ପୁରୀ : ରଥ ନିର୍ମାଣ କାର୍ଯ୍ୟକୁ ଆଜି ୨୩ ଦିନ ପୂରିଛି। ବୁଧବାର ଦିନ ତିନି ରଥର ୪୨ ଚକ ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଛି। ଗତକାଲି ୪୨ରୁ ୩୮ ଚକ ନିର୍ମାଣ ଶେଷ ହୋଇଥିଲା। ଆଜି ବାକି ୪ ଚକ ନିର୍ମାଣକୁ ମହାରଣା ସେବକମାନେ ଶେଷ ସ୍ପର୍ଶ ଦେଉଛନ୍ତି। ତାଳଧ୍ୱଜ ରଥର ଶେଷ ଦୁଇଟି ଚକର ଅରରେ ପଇ ସଂଯୋଗ ପୂର୍ବକ ପଇରେ କିଳା ବାଡ଼ିଆ ଓ କଳସା କାର୍ଯ୍ୟ ଜାରି ରହିଛି।
Sambad is now on WhatsApp
Join and get latest news updates delivered to you via WhatsApp
ଦର୍ପଦଳନ ରଥ ଓ ନନ୍ଦିଘୋଷ ରଥର ଗୋଟିଏ ଲେଖାଏଁ ଚକ କାମ ଜାରି ରହିଥିବାବେଳେ ଏହାର ଅରରେ ପଇ ପିନ୍ଧା ସରି ପଇ କଳସା କାମ ଜାରି ରହିଛି। ତିନିରଥର ଆବଶ୍ୟକ ସଂଖ୍ୟକ ଅଖ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଗୋଟିଏ ଗୋଟିଏ ପଡି ନାହାକା ଅଖର ଆଁସ ମରା କାର୍ଯ୍ୟ ଜାରି ରହିଛି। ଗୁରୁବାର ସୁଦ୍ଧା ତିନି ରଥର ଅଖ ଓ ଚକ ନିର୍ମାଣ ଶେଷ ହେବ ବୋଲି ସୂଚନା ମିଳିଛି। ବୁଧବାର ସୁଦ୍ଧା ତିନି ରଥର ୧୨ଟି ଲେଖାଏଁ ୨୦ ଫୁଟିଆ ଚଉତା କାଠର ଚଉପଟ କାର୍ଯ୍ୟ ଶେଷ ହୋଇ ସମସ୍ତ ଚଉତାର ଦୁଇ ମୁହଁ କାପ କରାଯାଇଛି। ଆସନ୍ତାକାଲି ଚଉତା କାଠର ଦୁଇ ମୁହଁରେ ବିନ୍ଧ ଅନୁକୂଳ କାର୍ଯ୍ୟ ହେବ। ଆଜି ତିନିରଥର କରତି ସେବକମାନେ ତାଳଧ୍ୱଜ ରଥର ୪୦ ଫୁଟିଆ ପୋଲ ଗୟଳର ଚିରଟ କାର୍ଯ୍ୟ ଶେଷ କରିଛନ୍ତି।