦୀୟମାନ ଯୁବକ ଏକତ୍ରିତ ହୋଇ ଦାବି ପତ୍ର ଦେଇଛନ୍ତି । ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ରାଜ୍ୟ ସରକାରଙ୍କୁ ଜଣାଇ ଯଥା ସମ୍ଭବ ଉଦ୍ୟମ କରିବାକୁ ପ୍ରତିଶ୍ରୁତି ଦେଇଛନ୍ତି । ତେବେ ସରକାର କିଭଳି ଆନ୍ତରିକତା ଦେଖାଉଛନ୍ତି ତାକୁ ନେଇ ଜିଲ୍ଲାବାସୀ ଅପେକ୍ଷା କରି ବସିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ଜାନକୀ ବହ୍ଲଭ ପଟ୍ଟନାୟକଙ୍କ ସମୟରେ ୩୦ ଏକରୁ ଅଧିକ ଜମିରେ ଶାରଳା ସୂତାକଳ ଆରମ୍ଭ ହୋଇଥିଲା । ଏଥିପାଇଁ ସରକାର ୧୨ କୋଟି ଟଙ୍କା ବ୍ୟୟ କରିଥିଲେ । ସୂତାକଳ ୧୮୮୨ରେ ଆରମ୍ଭ ହୋଇଥିବା ବେଳେ ୧୯୮୪ରେ ସୂତା ପ୍ରଡକ୍ସନ ହୋଇଥିଲା । ସମବାୟ ଭିତ୍ତିରେ ଆରମ୍ଭ ହୋଇଥିବାରୁ ସରକାର ବୁଣାକାର ମାନଙ୍କୁ ପଚାଶ ପ୍ରତିଶତ ସବ୍ସିଡ୍ ଦେଉଥିଲେ । ପ୍ରାୟ ୨୦୦ ଅଧିକାରୀ ଓ ୧୩୦୦ କର୍ମଚାରୀଙ୍କୁ ନେଇ ଚାଲିଥିଲା ସୂତାକଳ । ଏହା ଭିତରେ ଗେଷ୍ଟ ହାଉସ୍, ଷ୍ଟାଫ୍ କ୍ୱାଟର ସହ ସମସ୍ତ ପ୍ରକାର ସୁବିଧା ସୁଯୋଗ ଥିଲା । ହେଲେ ସରକାର ସବ୍ସିଡ୍ ବନ୍ଦ କରି ଦେବା ସହ କର୍ମଚାରୀଙ୍କ ଦରମା ବୃଦ୍ଧି ଯୋଗୁଁ ଦେବାଳିଆ ହୋଇ ଗଲା ସୂତାକଳ । ଏହାପରେ ୧୯୯୯ ମସିହା ମହାବାତ୍ୟାରେ ସୂତାକଳ ସମ୍ପୂର୍ଣ୍ଣ ଛାରଖାର ହୋଇ ଯାଇଥିଲା । ସେବେଠାରୁ ଦୀର୍ଘ ୨୦ ବର୍ଷ ହେବ ବନ୍ଦ ହୋଇଯିବାରୁ ଧୀରେ ଧୀରେ ଜରାଜୀର୍ଣ୍ଣ ଅବସ୍ଥା ପାଲଟି ଯାଇଛି।
କରୋନା ଲକ୍ଡାଉନ୍ ଯୋଗୁଁ ବିଦେଶକୁ ଯାଇଥିବା ପ୍ରାୟ ୧୪ ହଜାର ପ୍ରବାସୀ ଏବେ ଘରକୁ ଫେରିଛନ୍ତି । ସେମାନଙ୍କ ମଧ୍ୟରେ ୫ ଶହରୁ ଅଧିକ ସୁରଟରେ କାମ କରୁଥିବା କୁଶଳୀ କାରିଗର ଅଛନ୍ତି । ସରକାର ପୁଣି ଶାରଳା ସୂତାକଳ ଚାଲୁ କରି ପ୍ରବାସୀଙ୍କୁ କାର୍ଯ୍ୟରେ ନିୟୋଜିତ କରିବାକୁ ଜଗତସିଂହପୁର ଡେଭଲମମେଣ୍ଟ ଫୋରମ୍ ପକ୍ଷରୁ ଦାବି କରାଯାଇଛି । ଫୋରମ୍ର ଆବାହକ ଦେବେନ୍ଦ୍ର ନାଥ ରାଉତଙ୍କ ତତ୍ୱାବଧାନରେ କାଳିକିଙ୍କର ମହାନ୍ତି ଜିଲ୍ଲାପାଳଙ୍କୁ ଭେଟି ଦାବିପତ୍ର ଦେଇଛନ୍ତି । ସେହିପରି ଜଗତସିଂହପୁର ଯୁବପିଢ଼ିଙ୍କ ପକ୍ଷରୁ ରବିନାରାୟଣ କର ଜିଲ୍ଲାପାଳଙ୍କୁ ଦାବପତ୍ର ପ୍ରଦାନ କରିଛନ୍ତି । ଅନ୍ୟମାନଙ୍କ ମଧ୍ୟରେ ଅଜୟ ଗୋଚ୍ଛାୟତ, ସୁରେଶ ମଲ୍ଲିକ, ସୌଭାଗ୍ୟ ସ୍ୱାଇଁ, ରୁଦ୍ର ଆଚାର୍ଯ୍ୟ, ଅବନୀକାନ୍ତ ଦାଶ, ଶ୍ୟାମ ସୁନ୍ଦର ସାହୁ, ଅଂଶୁମାନ ମହାନ୍ତି, ଆଶିଷ ମହାନ୍ତି, ପବିତ୍ର ମହାନ୍ତି, ମନୋରଂଜନ ସାହୁ ପ୍ରମୁଖ ଉପସ୍ଥିତ ରହି ଦାବି ଜଣାଇଥିଲେ । ଖବର ପ୍ରକାଶ ପରେ ବିଜେପି ଓ କଂଗ୍ରେସ ମଧ୍ୟ ଦାବି ଜଣାଇଛନ୍ତି ।
ତେବେ ତିର୍ତ୍ତୋଲ ବିଧାୟକ ବିଷ୍ଣୁ ଦାସ ମଧ୍ୟ ସୂତାକଳ ଚାଲିବା ନେଇ ମୁଖ୍ୟମନ୍ତ୍ରୀଙ୍କୁ ଅବଗତ କରାଇ ଫାଇଭ୍ ଟି ସଚିବଙ୍କୁ ଉକ୍ତ ସ୍ଥାନକୁ ଆଣି ଦେଖାଇବା ନେଇ ପ୍ରତିକ୍ରିୟା ଦେଇଥିଲେ । ହେଲେ କେବେ ଜିଲ୍ଲାବାସୀଙ୍କ ସ୍ୱପ୍ନ ପୂରଣ ହେବ ତାକୁ ନେଇ ଆଶା ଆଶଙ୍କାରେ ଅଛନ୍ତି ଜିଲ୍ଲାବାସୀ।