ମୁମ୍ବାଇ: ଗତ ଡ଼ିସେମ୍ବର ୩୧ ତାରିଖ ସୁଦ୍ଧା ଶେଷ ହୋଇଥିବା ଚଳିତ ଆର୍ଥିକ ବର୍ଷର ତୃତୀୟ ତ୍ରୟମାସ ଓ ପ୍ରଥମ ୯ ମାସର ଆର୍ଥିକ ଫଳାଫଳ ଟାଟା ଷ୍ଟିଲ ପକ୍ଷରୁ ଘୋଷଣା କରାଯାଇଛି । ଏହି ସମୟରେ ଟାଟା ଷ୍ଟିଲର ମୋଟ ଉତ୍ପାଦନ ୧୧% ବୃଦ୍ଧି ପାଇ ୭.୨୩ ନିୟୁତ ଟନ୍ ହୋଇଛି ଏବଂ ବିତରଣରେ ୭% ବୃଦ୍ଧି ଘଟି ଏହା ୬.୯୯ ନିୟୁତ ଟନ୍ ହୋଇଛି । ତୃତୀୟ ତ୍ରୟମାସରେ ଭାରତୀୟ ଇସ୍ପାତ ଉତ୍ପାଦନ ବର୍ଷ ଭିତ୍ତିରେ ୩୪% ବୃଦ୍ଧି ପାଇ ୪.୩୮ ନିୟୁତ ଟନ୍ ହୋଇଛି ଏବଂ ବିତରଣ ୧୮% ବୃଦ୍ଧି ପାଇ ୩.୩୦ ନିୟୁତ ଟନରୁ ୩.୮୯ ନିୟୁତ ଟନକୁ ବୃଦ୍ଧି ପାଇଛି । ମୋଟ ରାଜସ୍ୱରେ ୨୩% ବୃଦ୍ଧି ପାଇ ଏହା ୪୧୨୨୦ କୋଟି ଟଙ୍କାରେ ପହଞ୍ଚିଛି । ତୃତୀୟ ତ୍ରୟମାସରେ ଭାରତୀୟ ରାଜସ୍ୱ ୪୧% ହୋଇ ୨୨,୦୬୩ କୋଟି ଟଙ୍କା ହୋଇଛି । ପୂର୍ବ ତ୍ରୟମାସରେ ଏହା ୧୫୫୯୬ କୋଟି ଟଙ୍କା ଥିଲା । ଏବିଟଡ଼ା ୨୭% ହୋଇ ୭୨୨୫ କୋଟି ଟଙ୍କା ହୋଇଛି ଯାହା ପୂର୍ବବର୍ଷ ଏହି ସମୟରେ ୫୬୭୧ କୋଟି ଟଙ୍କା ଥିଲା । ପ୍ୟାଟ ୧୭୫୩ କୋଟି ଟଙ୍କାକୁ ବୃଦ୍ଧି ପାଇଛି ଯାହା ପୂର୍ବବର୍ଷ ଏହି ସମୟରେ ୧୧୩୬ କୋଟି ଟଙ୍କା ଥିଲା । ଏହି ସମୟରେ ଋଣ ୯୦୮୩ କୋଟି ଟଙ୍କା ହ୍ରାସ ପାଇଛି ।
Sambad is now on WhatsApp
Join and get latest news updates delivered to you via WhatsApp
ଏହି ପରିପ୍ରେକ୍ଷୀରେ ଟାଟା ଷ୍ଟିଲ ପରିଚାଳନା ନିଦେ୍ର୍ଦଶକ ତଥା ସିଇଓ ଟି.ଭି.ନରେନ୍ଦ୍ରନ କହିଛନ୍ତି ଯେ, ଟାଟା ଷ୍ଟିଲ ଅଭିବୃଦ୍ଧି ପାଇଁ ପ୍ରତିଶ୍ରୁତିବଦ୍ଧ । କାର୍ଯ୍ୟ ଦକ୍ଷତା, ବଜାର ଉପସ୍ଥିତି ଓ ଗ୍ରାହକ ସଂପର୍କ ପ୍ରତି କଂପାନୀ ଦୃଷ୍ଟି ନିବଦ୍ଧ କରିଛି । ଆନ୍ତର୍ଜାତିକ ବଜାରରେ ଇସ୍ପାତର ଦର ହ୍ରାସ ସତ୍ତ୍ୱେ ଆମେ ବଜାରରେ ସ୍ଥିତି ବଜାୟ ରଖିପାରିଛୁ ବୋଲି ସେ କହିଛନ୍ତି । ଟାଟା ଷ୍ଟିଲ ବିଏସଏଲ ମିଶ୍ରଣ ଓ କଳିଙ୍ଗନଗର ସଂପ୍ରସାରଣ ସଫଳତାର ସହ ହୋଇଛି । ଉଷା ମାର୍ଟିନ କଂପାନୀ ଅଧିଗ୍ରହଣ ପାଇଁ ଆମେ ଉଦ୍ୟମ କରୁଛୁ ବୋଲି ସେ କହିଛନ୍ତି ।