୪ମାସ ହେଲା ମିଳିନଥିଲା ଦରମା, ଆତ୍ମହତ୍ୟା କଲେ ନୀଳାଚଳ ଇସ୍ପାତ ନିଗମର କର୍ମଚାରୀ
ଯାଜପୁର: ଯାଜପୁର ଜିଲ୍ଲାର କଳିଙ୍ଗ ନଗର ଶିଳ୍ପାଞ୍ଚଳରେ ଥିବା ନୀଳାଚଳ ଇସ୍ପାତ ନିଗମର ଜଣେ କର୍ମଚାରୀ ଆତ୍ମହତ୍ୟା କରିଛନ୍ତି | ଲକଡାଉନ ପାଇଁ ୪ମାସ ହେଲା ଦରମା ମିଳୁନଥିବାରୁ ଚିନ୍ତାଗ୍ରସ୍ଥ ହୋଇ ସେ ଆତ୍ମହତ୍ୟା କରିଥିବା ଖବର ମିଳିଛି | କର୍ମଚାରୀଙ୍କ ମୃତ୍ୟୁ ପରେ ସରକାର ଏ ସମସ୍ୟାର ସମାଧାନ କରନ୍ତୁ ବୋଲି ସ୍ଥାନୀୟ ବାସିନ୍ଦା ଏବଂ ସମସ୍ତ ଶ୍ରମିକ କର୍ମଚାରୀମାନେ ଦାବି କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ୪ମାସ ହେଲା ଦରମା ମିଳୁନଥିବାରୁ କର୍ମଚାରୀମାନଙ୍କୁ ଦରମା ଦେବା ପାଇଁ ନୀଳାଚଳ ବଞ୍ଚାଅ ମିଳିତ ମଞ୍ଚ ପକ୍ଷରୁ ବାରମ୍ବାର ଜିଲ୍ଲା ପ୍ରଶାସନ, ଶ୍ରମ ବିଭାଗ, କେନ୍ଦ୍ର ଓ ରାଜ୍ୟ ସରକାରଙ୍କୁ ଚିଠି ଜରିଆରେ ସମସ୍ୟା ବିଷୟରେ ଜଣା ଯାଇଥିଲା | କିନ୍ତୁ ଏ ନେଇ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ ଜାରି ରହିଥିଲେ ମଧ୍ୟ କିଛି ସୁଫଳ ମିଳିନଥିଲା | ସରକାର ସ୍ଥାନୀୟ ପ୍ରତିନିଧି ଓ ଜିଲ୍ଲା ପ୍ରଶାସନ ସହ ଏ ନେଇ ଉଚ୍ଚସ୍ଥରୀୟ ବୈଠକ କରିଥିଲେ | ରଜ ପୂର୍ବରୁ ୧ମାସର ଦରମା ଦେବା ସହ ଖୁବଶୀଘ୍ର କାରଖାନାକୁ କାର୍ଯ୍ୟକ୍ଷମ କରିବା ପାଇଁ କେନ୍ଦ୍ର ସରକାରଙ୍କ ଅଧିନସ୍ଥ ନୀଳାଚଳ ଇସ୍ପାତର ମୁଖ୍ୟ ଅଂଶୀଦାର ଏମଏମଟିସିକୁ ଲିଖିତ ଭାବେ ଜଣାଇଦିଆଯାଇଥିଲା | କିନ୍ତୁ ଏମଏମଟିସି ନୀଳାଚଳ ଇସ୍ପାତ କର୍ମଚାରୀଙ୍କୁ ଦରମା କିମ୍ବା କାରଖାନା ଚାଲିବା ପ୍ରସଙ୍ଗରେ କୌଣସି ପ୍ରକାରର ସାହାଯ୍ୟ କରି ପାରିବ ନାହିଁ ବୋଲି ଜିଲ୍ଲା ପ୍ରଶାସନକୁ ଚିଠି ଲେଖି ଜଣାଇଦେଇଥିଲେ ଏମଏମଟିସି କର୍ତ୍ତୃପକ୍ଷ |
ଏମଏମଟିସି ସାହାଯ୍ୟ କରିବା ପାଇଁ ମନା କରିବା ପରେ ଏବେ ସବୁ ଆଶା ହରାଇ ବସିଛନ୍ତି ନୀଳାଚଳ ଇସ୍ପାତ ନିଗମର ସମସ୍ତ କର୍ମଚାରୀ | ଦରମା ମିଳୁନଥିବାରୁ ଦୁଇ ଦିନ ତଳେ ଜଣେ କର୍ମଚାରୀ ଚିକିତ୍ସା ଅଭାବରୁ ରୋଗ ଶଯ୍ୟାରେ ମୃତ୍ୟୁବରଣ କରିଥିବା ବେଳେ ଆଜି ଜଣେ କର୍ମଚାରୀ ଆତ୍ମହତ୍ୟା କରିଛନ୍ତି |