ବରୁଣେଇ ପାଦଦେଶରେ ହେବ ପାଇକ ବିଦ୍ରୋହ ସ୍ଥାୟୀ ସ୍ମାରକୀ
କେନ୍ଦ୍ର ସଂସ୍କୃତି ମନ୍ତ୍ରୀଙ୍କ ଚିଠି, ୫୦ ଏକର ଜମି ଦେବାକୁ ମୁଖ୍ୟମନ୍ତ୍ରୀଙ୍କୁ ଅନୁରୋଧ
ଉତ୍କଳ ବିଶ୍ୱବିଦ୍ୟାଳୟରେ ପାଇକ ବିଦ୍ରୋହ ଚେୟାର ଲାଗି ପ୍ରସ୍ତାବ
Sambad is now on WhatsApp
Join and get latest news updates delivered to you via WhatsApp
ଭୁବନେଶ୍ୱର : ପାଇକ ବିଦ୍ରୋହର ଦୁଇ ଶହ ବର୍ଷ ପୂର୍ତି ଅବସରରେ ଖୋର୍ଧା ଜିଲ୍ଲା ବରୁଣେଇ ପାହାଡ଼ ତଳେ ପାଇକ ବିଦ୍ରୋହ ସ୍ଥାୟୀ ସ୍ମାରକୀ ପ୍ରତିଷ୍ଠା ହେବ। ଏଥିପାଇଁ ୫୦ ଏକର ଜମି ଯୋଗାଇ ଦେବା ଲାଗି କେନ୍ଦ୍ର ସଂସ୍କୃତି ମନ୍ତ୍ରୀ ଡ. ମହେଶ ଶର୍ମା ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟକୁ ଚିଠି ଲେଖିଛନ୍ତି। ଏଥିସହ ଉତ୍କଳ ବିଶ୍ୱବିଦ୍ୟାଳୟରେ ପାଇକ ବିଦ୍ରୋହ ଚେୟାର ପ୍ରତିଷ୍ଠା ପାଇଁ ପ୍ରସ୍ତାବ ଦେବାକୁ ଉତ୍କଳ ବିଶ୍ୱବିଦ୍ୟାଳୟ କୁଳପତି ପ୍ରଫେସର ସୌମେନ୍ଦ୍ର ମୋହନ ପଟ୍ଟନାୟକଙ୍କୁ ମନ୍ତ୍ରୀ ଶ୍ରୀ ଶର୍ମା ପରାମର୍ଶ ଦେଇଛନ୍ତି।
ମୁଖ୍ୟମନ୍ତ୍ରୀଙ୍କୁ ଲେଖିଥିବା ଚିଠିରେ ମନ୍ତ୍ରୀ ଶ୍ରୀ ଶର୍ମା ଉଲ୍ଲେଖ କରିଛନ୍ତି ଯେ ପାଇକ ବିଦ୍ରୋହ ଐତିହାସିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଘଟଣା। ତାହାକୁ ସ୍ମରଣୀୟ କରିବା ଲାଗି ୨୦୧୭ ମାର୍ଚ୍ଚ ମାସରୁ ୨୦୧୮ ମାର୍ଚ୍ଚ ମାସ ପର୍ଯ୍ୟନ୍ତ ପାଇକ ବିଦ୍ରୋହର ଦୁଇ ଶହ ବର୍ଷ ପୂର୍ତ୍ତି ପାଳନ କରାଯାଉଛି। ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ, ବିଶ୍ୱବିଦ୍ୟାଳୟରେ ସ୍ୱତନ୍ତ୍ର ଚେୟାର ପ୍ରତିଷ୍ଠା, ପାଇକ ବିଦ୍ରୋହ ସହ ଜଡ଼ିତ ସ୍ଥାନର ଭିତ୍ତିଭୂମି ବିକାଶ ଲାଗି ପଦକ୍ଷେପମାନେ ହାତକୁ ନିଆଯାଉଛି। ସେହି ଦୃଷ୍ଟିରେ ଖୋର୍ଧାର ବରୁଣେଇ ପାଦଦେଶରେ ୫୦ ଏକର ଜମି ଯୋଗାଇ ଦେଲେ ସେଠାରେ ଏକ ସ୍ଥାୟୀ ସ୍ମାରକୀ ନିର୍ମାଣ କରାଯାଇପାରିବ।
ଅନ୍ୟପକ୍ଷରେ ଉତ୍କଳ ବିଶ୍ୱବିଦ୍ୟାଳୟ କୁଳପତି ପ୍ରଫେସର ପଟ୍ଟନାୟକଙ୍କୁ ଲେଖାଯାଇଥିବା ଚିଠିରେ ଉଲ୍ଲେଖ କରାଯାଇଛି ଐତିହାସିକ ଦୃଷ୍ଟିରୁ ପାଇକ ବିଦ୍ରୋହ ଗୁରୁତ୍ୱପୂର୍ଣ୍ଣ ହୋଇଥିବାରୁ ତାହାର ଏକ ଚେୟାର କୌଣସି ଏକ ବିଶ୍ୱବିଦ୍ୟାଳୟରେ କରିବାକୁ ନିଷ୍ପତ୍ତି ହୋଇଛି। ଦୀର୍ଘଦିନ ଧରି ଏହି ଚେୟାର ଚାଲୁ ରଖିବା ପାଇଁ କେନ୍ଦ୍ର ସରକାର କର୍ପସ ଫଣ୍ଡ୍ର ବ୍ୟବସ୍ଥା କରିବେ, ଯାହା ସୁଧରେ ଏହି ଚେୟାର ଖର୍ଚ୍ଚ ଚାଲିପାରିବ। ଉତ୍କଳ ବିଶ୍ୱବିଦ୍ୟାଳୟ ରାଜ୍ୟର ସର୍ବପୁରାତନ ବିଶ୍ୱବିଦ୍ୟାଳୟ ହୋଇଥିବାରୁ ସେଠାରେ ଚେୟାର ପ୍ରତିଷ୍ଠା କରି ପାଇକ ବିଦ୍ରୋହ ଉପରେ ଅନୁସନ୍ଧାନ ଓ ଗବେଷଣା ଆଦି କରାଯିବ। ଏହି ଚେୟାର ଖୋଲିବା ଲାଗି ବିଧିବଦ୍ଧ ପ୍ରସ୍ତାବ ଦେବାକୁ ଶ୍ରୀ ଶର୍ମା କୁଳପତିଙ୍କୁ ପରାମର୍ଶ ଦେଇଛନ୍ତି।