ନିଜକୁ ଜଣେ ସୁପରଷ୍ଟାର୍ ବୋଲି ମନେ କରିବା ଆରମ୍ଭ କରି ଦେଇଥିଲେ ଅକ୍ଷୟ ଖାନ୍ନା !
ପଞ୍ଜାବୀ ସିନେମାରୁ ହିନ୍ଦୀ ସିନେ ଜଗତରେ ପ୍ରଯୋଜକ ଭାବେ ଲୋକପ୍ରିୟତା ହାସଲ କରିଥିବା ଅବତାର୍ ସିଂ ଆହଲୁଓ୍ଵାଲିଆ ଜ୍ୟାକିଶ୍ରଫ୍ ଷ୍ଟାରର୍ ‘ ଷ୍ଟଣ୍ଟ୍ମ୍ୟାନ’ ନିର୍ମାଣ କରିବା ପରେ ଆଉ ଏକ ହିନ୍ଦୀ ସିନେମା ନିର୍ମାଣ କରିବାକୁ ଅଣ୍ଟା ଭିଡ଼ିଲେ । ସେହି ସମୟରେ ବଲିଉଡରେ ନାମୀ ଅଭିନେତା ବିନୋଦ ଖାନ୍ନାଙ୍କ ସୁପୁତ୍ର ଅକ୍ଷୟ ଖାନ୍ନା ‘ ହିମାଳୟ ପୁତ୍ର’ ଫିଲ୍ମର ସୁଟିଂ କରୁଥିଲେ । ଅକ୍ଷୟଙ୍କର ବଲିଉଡ୍ରେ ସେତେବେଳେ ଖୁବ୍ କ୍ରେଜ୍ ଥିଲା । ବନ୍ଧୁ ଓ ବିତରକମାନଙ୍କ ପରାମର୍ଶ କ୍ରମେ ପ୍ରଯୋଜକ ଅବତାର୍ ଅକ୍ଷୟ ଖାନ୍ନାଙ୍କୁ ଏକ ଫିଲ୍ମ ପାଇଁ ଆପ୍ରୋଚ୍ କଲେ । କାହାଣୀ ଶୁଣିବା ପରେ ଅକ୍ଷୟ ରାଜି ହେଲେ ଓ ସାଇନିଂ ଏମାଉଣ୍ଟ୍ ନେଇ ଫିଲ୍ମ ପାଇଁ ବିଧିବଦ୍ଧ ଭାବେ ଚୁକ୍ତିବଦ୍ଧ ହେଲେ । ଡେବ୍ୟୁ ଫିଲ୍ମ ରିଲିଜ୍ ହେବା ପୂର୍ବରୁ ସେସମୟ ରେ ଖୁବ୍ ମୋଟା ଅଙ୍କର ପାରିଶ୍ରମିକ ଦେବାକୁ ପ୍ରଯୋଜକ ରାଜି ହୋଇ ଥିଲେ । ଚୁକ୍ତି ଅନୁଯାୟୀ ‘ ହିମାଳୟ ପୁତ୍ର’ ରିଲିଜ୍ ହେବା ପରେ ଅକ୍ଷୟ ଖାନ୍ନା ଅବତାରଙ୍କ ଫିଲ୍ମର ସୁଟିଂ କରିବେ ।
Sambad is now on WhatsApp
Join and get latest news updates delivered to you via WhatsApp
ଏହାପରେ ପ୍ରଯୋଜକ ଅବତାର ସିଂ ଆହଲୁଓ୍ଵାଲିଆ ଫିଲ୍ମର ନିର୍ଦ୍ଦେଶକ ଭାବେ ‘ ସିନ୍ଦୂର’ ଫେମ୍ କେ.