ସୋମବାର ଓଡ଼ିଶାରେ ଟିକାନେଲେ ୩୨,୫୨୬ ଜଣ, ୨ ଜଣଙ୍କ ଶରୀରରେ ପାର୍ଶ୍ବ ପ୍ରତିକ୍ରିୟା
ଭୁବନେଶ୍ବର : କରୋନା ଟୀକାକରଣ କାର୍ଯ୍ୟକ୍ରମର ୩ୟ ଦିବସରେ ସାରା ଓଡ଼ିଶାରେ ମୋଟ ୩୭୫ଟି ଟୀକାକରଣ ସେସନ ଅନୁଷ୍ଠିତ ହୋଇଛି । ଆଜି ୩୧୯୦୨ ଜଣଙ୍କ ଟୀକାକରଣ ପାଇଁ ଲକ୍ଷ୍ୟ ରଖାଯାଇଥିବାବେଳେ ମୋଟ ୩୨୫୨୬ ଜଣ ଲୋକ ଟିକା ନେଇଥିଲେ । ଫଳରେ ଆଜି ୧୦୨ ପ୍ରତିଶତ ଟୀକାକରଣ କରାଯାଇଛି । ଆଜି ଟିକା ନେଇଥିବା ଲୋକମାନଙ୍କ ମଧ୍ୟରୁ ୨ ଜଣଙ୍କ ଶରୀରରେ କିଛିଟା ପାର୍ଶ୍ବ ପ୍ରତିକ୍ରିୟା ଦେଖାଦେଇଥିଲା । ବାଲେଶ୍ବର ଓ ନବରଙ୍ଗପୁରର ଜିଲ୍ଲାର ଜଣେ ଲେଖାଏଁ ଲୋକଙ୍କ ଶରୀରରେ ପାର୍ଶ୍ବ ପ୍ରତିକ୍ରିୟା ଦେଖାଦେଇଛି ।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶାର ପ୍ରାୟ ସମସ୍ତ ଜିଲ୍ଲାରେ ୧୦୦ ପ୍ରତିଶତ ଟୀକାକରଣ ଅଧିବେଶନ ହୋଇଥିବାବେଳେ ଅନୁଗୁଳରେ ୭୫ ପ୍ରତିଶତ ଓ କେନ୍ଦୁଝରରେ ୮୩ ପ୍ରତିଶତ ଅଧିବେଶନ ହୋଇଥିଲା । ତେବେ ଜିଲ୍ଲା ମାନଙ୍କ ମଧ୍ୟରୁ ଖୋର୍ଦ୍ଧାରେ ସର୍ବାଧିକ ୩୭୬୧ ଜଣ ଟିକା ନେଇଥିଲେ । ନୂଆପଡ଼ାରେ ସର୍ବନିମ୍ନ ୧୨୪ ଜଣ ଟିକା ନେଇଥିଲେ ।
ଅନ୍ୟପକ୍ଷରେ ଭୁବନେଶ୍ବରରେ ଆଜିର ଟୀକାକରଣ କାର୍ଯ୍ୟକ୍ରମ କିଛିଟା ନୈରାଶ୍ୟଜନକ ଥିଲା । ଆଜି ପ୍ରାୟ ୨୮୬୪ ଜଣ ଟିକା ନେବାକୁ ଥିବାବେଳେ ମାତ୍ର ୧୯୪୭ ଜଣ ଟିକା ନେଇଥିଲେ । ଫଳରେ ଟୀକାକରଣ ଲକ୍ଷ୍ୟର ୬୮ ପ୍ରତିଶତ ହାସଲ ହୋଇଛି ।