କେତେକ ରାଷ୍ଟ୍ରାୟତ ବ୍ୟାଙ୍କର ଘରୋଇକରଣ କରାଯାଇପାରେ: ଷ୍ଟେଟ ବ୍ୟାଙ୍କ ଅଧ୍ୟକ୍ଷ
ନୂଆଦିଲ୍ଲୀ: ଦେଶରେ ବ୍ୟାଙ୍କଗୁଡ଼ିକର ଅବସ୍ଥା ଏବେ ଭଲନାହିଁ । ବଢିଚାଲିଥିବା ଅନାଦେୟ ଋଣ ଓ ପରିଚାଳନାଗତ ଅବ୍ୟବସ୍ଥା ଯୋଗୁଁ ଦେଶର ଅଧିକାଂଶ ରାଷ୍ଟ୍ରାୟତ ବ୍ୟାଙ୍କ ଗୁରୁତର ଆର୍ଥିକ ସଂକଟ ଦେଇ ଗତି କରୁଛନ୍ତି । ଏ ପରିସ୍ଥିତିରେ ବ୍ୟାଙ୍କ ଘରୋଇକରଣ କଥା ଉଠୁଛି । କିଛିଦିନ ତଳେ ପୂର୍ବତନ ନିତିଆୟୋଗ ଉପାଧ୍ୟକ୍ଷ ଅରବିନ୍ଦ ପାନାଗାରିଆ ଏହା ସପକ୍ଷରେ ମତ ଦେଇଥିଲେ । ଏବେ ଷ୍ଟେଟ ବ୍ୟାଙ୍କ ଅଧ୍ୟକ୍ଷ ରଜନୀଶ କୁମାର ମଧ୍ୟ ଏହା ସପକ୍ଷରେ ମତ ଦେଇଛନ୍ତି । ସେ କହିଛନ୍ତି ଯେ ଷ୍ଟେଟ ବ୍ୟାଙ୍କକୁ ଛାଡି ଅନ୍ୟ କେତୋଟି ରାଷ୍ଟ୍ରାୟତ ବ୍ୟାଙ୍କର ଘରୋଇକରଣ କରିହେବ । ତେବେ ଏବେ ଏଥିପାଇଁ ଉପଯୁକ୍ତ ସମୟ ନୁହେଁ । ଘରୋଇକରଣ ପ୍ରକ୍ରିୟାକୁ ସଫଳ କରିବାକୁ ହେଲେ ବ୍ୟାଙ୍କ ଗୁଡ଼ିକୁ ସେଥିପାଇଁ ଯୋଗ୍ୟ ଓ ଆକର୍ଷଣୀୟ କରିବାକୁ ହେବ । ଏବେଠାରୁ ବ୍ୟାଙ୍କଗୁଡ଼ିକର ସ୍ଥିତିକୁ ସୁଧାରି ଦୁଇ ବର୍ଷ ପରେ ଘରୋଇକରଣ କରାଯାଇପାରେ । କିନ୍ତୁ ସବୁ ରାଷ୍ଟ୍ରାୟତ ବ୍ୟାଙ୍କର ଘରୋଇକରଣ କଲେ ସରକାରଙ୍କ ସାମାଜିକ କାର୍ଯ୍ୟକ୍ରମଗୁଡ଼ିକ ପ୍ରଭାବିତ ହୋଇପାରେ । ଏଣୁ ଷ୍ଟେଟ ବ୍ୟାଙ୍କ ପରି କେତେକ ପ୍ରମୁଖ ବ୍ୟାଙ୍କକୁ ଛାଡି ଅନ୍ୟଗୁଡ଼ିକରୁ ପୁଞ୍ଜି ପ୍ରତ୍ୟାହାର କରାଯାଇପାରେ ।
Sambad is now on WhatsApp
Join and get latest news updates delivered to you via WhatsApp
ଗତ ମାସରେ ମୁଖ୍ୟ ଅର୍ଥନୈତିକ ପରାମର୍ଶଦାତା ଅରବିନ୍ଦ ସୁବ୍ରମଣ୍ୟମ ବ୍ୟାଙ୍କ ଘରୋଇକରଣ ଉପରେ ଚିନ୍ତା କରିବାର ସମୟ ଆସିଛି ବୋଲି କହିଥିଲେ ।