ରବିଶଙ୍କର୍ଙ୍କୁ ଚୁକ୍ତିବଦ୍ଧ କଲେ । ଏହାର ସ୍କ୍ରିପ୍ଟ ପ୍ରସ୍ତୁତ କଲେ ବିଖ୍ୟାତ ଲେଖକ ଯୋଡ଼ି ରାଜୀବ କୌଲ-ପ୍ରଫୁଲ୍ ପାରେଖ । ସ୍କ୍ରିପ୍ଟ କାମ ଚାଲୁଥିବା ବେଳେ ଅକ୍ଷୟଙ୍କ ଆପୋଜିଟ୍ରେ ନାୟିକା ଭାବେ ନମ୍ରତା ଶିରୋଦ୍କର୍ଙ୍କୁ ସାଇନ୍ କଲେ ନିର୍ମାତା । ଏତଦ୍ବ୍ୟତୀତ କୁମାର ଗୌରବ୍ ଓ ଆୟୁବ୍ ଖାନ୍ଙ୍କ ଭଳି କେତେକ କଳାକାରଙ୍କୁ ସର୍ପୋଟିଂ ରୋଲ୍ ପାଇଁ ସାଇନ୍ କରାଗଲା । ଖାଲି ସେତିକି ନୁହେଁ ଫିଲ୍ମର ଗୋଟିଏ ଗୀତ ରେକର୍ଡିଂ ମଧ୍ୟ କରାଗଲା, ଯେଉଁଥିରେ ପ୍ରଯୋଜକ ଅବତାର ଖର୍ଚ୍ଚ କରିଥିଲେ ପ୍ରାୟ ସାଢେ ୫ ଲକ୍ଷ ଟଙ୍କା । ମୋଟାମୋଟି ଭାବେ ସେତେବେଳକୁ ନିର୍ମାତାଙ୍କର ୨୩ ଲକ୍ଷ ଟଙ୍କା ଖର୍ଚ୍ଚ ହୋଇସାରିଥିଲା ।
‘ ହିମାଳୟ ପୁତ୍ର’ ରିଲିଜ୍ ହେଲା ଏବଂ ନିର୍ମାତା ଅବତାର୍ ସିଂ ଆହଲୁଓ୍ଵାଲିଆ ଅକ୍ଷୟଙ୍କୁ ଫିଲ୍ମର ସୁଟିଂ ଆରମ୍ଭ କରିବା କଥା ମନେ ପକାଇଲେ । ଯଦିଓ ‘ ହିମାଳୟ ପୁତ୍ର’ ସୁପରହିଟ୍ ହେଲା ନାହିଁ, ତଥାପି ସୁଭାଷ ଘାଇ, ପ୍ରିୟଦର୍ଶନ ଓ ଋଷି କପୁର୍ଙ୍କ ଭଳି ନିର୍ଦ୍ଦେଶକମାନେ ଅକ୍ଷୟ ଖାନ୍ନାଙ୍କୁ ନୂଆ ସିନେମା ପାଇଁ ଚୁକ୍ତିବଦ୍ଧ କଲେ । ନିର୍ମାତା ଅବତାର୍ ଅକ୍ଷୟଙ୍କୁ ଭେଟିବା ପାଇଁ ଯେତେବେଳେ ତାଙ୍କ ପାଖକୁ ଗଲେ, ସେତେବେଳେ ଜଣେ ଭିନ୍ନ ଅକ୍ଷୟଙ୍କୁ ଦେଖିବାକୁ ପାଇଲେ । କହିବାର କଥା ହେଲା ଅକ୍ଷୟ ଖାନ୍ନାଙ୍କ ଆଚରଣ ବଦଳିଯାଇଥିଲା । ସେ ନିଜକୁ ଜଣେ ସୁପରଷ୍ଟାର୍ ବୋଲି ମନେ କରିବା ଆରମ୍ଭ କରିଦେଇଥିଲେ । ଅକ୍ଷୟ ସୁଭାଷ ଘାଇଙ୍କ ନିର୍ଦ୍ଦେଶିତ ‘ତାଲ୍’, ପ୍ରିୟଦର୍ଶନଙ୍କ ନିର୍ଦ୍ଦେଶିତ‘ ଡୋଲି ସଜାକେ ରଖନା’ ଓ ଋଷି କପୁର୍ଙ୍କ ‘ଆ ଅବ୍ ଲୌଟ୍ ଚଲେ’ରେ ଲିଡ ରୋଲ କଲେ । କିନ୍ତୁ ଏହାପରେ ତାଙ୍କ କ୍ୟାରିଅର୍ ତଳକୁ ଗତି କଲା। ଏହା ଅବଶ୍ୟ ଭିନ୍ନ କଥା ଯେ ପରେଅବତାର୍ ସିଂ ଆହଲୁଓ୍ଵାଲିଆଙ୍କଠୁ ନେଇଥିବା ଅର୍ଥ ଫେରାଇଥିଲେ ଅକ୍ଷୟ ଖାନ୍ନା ।