ପୁରୀ : କୁଷ୍ଠ ଭଳି ରୋଗରେ ଆକ୍ରାନ୍ତ ପରେ ସମାଜରେ ହତାଦାର ହେଉଥିବା ଏହି ବ୍ୟକ୍ତିମାନଙ୍କୁ ମିଳୁନି ମୌଳିକ ସୁବିଧା । କେବଳ ସମାଜ ନୁହେଁ, ପ୍ରଶାସନ ବି ଏମାନଙ୍କୁ ହତାଦାର କରୁଛି । ଚାଷ ଜମି, ଘରଠାରୁ ଆରମ୍ଭ ସଂରକ୍ଷଣ ବ୍ୟବସ୍ଥାରେ ସବୁଥିରେ ଏମାନଙ୍କୁ ଅବହେଳା କରାଯାଉଛି । ଯେଉଁଥିପାଇଁ କୁଷ୍ଠ ରୋଗରୁ ମୁକ୍ତ ପରେ ୨୭୨ଜଣ ମହିଳା ଓ ପୁରୁଷ ଗୁଜୁରାଣ ସାଙ୍ଗକୁ ମୁଣ୍ଡ ଗୁଞ୍ଜିବାକୁ ଜମି, ଘର ଖଣ୍ଡେ ପାଇଁ ବହୁଦିନରୁ ଆବେଦନ କରି ବି ଏହି ସୁବିଧାରୁ ବଂଚିତ ହୋଇଛନ୍ତି । ପୁରୀ ଜିଲ୍ଲାର ଏହି ଚିତ୍ର ପ୍ରଶାସନିକ କାର୍ଯ୍ୟଦକ୍ଷତାକୁ ଅଙ୍ଗୁଳି ନିର୍ଦେଶ କରୁଛି। ଆବେଦନକାରୀମାନେ ଏ ସଂପର୍କରେ ବିଭାଗୀୟ ଉଚ୍ଚ କର୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ପରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗର ଉପସଚିବ ଯଦୁମଣି ମାହାଲା ପୁରୀ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି । ତୁରନ୍ତ ଆବେଦନକାରୀଙ୍କ ଆବେଦନ ଅନୁଯାୟୀ କ୍ଷେତ୍ର ପରିଦର୍ଶନ ସହ ଆବଶ୍ୟକ ଯାଂଚ ପରେ ଏହି ସୁବିଧା ଯୋଗାଇଦେବାକୁ ଚିଠିରେ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
କୁଷ୍ଠ ରୋଗରେ ଆକ୍ରାନ୍ତ ହୋଇ ସାମାଜିକ ବାସନ୍ଦ ସହ ଅନେକ ଅପବାଦର ଶିକାର ପରେ ବହୁ କୁଷ୍ଠ ଆକ୍ରାନ୍ତ ଲୋକନାଥ ରୋଡର ଜୀବରାମଜୀ ପଲ୍ଲୀରେ ଏକତ୍ର ରହୁଛନ୍ତି । ଏ ମଧ୍ୟରୁ ବହୁ କୁଷ୍ଠ ଆକ୍ରାନ୍ତ ଏହି ଦୁରାରୋଗ୍ୟରୁ ଆରୋଗ୍ୟ ଭଲ କରି ସାରିଲେଣି । ଯେଉଁମାନେ ପେଟପାଟଣା ପାଇଁ ଚାଷ ଜମି ସାଙ୍ଗକୁ ମୁଣ୍ଡ ଗୁଞ୍ଜିବାକୁ ଜାଗା, ଘର ଚାହୁଁଛନ୍ତି। କୁଷ୍ଠ ଆକ୍ରାନ୍ତ ଭିନ୍ନକ୍ଷମରେ ଗଣା ହେଉଥିବାରୁ ଆଇନ ଅନୁସାରେ ଏମାନଙ୍କ ପାଇଁ ୫ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି । କିନ୍ତୁ କୁଷ୍ଠ ରୋଗରୁ ମୁକ୍ତ ପରେ ପୁରୀରେ ବସବାସ କରୁଥିବା ଏହି ବ୍ୟକ୍ତିମାନେ ଆଜି ପର୍ଯ୍ୟନ୍ତ ସଂରକ୍ଷଣ ବ୍ୟବସ୍ଥାରେ ସୁବିଧା ପାଇବାରୁ ବଂଚିତ ଅଛନ୍ତି। ବହୁଦିନରୁ ଜମି ପାଇଁ ଆବେଦନ କରି ବି ନିରାଶ ହୋଇଛନ୍ତି । ଶେଷରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତକରଣ ବିଭାଗକୁ ଚିଠି ଲେଖିବା ପରେ ସଂପୃକ୍ତ ବିଭାଗ କୁଷ୍ଠ ରୋଗରୁ ମୁକ୍ତ ପରେ ଜମି ପାଇଁ ଆବେଦନ କରିଥିବା ମହିଳା ଓ ପୁରୁଷଙ୍କ ଏକ ତାଲିକା ପ୍ରସ୍ତୁତ କରିଛି । ଯେଉଁଥିରେ ଜୀବରାମଜୀ ପଲ୍ଲୀରେ ରହୁଥିବା ୨୭୨ଜଣଙ୍କ ନାଁ ଅନ୍ତର୍ଭୁକ୍ତ ରହିଛି । ଏଥିରେ ୧୫୩ଜଣ ମହିଳା ଓ ବାକି ପୁରୁଷ ରହିଛନ୍ତି । ଚିଠି(ନଂ-୨୨୬୭)ରେ ଉପସଚିବ ଶ୍ରୀ ମାହାଲା ଉଲ୍ଲେଖ କରିଛନ୍ତି କି କୁଷ୍ଠ ଆକ୍ରାନ୍ତ ଓ ଏହି ରୋଗରୁ ମୁକ୍ତ ପାଇଥିବା ବ୍ୟକ୍ତିମାନଙ୍କୁ ସମାଜରେ ହୀନ ଚକ୍ଷୁରେ ଦେଖାଯାଉଛି । ଅପବାଦର ବୋଝ ମୁଣ୍ଡାଇବାକୁ ପଡ଼ୁଛି। ଅନେକାଂଶରେ ସେମାନଙ୍କୁ ଜନବସତିରୁ ଦୂରେଇ ରଖାଯାଉଛି । ଯେଉଁମାନଙ୍କ ପାଖରେ ମୌଳିକ ସୁବିଧା ବି ଉପଲବ୍ଧ ନାହିଁ ।
ଆର୍ପିଡବ୍ଲୁଡି ଆଇନ ୨୦୧୬, ସେକ୍ସନ୍-୨(ଜେଡ୍ସି) ଅନୁଯାୟୀ, ଯେଉଁମାନେ ଏହି ରୋଗରୁ ମୁକ୍ତ ହୋଇ ସାରିଛନ୍ତି, ସେମାନଙ୍କୁ ବି ଭିନ୍ନକ୍ଷମ ଭାବେ ଗଣାଯାଉଛି । ଏହି ଆଇନର ସେକ୍ସନ୍ ୩୭(ଏ) ଅନୁଯାୟୀ, ସରକାର ତଥା ସ୍ଥାନୀୟ ପ୍ରଶାସନ ଏହି ବର୍ଗର ଲୋକଙ୍କୁ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଓ ଯୋଜନାରେ ଚାଷ ଜମି ଓ ଘର ଦେବାର ୫ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି । ମହିଳାମାନଙ୍କୁ ଅଧିକ ପ୍ରାଧାନ୍ୟ ଦେବାର ବି ବ୍ୟବସ୍ଥା ରହିଛି । ଲୋକନାଥ ରୋଡ୍ ଜୀବରାମଜୀ ପଲ୍ଲୀର ଯେଉଁ ୨୭୨ ଆବେଦନକାରୀ ଅଛନ୍ତି, ସେମାନେ ଏହି ଆଇନ ଅନ୍ତର୍ଭୁକ୍ତ । ଏହି ଦୃଷ୍ଟିରୁ ଆବଶ୍ୟକ ଯାଂଚ କରି ବିହିତ ପଦକ୍ଷେପ ନେବାକୁ କହିଛନ୍ତି।