ଭୁବନେଶ୍ବର : ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ସମସ୍ତ ସଂପୃକ୍ତ ପଦାଧିକାରୀଙ୍କୁ ଓଡ଼ିଶା ଅଣଗେଜେଟେଡ୍ ପ୍ରାଣୀ ଚିକିତ୍ସା ବୈଷୟିକ କର୍ମଚାରୀ ସଂଘ ପକ୍ଷରୁ ୫ ଦଫା ଦାବିପତ୍ର ପ୍ରଦାନ କରାଯାଇଛି। ଦାବିଗୁଡ଼ିକ ପୂରଣ ନହେଲେ ଆସନ୍ତା ୧୮ ତାରିଖରୁ ସଂଘ ପକ୍ଷରୁ ପର୍ଯ୍ୟାୟ କ୍ରମେ ଆନ୍ଦୋଳନାତ୍ମକ କାର୍ଯ୍ୟକ୍ରମ କରାଯିବ। ଏହା ସତ୍ତ୍ବେ ସରକାର ପଦକ୍ଷେପ ନେନଲେ ମାର୍ଚ ୧ ତାରିଖରୁ ଅନିର୍ଦିଷ୍ଟ କାଳ ପର୍ଯ୍ୟନ୍ତ କାର୍ଯ୍ୟବନ୍ଦ କରାଯିବ ବୋଲି ଚେତାବନୀ ଦେଇଛି ସଂଘ।
Sambad is now on WhatsApp
Join and get latest news updates delivered to you via WhatsApp
ଏକ ପ୍ରେସ୍ ବିବୃତିରେ ସଂଘର ସଭାପତି ଉପେନ୍ଦ୍ର ନାଥ ରଣା କହିଛନ୍ତି ଯେ ଦୀର୍ଘଦିନର ୫ ଦଫା ଦାବି ନେଇ ସଂଘ ପକ୍ଷରୁ ଗତବର୍ଷ ଫେବ୍ରୁଆରି ୧୨ ଓ ୧୩ ତାରିଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ମୁଖ୍ୟମନ୍ତ୍ରୀଙ୍କ ନିର୍ଦେଶରେ ବିଭାଗୀୟ ମନ୍ତ୍ରୀ, ସଚିବ ପ୍ରମୁଖ ସଂଘର କର୍ମକର୍ତାମାନଙ୍କ ସହିତ ଆଲୋଚନା କରି ଦରମା ବୃଦ୍ଧି, କ୍ୟାଡର ପୁନର୍ଗଠନ, ଜବ୍ଚାର୍ଟ ସଂଶୋଧନ ଆଦି ୫ ଦଫା ଦାବିଗୁଡ଼ିକ ୪ ମାସ ମଧ୍ୟରେ ସମାଧାନ କରିବା ନେଇ ଲିଖିତ ପ୍ରତିଶ୍ରୁତି ଦେଇଥିଲେ। ଫଳରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ଇତି ମଧ୍ୟରେ ଏକବର୍ଷ ବିତିଯାଇଥିଲେ ମଧ୍ୟ ୩ ହଜାର ପ୍ରାଣୀଧନ ନିରୀକ୍ଷକ ଓ ଏହାର କ୍ୟାଡର ପ୍ରତି ଅବିଚାର କରିବା ଫଳରେ ସଂଘ ଆନ୍ଦୋଳନକୁ ଓହ୍ଳାଇବା ପାଇଁ ନିଷ୍ପତ୍ତି ନେଇଥିବା ଶ୍ରୀ ରଣା କହିଛନ୍ତି।