ଅଟକିଛି କଲୁଙ୍ଗା-ଲାଠିକଟା ରେଳଲାଇନ୍: ସ୍ମାର୍ଟସିଟିରେ ବଢ଼ୁଛି ଟ୍ରାଫିକ ସମସ୍ୟା, ଜାମ ରହୁଛି ମୁମ୍ବାଇ-ହାୱଡା ରେଳ ଲାଇନ୍
ରାଉରକେଲା: ବାଣିଜ୍ୟିକ ପରିବହନ ସମସ୍ୟାର ସମାଧାନ ସହ ଓଡ଼ିଶାରେ ରେଳ ଭିତ୍ତିଭୂମିର ବିକାଶ ପାଇଁ ନିକଟରେ ଗଠନ ହୋଇଛି ଓଡ଼ିଶା ରେଳ ଭିତ୍ତିଭୂମି ଉନ୍ନୟନ ସଂସ୍ଥା (ଓଆର୍ଆଇଡିଏଲ୍)। ପ୍ରଥମ ପର୍ଯ୍ୟାୟରେ ରାଜ୍ୟରେ ଟ୍ରାଫିକ ଓ ଅର୍ଥନୈତିକ ଅଭିବୃଦ୍ଧିର ସମସ୍ୟାର ସମାଧାନ ପାଇଁ ୬ଟି ନୂଆ ରେଳ ଲାଇନ ନିର୍ମାଣ କରିବାକୁ ନିଷ୍ପତ୍ତି ନିଆଯାଇଛି। ଏଥି ମଧ୍ୟରେ ରହିଛି ବ୍ରହ୍ମପୁର-ଫୁଲବାଣୀ-ସମ୍ବଲପୁର ରେଳଲାଇନ୍ । ଜୁନାଗଡ-ନବରରଙ୍ଗପୁର, ବରଗଡ଼ରୋଡ-ନୂଆପଡା, ବାଂଶପାଣି-ବଡ଼ବିଲ୍, ବୁରାମରା-ଚକୁଳିଆ ନୂଆ ଲାଇନ। ମାତ୍ର ବର୍ଷ ବର୍ଷ ଧରି ଅଟକି ରହିଛି କଲୁଙ୍ଗା-ଲାଠିକଟା (୧୮ କି.ମି.) ବାଇପାସ୍ ରେଳ ଲାଇନ୍। ଏଥିସକାଶେ ପାଖାପାଖି ୨୫ କୋଟିରୁ ଅଧିକ ଟଙ୍କା ଖର୍ଚ୍ଚ ପାଇଁ ଆକଳନ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଅବହେଳାରୁ ଏହି ବହୁ ପ୍ରତୀକ୍ଷିତ ବାଇପାସ୍ ରେଳଲାଇନ ସେମିତି ପ୍ରସ୍ତାବରେ ଅଟକି ରହିଛି। ରାଉରକେଲା ସ୍ମାର୍ଟସିଟି ହେବା ପରେ ମୁମ୍ବାଇ-ହାଓଡା ମୁଖ୍ୟ ରେଳଲାଇନ ଓ ସହର ଟ୍ରାଫିକ ସମସ୍ୟା ଏଡାଇବାକୁ କଲୁଙ୍ଗା-ଲାଠିକଟା ଲାଇନ ବେଶ୍ ଗୁରୁତ୍ବ ରହିଛି। କାରଣ ଡୁର୍ମେତା-ବିଶ୍ରା ୧୨ କି.ମି. ବାଇପାସ୍ ରେଳଲାଇନ କାମ ଚାଲିଛି। ଡୁର୍ମେତା- ଲାଠିକଟା ମଧ୍ୟରେ ପୂର୍ବରୁ ରେଳ ଲାଇନ ରହିଛି। ବର୍ତ୍ତମାନ କଲୁଙ୍ଗା -ଲାଠିକଟା ମଧ୍ୟରେ ନୂଆ ରେଳ ଲାଇନ ନିର୍ମାଣ ହେଲେ ବାଇପାସ୍ ରେଳ ଲାଇନ ସମ୍ପୂର୍ଣ୍ଣ ହୋଇଯିବ।
କଲୁଙ୍ଗା ଓ ଅନ୍ୟାନ୍ୟ ଅଞ୍ଚଳରୁ ରାଉରକେଲା ଦେଇ ବନ୍ଧମୁଣ୍ଡା ମାର୍ଶଲିଂ ୟାର୍ଡ ଓ ରାଉରକେଲା ମାଲଗୋଦାମ ୟାର୍ଡକୁ ମାଲଗାଡ଼ି ନଯାଇ ସିଧାସଳଖ ବାଇପାସ୍ ଦେଇ ବିଶ୍ରା ଓ ବନ୍ଧମୁଣ୍ଡାକୁ ଯାଇପାରିବ। ସହର ମାଲଗୋଦାମ ସାଇଡିଂକୁ କଲୁଙ୍ଗା କିମ୍ବା ଲାଠିକଟାକୁ ସ୍ଥାନାନ୍ତର ହୋଇଗଲେ ସହରର ଟ୍ରାଫିକ ସମସ୍ୟାର ପୂର୍ଣ୍ଣଚ୍ଛେଦ ପଡିବ। ମୁମ୍ବାଇ-ହାୱଡା ମୁଖ୍ୟ ମାର୍ଗରେ ମଧ୍ୟ ମାଲଗାଡ଼ିକ ଯାତାୟତ କମ୍ ରହିବ। ଏକ୍ସପ୍ରେସ୍, ସୁପରଫାଷ୍ଟ ଓ ସାଧାରଣ ପାସେଞ୍ଜର ଟ୍ରେନ୍ ଗୁଡ଼ିକ ଯାତାୟତ ସ୍ବାଭାବିକ ହୋଇପାରିବ। କଲୁଙ୍ଗା-ଲାଠିକଟା ୧୮ କି.ମି. ରେଳ ଲାଇନ ନିର୍ମାଣ ପାଇଁ ଜମି ଅଧିଗ୍ରହଣ ସମସ୍ୟାକୁ ରାଜ୍ୟ ସରକାର ଗୁରୁତ୍ବ ଦେବାର ଆବଶ୍ୟକତା ରହିଛି। କେବଳ ଏତିକି ନୁହେଁ ବିଭିନ୍ନ ରାଜନୈତିକ ଦଳର ପ୍ରତିନିଧିମାନେ ଦଳମତ ନିର୍ବିଶେଷର ଏକାଠି ହୋଇ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ନିକଟରେ ଦାବି ଉଠାଇବାକୁ ବିଭିନ୍ନ ମହଲରୁ ଦାବି ହେଉଛି।